Dan. 10 - Ebaibul

Ediŋet a ŋakwapin ka ŋapedorosyo ŋuna anakuj

¹ Alokaru a ŋolo a ŋiuni ipukat erwosit Cirus ŋolo a Perisia aponi kisileerekinoe akirot neni a Daniel a ŋolo anyaritae Belitesasar. Arae akirot ŋin ŋina a kire, arae akirot ŋina ke ejie a ŋolo apolon. Abu Daniel toyenu akirot ŋin kedau aryamun ayenun ŋakiro anakisileerekinet.

² Apaki ŋin, aris kedol ŋisabito ŋiuni egworo ayoŋ.

³ Alosabito a ŋul, nyimuja ayoŋ ŋamuja ŋuna ajokak, nyenyama ayoŋ akiriŋ, kori nyemata ayoŋ epiini, nyiwosakina ayoŋ akimyet adio nakuwan kaŋ.

⁴ Ani edoli ŋirwa ke elap ŋatomoniarei ka ŋiomwon elap ŋolo ke epei apaki ŋina awuar ayoŋ alokipetot a aŋolol a ŋina apolon nooi (iŋes Tigris),

⁵ abu ayoŋ ereo kidiama, eŋolik ekile ŋolo anapit ŋilowi ŋulu amilimilak, tonapite anacir akoroba ŋina etiyaunitae a egolid a ŋolo alo Upas.

⁶ Ekwaan akuwan keŋ ka amoru ŋina enyaŋiyarit ŋina enyaritae Karisolite, acai ereet keŋ ekwaan ka akimilyaunet, anepete ŋakonyen keŋ ekwaan ka ŋatocyo ŋuna enepete, acayete ŋakan ka ŋakejen keŋ ekwaan ka eburonis ŋolo apwasitae ejok ka erurumae etoil keŋ ekwaan ka ŋitoilon a ŋituŋa a ŋulu alalak.

⁷ Ayoŋ bon abu eŋolik akisileerekinet, nyiŋolikina ŋituŋa ŋulu ikirukitor ayoŋ akisileerekinet ŋin, tari daŋ ŋina abunio tobul ikes nooi, tosodi apotu toema ka apotu toŋopa.

⁸ Aŋun, abu ayoŋ edoŋ bon, ikotere eŋolikini akisileerekinet ŋina etubulon ŋin. Abu agogoŋu todaun aneni kaŋ, kilocokin etakane kaŋ, tolilimiyo akuwan kaŋ.

⁹ Abu nai eira etoil, ani eirari ayoŋ ŋakiro ŋuna erworo ekile ŋol, apotu ŋajo ekekamut ayoŋ ojotoor nooi, oper ayoŋ alokwap abuburiyara.

¹⁰ Abu nai akan okotap ayoŋ, ido eketonyou ayoŋ alokwap, edoŋ ayoŋ nen alyat a ŋakan ka ŋakuŋin, omarani.

¹¹ Kirworik nai emalaika neni kaŋ tema, “Okoe Daniel irae iyoŋ ituŋanan ŋini ikimina Akuj nooi, topupok ejok ŋakiro ŋuna alosi ayoŋ alimokin iyoŋ. Towo, anerae ekeyakuunitae ayoŋ neni kon.” Ani eriŋa emalaika irworo neni kaŋ, abu ayoŋ onyou owo amarani.

¹² Tema iŋes neni kaŋ, “Daniel nyikuryaniar, anerae ameun akoloŋit ŋina esyaunan ŋina icamunia iyoŋ akitiditeun bon alokiŋaren Akuj ikotere iryamuni ayenut ŋakiro, eirar ŋakiro kon, ido abunit ayoŋ aŋuna a ŋakiro kon.

¹³ Nai alotooma ŋirwa ŋatomoniarei ke epei, abu emalaika ŋolo epolokinit apukan ŋina a Perisia eketepeg ayoŋ; nai abu Mikael, epei a ŋikapolokinitok ŋimalaikan, ekeŋarak ayoŋ, ido abu ayoŋ emyek iŋes aina kaapei ka emalaika ŋolo epolokinit apukan ŋina a Perisia,

¹⁴ ido abu ayoŋ neni kon akiŋarakin iyoŋ toyenu ŋakiro ŋuna epote akitiyakin neni a ŋituŋa kon alorwa a ŋulu esidyok, anerae eyai akisileerekinet ace aŋuna a ŋirwa a ŋul.”

¹⁵ Ani eriŋa iŋes irworo ŋakiro ŋun neni kaŋ, abu ayoŋ ejuuru eliliŋ cek.

¹⁶ Tosodi a nen, abu emalaika ŋolo esibit ituŋanan okotap ayoŋ ŋipon, ido abu ayoŋ oŋaa akituk kaŋ ikotere erworikini, olimok nai ayoŋ ŋolo awoi alodiyete kaŋ otema, “Ekapolon kaŋ, ekeilosi ayoŋ ŋakiro ŋuna ka akisileerekinet a ŋina abu ayoŋ eŋolik, ido adaun agogoŋ aneni kaŋ.

¹⁷ Ekapolon kaŋ, ekokini ayoŋ eketiyan kon ikirworo ka iyoŋ a? Anerae amarani ayoŋ, adaun agogoŋu aneni kaŋ ka eeŋa ayoŋ etedukae.”

¹⁸ “Abu nabo emalaika ŋolo asibit ituŋanan okotap ayoŋ, tosodi eketogogoŋ ayoŋ.”

¹⁹ Tema iŋes neni kaŋ, “Nyikuryaniar, irae iyoŋ ituŋanan ŋini ikimina Akuj nooi, mam ŋace etakanunete neni kon. Togogoŋior ka totitinyor!” Ani irworikini iŋes neni kaŋ, abu ayoŋ ogogoŋior otema, “Kirworik Ekapolon kaŋ, anerae ikitogogoŋ iyoŋ ayoŋ.”

²⁰ Tema nai emalaika neni kaŋ, “Iyeni iyoŋ ŋakiro ŋuna abunitor ayoŋ neni kon a? Emaikina tokona ayoŋ oboŋo akitijiore emalaika ŋolo epolokinit apukan ŋina a Perisia, ani elouni ayoŋ iŋes, ebuni emalaika ŋolo epolokinit akwap ŋina ka Akaia.

²¹ Nai akalimokini ayoŋ iyoŋ ŋakiro ŋuna igiritae lokitaabo ŋolo a ŋakiro a ŋuna a kire. Mam ice ekeŋarakini ayoŋ akitijiore ŋikapolok ŋul mati Mikael bon ŋolo erae ekapolon kon.”