Awos. 40 - Ebaibul

Todukokinae Eema ŋolo iryamununoi, ido kiwuakinae ŋiboro keŋ

¹ Tema nai Ekapolon neni a Moses,

² “Ani edoli ŋirwa ke elap epei, elap ŋolo esyaunan, emaikina iyoŋ todukok Eema ŋolo iryamununoi.

³ Kiwuak tooma keŋ Asaduku ŋina ka Acamunet, kiriwok anaŋga kidiŋ Eema ŋol kiteriboo Asaduku ŋina ka Acamunet.

⁴ Emaikina iyau tooma Eema ŋol emesa, ido kiwuak ŋiboro keŋ kidiama keŋ, yau nen awoet ŋina a ŋitaae, kidokok nen ŋitaae.

⁵ Kiwuak Namuroet ŋina itiyaunitae ke egolid bon ŋina icunyere ekinyate kiŋaren Asaduku ŋina ka Acamunet, ido kiwuak anaŋga ŋina ke epuke ke Eema a ŋolo iryamununoi lopuke.

⁶ Kiwuak Namuroet ŋina epeyere ŋainakineta kiŋaren epuke ŋolo ke Eema a ŋolo iryamununoi,

⁷ ido kiwuak abesen kidiŋ Namuroet ka Eema ŋolo iiryamununosi ŋituŋa, kiwuak ŋakipi nabesen ŋin.

⁸ Todukok alapatu kiŋa Eema ŋol kiryam, ido kiwuak anaŋga lopuke ŋolo ka a alapatu a ŋin.

⁹ Tolemu nai akimyet ŋina ke etal, kiosya Eema ka ŋiboro ŋulu aya tooma keŋ daadaŋ, kitaleu Eema ka ŋiboro ŋulu aya nen daadaŋ, ikotere Eema eruwor ŋolo eseg.

¹⁰ Emaikina iyoŋ kios ka akimyet tari Namuroet ŋina epeyere ŋainakineta ka kios ŋiboro keŋ daadaŋ, kitaleu Namuroet, ikotere eruwor ŋina eseg nooi.

¹¹ Emaikina iyoŋ kios ka akimyet tari abesen ka awoet keŋ, kitaleu iŋes.

¹² Ani irikakin, iyau Aron ka ŋidwe keŋ ŋulusapa lopuke ŋolo ke Eema a ŋolo iiryamununosi ŋituŋa, kiloŋa ikes a ŋakipi a nen.

¹³ Kitanapik Aron ŋilowi ŋulu ke etal a nen, ido kiosak akimyet neni keŋ, kitaleu iŋes, ikotere eketiyanak ayoŋ ikwapei esacaradoti.

¹⁴ Iyau ŋidwe keŋ daŋ ŋulusapa, kitanapik ŋisatyo,

¹⁵ ido kiosak akimyet neni kec lopite ŋolo ibunio kiosakinia neni a papa kec, ikotere ikes eketiyanakis ayoŋ ikwapei ŋisacaradotin. Akiosakino kec akimyet ŋin, ituruwori ikes ŋisacaradotin ka eruwor ŋiletok kec ananyameta daadaŋ ŋisacaradotin.”

¹⁶ Abu Moses kitiya ibore daadaŋ lopite ŋolo ecikitor Ekapolon iŋes.

¹⁷ Ani edoli ŋirwa ke elap epei, elap ŋolo ke epei alokaru a ŋolo a ŋiarei kelomut Ŋisirael alo Ijipit, toris kirikakin akiduk Eema ŋolo iryamununoi.

¹⁸ Abu Moses todukok Eema ŋolo iryamununoi; kiwuak kwap keŋ ŋakito ŋuna epesyo, todukok ŋakito ŋuna esiposi ka ŋalodoi, ido tosipok ŋipirin.

¹⁹ Kiwuak nai ŋanaŋgae kidiama ŋakito ke Eema a ŋolo iryamununoi, ido kiwuak ŋijamu ŋulu adaitae kidiama Eema ŋol, lopite ŋolo ecikitor Ekapolon iŋes.

²⁰ Tolemu Moses ŋamoru ŋunadapal ŋunaarei; kiwuak tooma Asaduku ŋina ka Acamunet. Kirepak ŋipirin neni aorori asibit ŋikabobooe a Nasaduku, ido torapak akibois ŋina a akisyonio kidiama Asaduku ŋina ka Acamunet.

²¹ Ani kirikak ŋun, abu yau Asaduku ŋina ka Acamunet tooma Eema ŋolo iryamununoi, ido kiwuak anaŋga ŋina eteriboorit Asaduku ŋin. Aŋun, abu iŋes kiteriboiyo ka anaŋga Asaduku ŋina ka Acamunet, lopite ŋolo ecikitor Ekapolon iŋes.

²² Kiwuak iŋes emesa lowae ŋolo elipyata ŋituŋa alotooma Eema; alowae a ŋolo alo Kuju alaalo anaŋga,

²³ ido kiwuak amugati ŋina ka ayakau ke Ekapolon kidiama emesa, lopite ŋolo ecikitor Ekapolon iŋes.

²⁴ Kiwuak Moses awoet ŋina ke etaa tooma Eema ŋolo eeryamununosi ŋituŋa, kitekinos ke emesa alowae a ŋolo alo Kwap alotooma Eema.

²⁵ Kinokak iŋes ŋitaae alokiŋaren Ekapolon; lopite ŋolo ecikitor Ekapolon iŋes.

²⁶ Kiwuak Namuroet ŋina arae egolid bon etiyaunitere tooma Eema ŋolo iryamununoi alaalo anaŋga,

²⁷ ido kicunyak alokidiama Namuroet ekinyate ŋolo akukunyon; lopite ŋolo ecikitor Ekapolon iŋes.

²⁸ Abu daŋ Moses kinenek anaŋga lopuke ŋolo ke Eema a ŋolo iryamununoi.

²⁹ Kiwuak Namuroet ŋina epeyere ŋainakineta lopuke ŋolo ke Eema a ŋolo iryamununoi, ido kiwuak nen ŋainakineta ŋuna epeyo ka ŋikinyom ŋulu arae ainakinet, lopite ŋolo ecikitor Ekapolon iŋes.

³⁰ Kiwuak Moses abesen kidiŋ Eema ŋolo iryamununoi ka Namuroet, ido kiwuak ŋakipi nabesen ŋin aŋuna ka akiloŋar,

³¹ ido apotu Moses ka Aron ta ŋidwe ka Aron ŋulusapa kisitiyata ŋakipi ŋun akilotarya ŋakan ka ŋakejen kec.

³² Elotanarete ikes ŋakan ka ŋakejen kec a nen apaki ŋina elomaryata tooma Eema ŋolo iryamununoi, kori apaki ŋina elosyoto Namuroet; arae ŋun ŋuna ecikit Ekapolon Moses akitiya.

³³ Todukok nai Moses alapatu ŋina alokiŋa Eema ŋolo iryamununoi ka Namuroet kiryam, ido kinenek anaŋga lopuke ŋolo ka alapatu a ŋin. Alopite a ŋol, abu Moses kirikak etic daadaŋ.

Kimuko edou Eema ŋolo iryamununoi

³⁴ Ekaku, kimuko edou Eema ŋolo iryamununoi, kilelebikin akica ŋina ke Ekapolon ŋina akwaŋan kya tooma Eema ŋolo iryamununoi.

³⁵ Todaun Moses epite ŋolo elomarya tooma Eema ŋol, anerae abu edou kimuko Eema ŋol ka abu akica ŋina ke Ekapolon kilelebikin tooma Eema ŋolo iryamununoi.

³⁶ Apaki daadaŋ ŋina ikyaaror edou aneni ayai Eema ŋolo iryamununoi, awotonokinete Ŋisirael a nen iwace;

³⁷ nai ani pa kikyaar edou aneni ayai Eema ŋolo iryamununoi, pa awotonokinete Ŋisirael a nen akitodol ŋina ikyaaror edou aneni ayai Eema ŋolo iryamununoi.

³⁸ Aŋun, emukit edou ŋolo ke Ekapolon Eema ŋolo iryamununoi naparan, ido etenepi Ekapolon akim alokidiama Eema ŋol nakwaare, iteete Ŋisirael daadaŋ ŋun alorwa a daadaŋ a ŋulu awosyata ikes.