Dan. 1 - Ebaibul

Ŋisirael ŋiomwon ŋulusorok ŋulu aya nalapatu ŋina alo kai ka apukan a Babilon

¹ Alokaru a ŋolo a ŋiuni erae Jeoiakim erwosit ŋolo a Yudaya, abu Nebukadinesar erwosit a Babilon bu Yerusalem kirikau.

² Abu Ekapolon inak Jeoiakim erwosit a Yudaya napedor a erwosit a Babilon, inak tari ŋiboro ŋulu esitiyao alo Kai ka Akuj. Abu Nebukadinesar ya ikes nakwap ŋina a Sinar, kiwuak ŋiboro ŋul kai ŋina eŋadao abaru a ŋakujo keŋ.

³ Tolimok nai erwosit a Babilon Asipenes ŋolo apolokinit akai ŋina ka apukan ayaun Ŋisirael ŋidi ŋulu arae ŋulu ke ekal a erwosit ka ŋulu arae ŋulu a ŋikalya a ŋikapolok,

⁴ ŋikilyok ŋulusorok, ŋulu emam neni eŋwalit, ŋulu ebusak, ŋulu apiiryanak anaosou a daadaŋ, ŋulu epatana aryamun aosou ka ayenut itatamio ka ŋulu epedorito akitiya kai a erwosit, emaikina kitatamae ikes akigir ka akisyom ŋakiro ŋuna igiritae a ŋajep a Ŋibabiloniyae.

⁵ Abu erwosit tolimu atemar inanakinetei ikes akimuj ŋina imuji erwosit ka epiini ŋolo emasi erwosit. Emaikina kitatamae ikes ŋikaru ŋiuni, ikotere ani edaun apaki ŋin yaunae ikes akitiya aŋuna a erwosit.

⁶ Alotuŋa a ŋulu aponi toseunae, ayakasi Daniel, Anania, Misael ka Asaria ŋulu arae ŋulu alokabila a Yuda.

⁷ Abu nai Ekapolokiniton akai ŋina ka apukan tolimonok ikes ŋirorwa ŋice: Tolimok Daniel ekiro Belitesasar, tolimok Anania ekiro Sadirak, tolimok Misael, ekiro Mesak ka tolimok Asaria ekiro Abedinego.

⁸ Nai abu Daniel toseu atemar nyemunaar iŋes anakimuj ŋamuja a erwosit, kori anakimat epiini ŋolo a erwosit; aŋun, abu kiŋit ekapolokiniton akai a apukan akimyekin iŋes nyemunaa akuwan keŋ.

⁹ Abu Akuj inak Daniel toryamu ajokis ka akisyonio aneni a ekapolon akai a apukan.

¹⁰ Tema ekapolokiniton akai a apukan neni a Daniel ebe, “Akabulit ayoŋ aŋuna a ekapolon erwosit, adau iŋes aseun akimuj ka ŋimaten kon, ido ani kikiŋolik iŋes iyoŋ pa ejok akuwan lopite ŋolo ejokyata ŋawat a ŋisorok a ŋulu erae ŋikesa kon, ikipwakakini iyoŋ ayoŋ atwanare.”

¹¹ Aŋun, tolimok Daniel ekapolokiniton akai a apukan ŋolo eyoki Daniel, Anania, Misael ka Asaria tema,

¹² “Ekelipit ayoŋ iyoŋ atemar kikatak ŋiketiyak kon alotooma ŋirwa ŋitomon, kimyek ikiinakin isua edia bon kimujae ka ŋakipi tomatae,

¹³ ekaku aŋun, kisikwaanik ŋawat kosi ka ŋuna a ŋulu imujete akimuj ŋina a erwosit, ido nai kitiya neni a ŋiketiyak kon ŋuna iitana kidau ayenun epite ŋolo eyakatar ŋawat kosi.”

¹⁴ Abu nai ekile ŋolo ewuakinitae akitere ŋisorok ŋul tocamu akikatakin ikes alotooma ŋirwa ŋitomon.

¹⁵ Ekaku a ŋirwa a ŋitomon aponi kiŋolikinae ŋawat ata Daniel erae ŋuna ajokak ka etumito daadaŋ akilo ŋuna a ŋisorok a ŋulu emujete akimuj a erwosit.

¹⁶ Aŋun, abu ekeyokon ata Daniel tojoŋo ainanakin ikes akimuj ŋina a erwosit ka epiini ŋolo a erwosit, ido abu inanak ikes edia.

¹⁷ Abu Akuj inak ŋisorok ŋuluomwon ŋul aosou ka apiiryanut ayenun ŋakiro ŋuna egiritae lokitaaboi ka ayenun anaosou; abu daŋ Daniel toryamu ayenut ŋina kisileereununeet ŋakitoodyanakineta daadaŋ ka ŋakirujaeta.

¹⁸ Ekaku a ŋikaru a ŋiuni a ŋulu sek atubunit erwosit atemar kiboiyoto ikes eriŋa nyeyauna neni keŋ, abu ekapolokiniton akai a erwosit ya ŋisorok ŋul neni a Nebukadinesar,

¹⁹ ido abu erwosit kirwor neni kec. Mam alokidiŋ ŋisorok ŋul daadaŋ ŋini ekwaan erwor ka ŋolo a Daniel, Anania, Misael ka Asaria; aŋun, aponi ikes yaarae akiboi lore a erwosit.

²⁰ Anakiro a daadaŋ ka aosou ta anayenut daadaŋ ŋuna iŋisi erwosit ikes, abu erwosit toryamu atemar eloito ikes nooi ŋarwa ŋatomon ŋimurok ŋulu edwarete daadaŋ ka ŋimurok ŋulu a akwap keŋ.

²¹ Abu Daniel torubak iboi alokai a erwosit akitodol ekaru ŋolo esyaunan erae Cirus erwosit.