Awos. 6 - Ebaibul

Kiikinae Ŋisirael alakuno

¹ Tema nai Ekapolon neni a Moses, “Iŋolikini tokona iyoŋ ŋuna etiyakini ayoŋ neni a Parao: Kire jik, areikini ayoŋ iŋes kimyek ŋituŋa kaŋ toloto, kire areikini ayoŋ iŋes kirita ŋituŋa kaŋ torotokis anakwap keŋ.”

² Kirwor daŋ Akuj neni a Moses tema, “Arae ayoŋ Ekapolon.

³ Abu ayoŋ otakanu neni ka Aburaam, Isaka ka Yakob ikwapei Akuj ŋina Etiron, nai alokiro kaŋ a ŋolo enyaritae ‘Arae Ayoŋ ŋina Arae Ayoŋ’ abu ayoŋ nyeteyenikin ikes.

⁴ Abu daŋ ayoŋ ewuak Acamunet kaŋ ka ikes, iŋes ainakin ikes akwap ŋina a Kanaan, akwap ŋina eboitotor ikes erae ŋigelaanotin.

⁵ Adau daŋ ayoŋ akiirar akigworo a Ŋisirael a ŋulu etiŋitae alo Ijipit erae ŋipi, ido atamu ayoŋ Acamunet kaŋ ka ikes.

⁶ Aŋun, ape tolimok Ŋisirael ebe, ‘Arae ayoŋ Ekapolon, akalakuni ayoŋ iyes anakisicaneta a Ŋijipitian, akalakuni ayoŋ iyes anapitoonut aneni kec. Akalakuni ayoŋ iyes a apedor kaŋ ka esicani ayoŋ ikes nooi.

⁷ Akayai ayoŋ iyes irae ŋituŋa kaŋ ka aruwor ayoŋ Akuj kus. Iyenunete iyes atemar arae ayoŋ Ekapolon Akuj kus, ŋolo akalaku iyes anakisicaneta a Ŋijipitian.

⁸ Akayauni ayoŋ iyes nakwap ŋina abu ayoŋ ekoŋ ainakin Aburaam, Isaka ka Yakob; akainakini ayoŋ iyes akwap ŋin toruwor ŋina kus. Arae ayoŋ Ekapolon.’ ”

⁹ Abu nai Moses tolimok Ŋisirael ŋakiro ŋun, nai apotu ikes nyepupokis ŋuna abala Moses aŋuna abunio akigeno todaun aneni kec ka aŋuna ke epite a ŋolo ka apitoonut kec a ŋina esicanitere ikes nooi.

¹⁰ Tema nai Ekapolon neni a Moses,

¹¹ “Ape, tolimok Parao erwosit ŋolo a Ijipit kimyek Ŋisirael torotokis anakwap keŋ.”

¹² Abu nai Moses kiŋit Ekapolon tema, “Ani nai kewounito Ŋisirael apupokin ŋakiro kaŋ, alipite nai epupokinia Parao ŋakiro kaŋ a ŋolo nyayeni erwor ejok?”

¹³ Kicik nai Ekapolon Moses ka Aron tema, “Tolimokisi Ŋisirael ka Parao erwosit ŋolo a Ijipit atemar akalimok ayoŋ iyes akiya Ŋisirael anakwap a Ijipit.”

Ŋirorwa a ŋituŋa a ekal a Moses ka Aron

¹⁴ Ruben iŋes lokoku a Yakob ŋolo kiyae, ayakar Ruben ŋidwe ŋulusapa lu: Anok, Palu, Esiron ka Karimi, arae ŋul ŋituŋa a ekal a Ruben.

¹⁵ Ŋidwe a Simeon ŋulusapa lu: Yemuel, Yamin, Oad, Yakin, Soar ka Saul ŋolo arae aberu ŋina alo Kanaan auruuni. Arae ŋulu ŋituŋa a ekal a Simeon.

¹⁶ Ŋulu etupakinete erae ŋirorwa a ŋidwe a Lepi a ŋulusapa ameun aneni a ŋolo kiyae: Gerison, Koas ka Merari. Arae ŋikaru a Lepi daadaŋ amiat ka ŋatomoniuni ka ŋikanikaarei ekaku ŋikaru ŋul, totwan.

¹⁷ Ŋidwe a Gerison ŋulusapa lu imarunitae a ŋikalya kec: Libini ka Simei.

¹⁸ Ŋidwe a Koas ŋulusapa lu Amiram, Isiar, Eburon ka Usiel. Arae ŋikaru a Koas daadaŋ amiat ka ŋatomoniuni ka ŋiuni ekaku a ŋikaru a ŋul, totwan.

¹⁹ Ŋidwe a Merari ŋulusapa lu: Mali ka Musi ŋituŋa a ekal a Lepi ŋul.

²⁰ Abu Amiram kiit nakaato a papa keŋ ŋina anyaritae Yokebed, ŋina abu touru Aron ka Moses. Arae ŋikaru ka Amiram daadaŋ amiat ka ŋatomoniuni ka ŋikanikaarei ekaku a ŋikaru a ŋul, totwan.

²¹ Ŋidwe a Isiar ŋulusapa lu: Kora, Nepeg ka Sikiri.

²² Ŋidwe a Usiel ŋulusapa lu: Misael, Elisapan ka Sisiri.

²³ Abu Aron kiit Eliseba nakoku ka Aminadab, nakaato a Nason. Touru Eliseba Nadab, Abiu, Eleasar ka Isamar.

²⁴ Ŋidwe a Kora ŋulusapa lu: Asir, Elikana ka Abiasap. Arae ŋul ŋituŋa a ekal a Kora.

²⁵ Abu lokoku ka Aron ŋolo anyaritae Eleasar kiit nakoku a Putiel ŋina abu touru Pineas. Arae ŋul ŋituŋa a ekal a Lepi a ŋatekerin kec.

²⁶ Arae Aron ŋolopei ŋol ka Moses abu Ekapolon tolimok ebe, “Yautu Ŋisirael anakwap a Ijipit elosete a ŋatukon esibit ŋajoresyo.”

²⁷ Arae ikes apotu kirworo neni a Parao a erwosit a Ijipit ŋakiro ŋuna ka ayaar Ŋisirael anakwap a Ijipit.

Kiwuapa Moses ka Aron ŋakiciketa ka Akuj

²⁸ Apei koloŋit, abu Ekapolon kirwor neni a Moses anakwap a Ijipit,

²⁹ tema, “Arae ayoŋ Ekapolon; tolimok Parao erwosit ŋolo a Ijipit ŋakiro daadaŋ ŋuna abuni ayoŋ alimokin iyoŋ.”

³⁰ Nai abu Moses alokiŋaren Ekapolon kiŋit iŋes tema, “Ikwapei ayenia ayoŋ atemar nyerworo ayoŋ ejok, alipite nai epupokinia Parao ŋakiro kaŋ?”