Awos. 29 - Ebaibul

Akituruwor ŋisacaradotin

¹ “Ŋakiro ŋuna emaikina iyoŋ kitiya tokona ikes nu, kitale ikes kituruwo ŋisacaradotin, ikotere eketiyanakinete ayoŋ. Tolemu emoŋ epei ŋolosorokit ka ŋimeesekin ŋiarei, emaikina ŋibaren ŋul emam neni ewanan anawat kec, kori nyitoroniyaritae.

² Tolemu ŋakirya a ŋaganoi emam ŋakinyalet kitiyau ŋabopuloe ka ŋamugati igurokinit ka akimyet. Kitiyau daŋ ŋabisikotyo kiosak akimyet. Emaikina ŋun daadaŋ itiyaunitae a ŋakirya a ŋuna a ŋaganoi a ŋuna ajokak nooi.

³ Kiwuak ŋun daadaŋ lobukit epei, iya eyakasi nen, toramu emoŋ ka ŋimeesekin ŋul ŋiarei ikiinak ayoŋ ikwapei amuronot.

⁴ Kidau akitiya ŋun, yau Aron ka ŋidwe keŋ ŋulusapa lopuke ŋolo ke Eema a ŋolo iryamununoi ikes, kiloŋa ikes a nen a ŋakipi.

⁵ Ani kiloŋa kirikakin, tolemu ŋilowi kitanapik Aron esati ka ekaaso ŋolo enapeneneere arapet. Kitanapik nabo arapet, eboli ŋolo ka atorobu ka arokoba ŋina esiritoe ŋina eenitere arapet anacir.

⁶ Kitanapik akopiya nakou, todapak ebokot ŋolo asegan nakopiya.

⁷ Kidau akitanap, tolemu akimyet ŋina ke etal tobukok nakou keŋ, kitaleu iŋes.

⁸ Ani irikakini, yau ŋidwe keŋ ŋulusapa, kitanapik ŋisatyo,

⁹ toenik nai nacirin kec ŋarokobae, ido kiwuak nakyes kec ŋakopiyae, toruworos ikes ŋisacaradotin. Epite ŋol iŋes ituruworya iyoŋ Aron ka ŋidwe keŋ ŋulusapa ŋisacaradotin, eruwor asacaradotonu etal a ŋiletok ka Aron ŋoloruba.

¹⁰ “Emaikina iyoŋ tomyaa emoŋ kiŋaren Eema ŋolo iryamununoi, ido kimyek Aron ka ŋidwe keŋ ŋulusapa kidokokis ŋakan kec nakou ke emoŋ.

¹¹ Ani edaun ŋun, itemokino nai iyoŋ toar emoŋ alokiŋaren Ekapolon, alopuke ke Eema a ŋolo iryamununoi.

¹² Emaikina iyoŋ tolemu ŋaokot ke emoŋ ŋadi iya kiosak ke ekimoin kon neni esibit ŋamomwar a Namuroet, ido tobukok ŋaokot ŋunace daadaŋ kwap Namuroet.

¹³ Tolemu asepwae daadaŋ ŋina a ŋiboro ka akook ŋatune ke emany ta ŋiŋalur daadaŋ ŋiarei erukito ka asepwae kec. Tope ŋul daadaŋ a Namuroet topuruut.

¹⁴ Nai akiriŋ, ejamu ka ŋikujit ke emoŋ, emaikina kicuny alokiŋa alomar, ikwapei ainakinet ŋina elemarere asecit.

¹⁵ “Ekaku a ŋun, tolemu emesek epei inak Aron ka ŋidwe keŋ ŋulusapa kidokokis ŋakan kec nakou a emesek.

¹⁶ Ani edaun ŋun, itemokino nai iyoŋ toar emesek, tolemu ŋaokot keŋ towuatak Namuroet ŋiwaetin daadaŋ.

¹⁷ Tosodi nai kileny emesek, kilota ŋiboro ka akook ka ŋimolokony, ido kimorik ka ŋinerin ka akuwan ŋuluce;

¹⁸ tope nai emesek daadaŋ alokidiama Namuroet, anerae erae iŋes ainakinet neni ke Ekapolon ŋina epeyo, ŋina ebob eure keŋ ka ŋina emaikina topeoi einakinio Ekapolon.

¹⁹ “Ekaku a ŋun, tolemu emesek, ŋoloce, yau Aron ka ŋidwe keŋ ŋulusapa kimyek ikes kidokokis ŋakan kec nakou a emesek.

²⁰ Ani irikakinete, toar emesek, ido tolemu ŋaokot ŋadi alomesek, kiosak lokabonibonit ka akit ka Aron a ŋina aloteten ta lokabonibon a ŋaki a ŋidwe keŋ a ŋulusapa ŋuna aloteten. Kiosak daŋ lomoyo a ŋakan kec ŋulu apolok ŋulu aloteten ka lomoyo a ŋakejen kec ŋulu apolok ŋulu aloteten. Ani irikakini akitiya ŋun, towuatak nai ŋaokot Namuroet ŋiwaetin daadaŋ.

²¹ Kedaun ŋun, tolemu ŋaokot ŋadi a Namuroet ka adiokimyet ŋina kiosa, towuatak neni ka Aron ka lolowi keŋ ta neni a ŋidwe keŋ a ŋulusapa ka lolowi kec. Epite ŋol iŋes eruworotor Aron ka ŋidwe keŋ ŋulusapa ta ŋilowi kec ŋulu italeuno.

²² “Emaikina daŋ iyoŋ tolemu asepwae ŋina a emesek, asonyok, asepwae ŋina a ŋiboro ka akook, ŋatune ŋuna ke emany, ŋiŋalur ŋuluarei, kaapei ka asepwae kec ka amuro ŋina aloteten. (Erae emesek ŋol ŋolo ituruworere ituŋanan esacaradoti).

²³ Tolemu alobukit a ŋolo a ŋamugati a ŋuna emam ŋakinyalet, a ŋolo iwuakinitae kiŋaren Ekapolon abopulo, amugati ŋina ipounitoe ka akimyet ka tolemu abisikot;

²⁴ kiwuak ŋiboro ŋul daadaŋ nakan ka Aron ka nakan a ŋidwe keŋ a ŋulusapa, kikyaa kidiama iinakini ikes, toruworos ainakinet ŋina ikyaaritae alokiŋaren Ekapolon.

²⁵ Ani edaun ŋun, kijau aneni kec, ido tope idokokinit kidiama ainakinet ŋinace ŋina epeyo a Namuroet; ŋina emaikina epeitoe einakinio Ekapolon, ŋina ebob eure keŋ aneni ke Ekapolon.

²⁶ “Ani kidau akitiya ŋun, tolemu atorobu a emesek a ŋolo eturuworere Aron esacaradoti; kikyaa kidiama ikwapei ainakinet ŋina ikyaaritae alokiŋaren Ekapolon, ani kirikak akikyaar, iya toruwor ainakinet kon.

²⁷ Kitaleiyo ŋinerin lu ŋulu a ibarasit a ŋini eturuworere Aron ka ŋidwe keŋ ŋulusapa ŋisacaradotin: Atorobu a emesek ŋina ekyaaritae ka amuro a emesek ŋina ekyaaritae, emaikina ŋinerin ŋul toruworos ainakinet neni ka Aron ka ŋidwe keŋ ŋulusapa.

²⁸ Emaikina Ŋisirael inanakis Aron ka ŋidwe keŋ ŋulusapa ŋinerin ŋul ŋapakio daadaŋ. Erae ŋinerin ŋul ainakinet a Ŋisirael neni ke Ekapolon alotooma ŋiboro ŋulu einanakinete ikes Ekapolon epote akilip kaapei.

²⁹ “Emaikina ŋilowi ka Aron ŋulu italetoe ŋul toruwor ŋulu a ŋidwe keŋ a ŋulusapa ekaku keŋ; ani iosio ikes ka akimyet ituruworyo ŋisacaradotin, emaikina ikes enapito ŋilowi ŋul.

³⁰ Emaikina lokoku keŋ ŋolo etupakini iŋes ikwapei esacaradoti tonap ŋilowi ŋul ŋirwa ŋikanikaarei ebuni tooma Eema ŋolo iryamununoi, akitiya anakibois a ŋina Asegan

³¹ “Emaikina iyoŋ tolemu akiriŋ a emesek a ŋolo ituruworere ikes ŋisacaradotin, ido kidorok anakibois a ŋina Asegan,

³² alokiŋaren Eema ŋolo iryamununoi. Emaikina Aron ka ŋidwe keŋ ŋulusapa tonyama akiriŋ ŋin ka ŋamugati ŋuna eya lobukit.

³³ Emaikina ikes ŋikulepek kimuja akimuj ŋin ŋina ka alemaryo a ŋasecisya aŋuna ka akitaleun ikes kituruworoe ŋisacaradotin. Mam ituŋanan ice acamakinitae akinyam akimuj ŋin, anerae etaleo.

³⁴ Ani kiwalak akiriŋ ŋin ŋina a emesek a ŋolo ituruworere ituŋanan esacaradoti, kori kiwalak ŋamugati, amaikina kicunyarae, pa amaikina kimujae, anerae etaleo.

³⁵ “Emaikina iyoŋ kitiya neni ka Aron ka neni a ŋidwe keŋ a ŋulusapa, ŋakiro ŋun daadaŋ ikwapei ekecikia ayoŋ iyoŋ. Kituruwo ikes ŋisacaradotin alotooma ŋirwa ŋikanikaarei.

³⁶ Toar emoŋ a ŋinakoloŋit ikwapei ainakinet ŋina elemarere asecit. Tolemununu daŋ ainakinet ŋina elemarere asecit, iya Namuroet kitaleunio iŋes, kedaun ŋun, kiosak akimyet Namuroet kitaleu.

³⁷ Emaikina iyoŋ iya ŋirwa ŋikanikaarei iyayenene Namuroet ainakinet ŋina elemarere asecit ka itale Namuroet. Ŋun nai ituruworete Namuroet ŋin ŋina Asegan nooi, ido ibore daadaŋ ŋini etapakin neni keŋ, eruworŋini eseg.”

Ŋainakineta ŋuna a ŋinakoloŋit

³⁸ “Emaikina iyoŋ iya ikwapei ainakinet Namuroet a ŋinakoloŋit ŋikaalei ŋulumesekin ŋiarei ŋulu erae apolou kec ekaru epei.

³⁹ Ya ikale ipei taparacu Namuroet, ido iya ŋinice eboŋ.

⁴⁰ Ani iyai ikale ŋini ke ekiŋaren, tolemu ŋakirya a ŋaganoi ŋuna ajokak akilo apei, tolemu akimyet ŋina ajokan ŋina ka olipa elita, tolemu epiini ŋolo ajokan elita; ikwapei ainakinet ŋina ka akimuj a ŋina emasyo.

⁴¹ Ya imesek ŋinice daŋ eboŋ, ido iya ikwapei ainakinet akimuj ŋina etya ŋina iyait iyoŋ iyai ikale ŋini ka ataparacu. Erae ŋun ŋamuja ŋuna akainakinitae ayoŋ Ekapolon, ŋamuja ŋuna epeyo akabobokinit ayoŋ eure kec eketalakarit.

⁴² Emaikina ainakinet na ŋina epeyo toruwor ŋina itiyaete ŋanyameta daadaŋ apaki ŋina emaikina kitiyaere. Kitiyata ŋun alopuke ke Eema a ŋolo iryamununoi alokiŋaren Ekapolon, aneni ikiryamun ayoŋ ka iyes okolimok iyes ŋakiro.

⁴³ Nen iŋes ikiryamun ayoŋ ka Ŋisirael, ido ituruwori apolou kaŋ nen akibois ŋina italeuno.

⁴⁴ Aŋun, etaleuni ayoŋ Eema ŋolo iryamununoi ka Namuroet. Etaleuni ayoŋ Aron ka ŋidwe keŋ ŋulusapa daŋ, eketiyanakis ayoŋ ikwapei ŋisacaradotin.

⁴⁵ Ayakaun ayoŋ neni eyakasi Ŋisirael, oruwor Akuj kec.

⁴⁶ Eyenunete ikes atemar arae ayoŋ Ekapolon Akuj kec, ŋina abu oyau ikes anakwap a Ijipit, ikotere apedori ayakaun neni eyakasi ikes. Arae ayoŋ Ekapolon Akuj kec.”