Dan. 6 - Ebaibul

Aruruma ŋina acamit akiar Daniel

¹ Abu erwosit Darius totub aseun ŋikapolok amiat ka ŋatomoniarei apolonokin ŋakiboisyo ŋuna egelegelya anakwap a ŋina epukat iŋes,

² abu daŋ toseu ŋikilyok ŋiuni ŋulu epolokinito ŋulucekapolok. Alokidiŋ ŋuluuni ŋul, ayai Daniel, arae neni a ŋuluuni a ŋul iŋes amaikina ŋikapolokinitok a ŋakiboisyo kikobakis ŋakiro ka akwap, ikotere isiyookinio ŋuna ecamit erwosit kitiyae, kori nyitiyae.

³ Abu Daniel atipei totakan erae ŋolo ajok etic keŋ akilo ŋirukitos keŋ ŋuluarei ka ŋikapolokinitok a ŋakiboisyo, anerae ayai etau ŋolo ajokan nooi neni a Daniel, abu erwosit toyeu akiwuakin iŋes topolok akwap daadaŋ ŋina epukat erwosit.

⁴ Aŋun, apotu ŋirukitos a Daniel ŋuluarei ka ŋikapolokinitok a ŋakiboisyo kiwara ŋirotin ŋulukitoroniyaret epite ŋolo epukator Daniel. Nai apotu ikes nyeryamut idiobore ŋinikitoroniyaret Daniel, kori atuna adio aneni keŋ, anerae arae Daniel ituŋanan ŋini ekinyoma, ŋini pa alejeono, kori ŋini pa aryamununuyo itunae.

⁵ Temasi ŋikilyok ŋul, “Nyikipedori iwon aryamun idiobore ŋinikisitakinet Daniel, mati keanyun iwon ŋadikiro alotooma ŋikisila a Akuj keŋ ŋunakisitakinet iŋes.”

⁶ Aŋun, apotu ŋirukitos a Daniel ŋuluarei ka ŋikapolokinitok a ŋakiboisyo tocamunos toloto kaapei neni a erwosit temasi, “Okoe erwosit Darius, kiboi ŋikaru ka ŋikaru!

⁷ Adaut ŋikapolok daadaŋ ŋulu ikiŋarakinito iyoŋ akipuka akwap kon kaapei ka ŋikapolok a ŋikawoikinitok a ŋakwapin, ŋikepukak a ŋakiboisyo, ŋikeŋarakinitok ka ŋikawoikinitok a ŋakwapin acamun atemar kiwuak erwosit ekisil ka toreik ŋituŋa kiwuapa, tosodi ituŋanan daadaŋ ŋini ilipi alotooma ŋirwa ŋatomoniuni neni a ibore a idio a ŋini erae akuj keŋ, kori neni a ituŋanan a ice akilo iyoŋ, okoe erwosit, emaikina tocakakinae iŋes nadui a ŋiŋatunyo.

⁸ Aŋun tokona, okoe erwosit, totubu ekisil kiwuak akan kon, ikotere edaun ituŋanan ilocokini torubak eyai lopite ŋolo igiritere ŋikisila a Ŋimedes ka Ŋiperisan, ŋikisila ŋulu emam nyiloconokinio.”

⁹ Aŋun, abu erwosit Darius kiwuak akan keŋ nakiro ŋuna aponi totubunoe.

Daniel anadui a ŋiŋatunyo

¹⁰ Ani tari keyenu Daniel atemar ewuak erwosit akan keŋ akitogogoŋio ekisil ŋolo aponi totubunoe, abu torubak elosenene lore keŋ ŋolo aya ŋidirisae nagule ŋina alokidiama, eŋoliyarito ŋidirisae ŋul lowae ŋolo ayai Yerusalem. Abu iŋes torubak elosenene nen toryedik kilip ka kipur Akuj keŋ ŋarwa ŋauni a ŋinakoloŋit, lopite ŋolopei sek etiyaa iŋes.

¹¹ Apotu nai ŋikilyok ŋulu atukunito akitiya aronis neni a Daniel potu neni ayai Daniel, akisyonio aneni ka Akuj keŋ.

¹² Apotu nai ŋikilyok ŋul toloto neni a erwosit kirworo ŋakiro a ekisil a ŋolo aponi totubunoe temasi, “Okoe erwosit, pa mono ibu iyoŋ kiwuak akan kon lokisil ŋolo aponi totubunere atemar ituŋanan daadaŋ ŋini ilipi alotooma ŋirwa ŋatomoniuni neni a ibore a idio a ŋini erae akuj keŋ, kori neni a ituŋanan a ice akilo iyoŋ, okoe erwosit, emaikina tocakakinae iŋes nadui a ŋiŋatunyo a?” Toboŋok erwosit tema, “Ŋuna aponi totubunoe, nyilocokino, eyakasi lopite ŋolo igiritere ŋikisila a Ŋimedes ka Ŋiperisan, ŋikisila ŋulu emam nyiloconokinio.”

¹³ Kinyakakis ŋikapolok ŋul erwosit temasi, “Daniel ŋol, epei a ŋirikuno alo Yudaya, nyepupi ŋakiro kon, okoe erwosit, kori ŋakiro ŋuna ibu iyoŋ totub, nai ilipi iŋes neni a Akuj keŋ ŋirwa ŋiuni a ŋinakoloŋit.”

¹⁴ Ani iirari erwosit ŋakiro ŋuna esitakinitere Daniel, abu iŋes kiyaloloŋ nooi, kiwar erot ŋolo eiunia Daniel, kiwar epite ŋolo eiunia Daniel ŋinapei taparacu todoiyo akoloŋ.

¹⁵ Apotu nai ŋikilyok ŋulu atukunito akitiya aronis neni a Daniel potu temasi, “Okoe erwosit, toyenu ŋakiro nu, erae ekisil a Ŋimedes ka Ŋiperisan atemar mam ŋakiro ŋuna etubuni erwosit, kori ekisil ŋolo iwuakini erwosit, ido kilocokinoe.”

¹⁶ Tolimok nai erwosit ŋituŋa atemar yaunae Daniel, tosodi aponi yaunae Daniel kimasakinae nadui a ŋiŋatunyo. Tema erwosit neni a Daniel, “Elipi itoiu iyoŋ Akuj kon ŋina itiyanakini anakikinyoma!”

¹⁷ Aponi yaunae amoru togolokinoe nakituk ka adui, abu erwosit kipuc a ecoto nawae amoru ŋin, ido kiwuak emacar ŋolo a ekaboboot keŋ ka ŋimacarin a ŋikabobooe a ŋikapolok a ŋulu epukatotor iŋes ikotere nyiŋarak idiotuŋanan Daniel anatyonis a ŋina ayakar.

¹⁸ Toboŋo nai erwosit lore keŋ ŋolo ka apukan, kiboi akuwar daadaŋ iredakinit akiron, mam akimuj aponi yaunae neni keŋ, abu kikoler iŋes nakwaare.

Toiunae Daniel aloŋatunyo

¹⁹ Ani iwalari akwap, todilok erwosit, kiwonyak nadui a ŋiŋatunyo.

²⁰ Ani eapiyari iŋes nadui neni ayai Daniel, kiworou a etoil a ŋolo eyaloloŋi enyarit Daniel ebala, “Okoe Daniel, eketiyan a Akuj a ŋina eyari, ikiu iyoŋ Akuj kon ŋina itiyanakini iyoŋ anakikinyoma a? Ikiu iŋes iyoŋ aneni a ŋiŋatunyo a?”

²¹ Tema nai Daniel neni a erwosit, “Okoe erwosit, iboi iyoŋ ŋikaru ka ŋikaru!

²² Abu Akuj kaŋ kiyaku emalaika keŋ ŋolo abu togol ŋakituka a ŋiŋatunyo, ikotere nyakanyama ikes ayoŋ, anerae abu Akuj kaŋ toryamu atemar mam asecit etiyat ayoŋ aneni keŋ ka aneni kon daŋ, okoe erwosit, mam aronis etiyat ayoŋ.”

²³ Tolakar nai erwosit nooi, tolimok ŋituŋa atemar tolemunae Daniel anadui a ŋiŋatunyo. Aŋun aponi tolemunae Daniel anadui, mam nyeryamuna aneni keŋ tari iwadio daŋ ewanan, anerae abu iŋes kikinyom Akuj keŋ.

²⁴ Abu erwosit tolimu atemar yaunae ŋikilyok daadaŋ ŋulu esitakinito Daniel ka aponi yaunae ŋikilyok ŋulu esitakinito Daniel, ido aponi kimasakinae ikes nadui a ŋiŋatunyo, ikes ka ŋaberu kec ka ŋidwe kec. Ani eriŋa ikes nyedo kwap neni aya ŋiŋatunyo, apotu ŋiŋatunyo kilout ikes tobilibiliyasi ŋakoyo kec.

²⁵ Ekaku aŋun, abu Darius kigirak abaruwa neni a ŋituŋa a ŋakwapin a daadaŋ ka nakwapin daadaŋ ka ŋuna irworosi ŋaŋajepa ŋuna egelegelya tema neni kec, “Elipi toryamut iyes ekisil!

²⁶ Atub ayoŋ ŋakiro atemar alotooma akwap ŋina epukat ayoŋ daadaŋ, itemokino ŋituŋa tomarana ka kitopoloosi Akuj a Daniel, anerae erae iŋes Akuj ŋina eyari, ŋina iboi ŋikaru ka ŋikaru. Mam ituŋanan inyasuni apukan keŋ, ka nyesaluni apukan keŋ.

²⁷ Ikilakuni iŋes ka ikiuni, itiyae iŋes ŋakujuwuanisya ka ŋaumonokineta anakuj ka anakwap; anerae aiu iŋes Daniel anapedor a ŋiŋatunyo.”

²⁸ Aŋun, aponi Daniel torubakinae itopoloonoritae alorwa a ŋulu epukator Darius ka alorwa a ŋulu epukator Cirus Eperisianait.