Eete a Ŋie. 1 - Ebaibul

¹ Eete a ŋieosyo ŋolo a Solomon

Ekiyan ŋolo a ateran ka ŋikonei

² Emaikina iŋes okonu ayoŋ a akituk keŋ ŋarwa ŋuna alalak; anerae ejok amina keŋ aneni kaŋ akilo ŋagwe,

³ ekukuny ŋamyeta ŋuna iosa iyoŋ, ejok nooi ekiro kon ikwaan ka akimyet ŋina akukunyon ŋina ebukokina kwap, aŋun, ikiminasi iyoŋ ŋapesur.

⁴ Yaarae ayoŋ, ewanyakisi atipei. Akayau ayoŋ erwosit nagulei ŋuna a ere keŋ. Ikilakari ka ikilelyani isua kaapei ka iyoŋ, ikipuri isua amina kon akilo ŋagwe. Aŋun, iyookinito ikes ikiminasi iyoŋ.

⁵ Okoe ŋaberu a Yerusalem, eryono ayoŋ ka ebus, eryono ayoŋ cuc ikwa ŋiemae ŋulu a aloŋisat a ŋina a Kedar ka ebus ikwa ŋanaŋgae ŋuna inenetoi kai a Solomon ŋina ka apukan.

⁶ Nyikitekis ayoŋ ikijamuwarito aŋuna eryonia, anerae, akoloŋ ekesiryonit ayoŋ. Apotu ŋikaitotoi kaŋ okoŋoikis ayoŋ, ido apotu okoinakis ayoŋ akitiya lomanikor a epiini. Aŋun, abu ayoŋ nyeyok emanikor kaŋ a alope.

⁷ Iyoŋ ŋolominat kaŋ, tolimokinae ayoŋ neni imyaari iyoŋ ŋamesekin kon adak ka neni itowoeya iyoŋ ikes kidiŋ apaaran emwanuni akoloŋ. Kaanukiro emaikina ayoŋ olot akiwarit iyoŋ losipanin a ŋamesekin a ŋikonei kon?

Ekiyan ŋolo a eteran, ŋikonei ka ateran

⁸ Iyoŋ ŋinaminat anaberu a daadaŋ, ani pa kiyeni akibois, kiwuapak erot a ŋamesekin, torama ŋikaalei kon ŋulumee lonya ŋulu eya diyete ŋiemae ŋulu a ŋikeyokok.

⁹ Okoe ŋinaminat kaŋ, ekesikwaani ayoŋ ka aŋole ŋina anaŋolei a ŋuna irito ŋagaari a Parao.

¹⁰ Ibusak nooi ŋikelyo kon ŋulu etapakina ŋikayeliyel a ŋaki, ibus nooi edokole kon ŋolo ileleba ŋinapen.

¹¹ Itiyaunio isua aŋuna kon ŋinapen ŋulu itiyaunitae a egolid ŋulu eupakinitae losilipa.

¹² Apaki ŋina eboiyo erwosit alokicoloŋ alokai keŋ, abu eure a akimyet kaŋ tokukunyik iŋes.

¹³ Apaki ŋina eperyo ŋolominat kaŋ alokiŋaren kaŋ, ebob eure keŋ, ikwaan ka eminae ŋolo akukunyon.

¹⁴ Ibus aneni kaŋ ŋinaminat kaŋ, ikwaan ka eure a ŋatur a ŋuna alomanikor a epiini a ŋolo eyai neni enyaritae En-Gedi.

¹⁵ Okoe ibus iyoŋ nooi ŋinaminat kaŋ, okoe ibus iyoŋ nooi; ecope ŋakonyen kon.

¹⁶ Okoe ibus iyoŋ nooi ŋolominat kaŋ, okoe ikinirarit iyoŋ ayoŋ nooi, erae ekitaada yok ŋolo ka alakara.

¹⁷ Erae amina yok ŋina egogoŋ ikwa ŋakito a Cedar, kori ikwa ŋakito a Cipres.