Awos. 7 - Ebaibul

¹ Tema nai Ekapolon neni a Moses, “Kiira, ekesikokini ayoŋ iyoŋ irworo Akuj aneni a Parao, ido eruwor lokaato kon Aron irwori aŋuna kon ikwa ekadwaran.

² Irwori iyoŋ ŋakiro daadaŋ ŋuna ekecikak ayoŋ iyoŋ, ikotere lokaato kon Aron elimokini Parao kimyek Ŋisirael toloto anakwap a Ijipit.

³ Nai eturuwori ayoŋ iŋes ŋolo egogoŋ akou, ido etiyakini ayoŋ ŋakujuwuanisya ka ŋaumonokineta ŋuna alalak nakwap a Ijipit.

⁴ Ani pa kiira Parao ŋakiro kon, atiŋi ayoŋ Ijipit neni aronon, ido oyau Ŋisirael ŋituŋa kaŋ a nen a ŋatukon esibit ajore, tolomut anakwap Ijipit anapedor kaŋ a ŋina apolon, a ŋina esicania Ijipit.

⁵ Eyenunete Ŋijipitian atemar arae ayoŋ Ekapolon apaki ŋina esicania ayoŋ ŋituŋa a Ijipit, ido oyau Ŋisirael a nen anakwap a Ijipit.”

⁶ Aŋun, apotu Moses ka Aron kitiyata ŋuna ecikit Akuj ikes akitiya.

⁷ Arae ŋikaru a Moses ŋatomonikanikauni ka arae ŋikaru ka Aron ŋatomonikanikauni ka ŋiuni apaki ŋina esirworyata ikes Parao.

Ebela ŋolo ka Aron

⁸ Tema Ekapolon neni a Moses ka Aron,

⁹ “Ani etemari Parao neni kus, ‘Kitiyakisi aumokinet adio,’ emaikina nai iyoŋ Moses tolimok Aron ebe, ‘Tolemu ebela kon kimasak kwap kiŋaren a Parao, ido ilocokin ebela ŋol eruwor emun. ’”

¹⁰ Aŋun, apotu Moses ka Aron toloto neni a Parao, kitiyata ikwapei ecikitor Ekapolon ikes; abu Aron kimasak ebela keŋ kwap kiŋaren a Parao ka ŋulu apolok anapukan keŋ, ido abu ebela ŋol kilocokin toruwor emun.

¹¹ Ekaku a ŋun, abu Parao tonyarau ŋikaosok ka ŋikekukujak, ido apotu ŋikekukujak a Ijipit daŋ kitiyata ŋakujuwuanisya ŋuna pei ŋun aloticisyo kec a ŋulu pa apatana ayenun.

¹² Abu ŋinituŋanan alotooma kec kimasak ebela keŋ kwap, ido apotu toruworos ŋimuno, nai abu ŋolo ka Aron kiliko ŋulu kec.

¹³ Tari ŋina aponiata ŋakiro kikokis nen, abu Parao kitogogoŋ akou keŋ, nyepupok ŋakiro ata Moses, lopite ŋolo alimokinitor Ekapolon ikes.

Akisicanet ŋina esyaunan: Toruworos ŋakipi ŋaokot

¹⁴ Abu nai Ekapolon tema neni a Moses, “Etogogoŋ Parao akou keŋ; ewounit akimyekin Ŋisirael toloto.

¹⁵ Ape neni a Parao moi eriŋa ataparacu, apaki ŋina elomarya iŋes kiŋa nakipi; a aŋolol Nile; emaikina iyoŋ towo alokipetot ka aŋolol Nile kiryamunos ka iŋes nen ka emaikina iyoŋ totiŋ ebela kon ŋolo abu kilocokin toruwor emun.

¹⁶ Tema iyoŋ neni keŋ, ‘ekeyakuu ayoŋ Ekapolon Akuj a Ŋiburaniyae neni kon alimokin iyoŋ atemar kimyek ŋituŋa kaŋ toloto, ikotere ilipete neni kaŋ analoŋisat nai tari tokona iwou iyoŋ akiirar ŋakiro ŋun.’

¹⁷ Ŋakiro ŋuna irworo Ekapolon ikes nu: Iyenuni iyoŋ atemar erae iŋes Ekapolon anakiro a nu; kiŋolik, arami ayoŋ ŋakipi a Nile a ebela alo a ŋolo atiŋit, ido eruwor ŋakipi ŋaokot.

¹⁸ Etwakete ŋikolya anaŋolol daadaŋ, ido ebosuni aŋolol tul, nyepedorete Ŋijipitian akimat ŋakipi a Nile nabo.”

¹⁹ Tema Ekapolon neni a Moses, “Tolimok Aron ebe, ‘Ya ebela kon toramya ŋakipi ŋuna eya Ijipit: Ŋakipi a ŋaŋololin, ŋakipi a ŋakitelesyo, ŋakipi a ŋataparin ka ŋuna a ŋakare daadaŋ, ikotere ŋakipi ŋun daadaŋ toruwor ŋaokot. Epete ŋaokot neni eya ŋakipi anakwap a Ijipit daadaŋ, epete tari loboro ŋulu itiyaunitae a ŋakito ka a ŋamoru.’ ”

²⁰ Apotu Moses ka Aron kitiyata ŋun lopite ŋolo ecikitor ikes Ekapolon. Abu Aron kikyaa ebela keŋ alokiŋaren Parao ka ŋulu apolok anapukan keŋ, toram ŋakipi a aŋolol Nile, ido apotu ŋakipi daadaŋ anaŋolol toruworos ŋaokot.

²¹ Totwaka ŋikolya anaŋolol. Tobosut ŋakipi anaŋolol tul, todaun Ŋijipitian epite ŋolomaset ŋakipi ŋun. Apotu ŋaokot toyakaun nakwap a Ijipit daadaŋ.

²² Nai apotu ŋikekukujak a Ijipit daŋ kitiyata ŋakujuwuanisya ŋunapei ŋun aloticisyo kec a ŋulu pa apatana ayenun. Aŋun, abu Parao kitogogoŋ akou keŋ nyepupok ŋakiro ata Moses, lopite ŋolo alimokinitor Ekapolon ikes.

²³ Abu Parao toboŋo a nen, tolot kai keŋ, ido abu nyemitak tari ŋakiro ŋun daŋ alotau keŋ.

²⁴ Apotu nai Ŋijipitian daadaŋ toboka ŋakare nawaetin a aŋolol Nile aŋuna ka aryamunia ŋakipi ŋunamatan, anerae pa apedorito ikes akimat ŋakipi ŋuna aya naŋolol.

²⁵ Apotu ŋirwa ŋikanikaarei tolunyar akisyakin anakoloŋit a ŋina eturuworia Ekapolon ŋakipi a Nile ŋaokot.