Awos. 27 - Ebaibul

Namuroet ŋina a ŋainakineta a ŋuna epeyo

¹ “Toduk a ŋakito ke eewoi Namuroet. Emaikina erae ŋina eriyan ŋiwaetin ŋuluomwon daadaŋ, erae ŋisepyon ŋimitae ŋiarei, torae kiŋaren ka neni iteotor ŋimitae ŋiarei, ido aoyau alokwap tari kidiama torae emita epei.

² Kiwuak ibore ŋini esibit ŋamomwar lokoonae ŋulu a Namuroet a ŋin, emaikina ikes erae ibore ipei bon, ido toburusik eburonis Namuroet ŋin.

³ Toyeu ŋamoti ŋunakidyata ekuron ŋolo a Namuroet a ŋin, kitiyau ŋamudet ekuron, ŋabakulei ŋunawuaset ka ŋiboro ŋulu kibeleet akiriŋ ta ŋiboro ŋulu edakitere akim. Emaikina iyoŋ kitiyau ŋiboro ŋul daadaŋ a eburonis.

⁴ Kisibus, kiwuanak ŋasuwa a eburonis nawaetin a Namuroet a ŋin, ido kiwuanak eburonis ŋololuluŋ lokoonae ŋulu alokwap ŋasuwa ŋun;

⁵ tosipok Namuroet tooma nasuwa ŋun, pena ŋikoonae a Namuroet kidiama neniluluŋ, kimyek Namuroet ikyara iwadio anasuwa.

⁶ Kitiyau anakito a ŋiwo ŋakito ŋuna edakitere Namuroet ŋin, toburusik eburonis nakito ŋun,

⁷ ido kirepak ŋakito ŋun nasuwa ŋunaluluŋ ŋun, ikotere todakitere Namuroet alowaetin a ŋuluarei.

⁸ Kitiyau Namuroet a ŋakito a ŋuna edapal, kimyek tooma eorori, lopite ŋolo ikitoodikinitor iyoŋ Akuj alomoru.”

Alapatu ŋina alokidiŋ Eema ka ŋanaŋgae keŋ ŋuna enenosi nen

⁹ “Kitiyak kiŋa Eema ŋolo iryamununoi ŋol neni elapat. Kiwuak lowae ŋolo alo Kwap nenilapat nen ŋanaŋgae ŋuna amilimilak ŋuna edonyuno ejok; torae aoyau kec alosepyon ŋimitae ŋatomoniomwon ka ŋiomwon.

¹⁰ Kitiyau ke eburonis ŋipirin a akibois a ŋin ŋatomoniarei ka ŋawoeta a ŋipirin a ŋul ŋatomoniarei, nai ŋikodoce ŋulu inenetere ŋanaŋgae lopirin kaapei ka ŋikabobooe ŋulu imoryanakinere ŋanaŋgae ŋun, emaikina kitiyau ke esilipa.

¹¹ Kitiyau ŋiboro ŋulu iwasiyete alowae a ŋolo alo Kuju Eema ikwaan ka ŋulu alo Kwap Eema. Kitiyau ŋanaŋgae ŋuna erae aoyau alosepyon ŋimitae ŋatomoniomwon ka ŋiomwon, kiwuak nakibois ŋin ŋipirin ŋatomoniarei ŋulu itiyaunitae ke eburonis ka ŋawoeta kec ŋatomoniarei ŋuna itiyaunitae ke eburonis; nai ŋikodoce ŋulu inenetere ŋanaŋgae lopirin kaapei ka ŋikabobooe ŋulu imoryanakinere ŋanaŋgae, emaikina kitiyau ke esilipa.

¹² Kiwuak nalapatu alowae a ŋolo alo To ŋanaŋgae ŋuna erae aoyau kec alosepyon ŋimitae ŋatomoniarei ka ŋiuni. Kiwuak nen ŋipirin ŋitomon ka ŋawoeta kec ŋatomon.

¹³ Emaikina aoyau alokiŋaren alapatu ŋin erae ŋimitae ŋatomoniarei ka ŋiuni alowae a ŋolo alo Kide.

¹⁴ Emaikina ŋanaŋgae ŋuna erae aoyau kec alosepyon ŋimitae ŋulu eapiyarito ŋikanikaarei inenekinitoe kiŋaren epeiwae epuke a akibois ŋin; toyakas daŋ ŋipirin ŋiuni ka ŋawoeta kec ŋauni.

¹⁵ Lowae ŋoloce a akibois a ŋin, emaikina eyakasi ŋanaŋgae ŋuna erae aoyau kec ŋimitae ŋulu eapiyarito ŋikanikaarei; toyakas daŋ ŋipirin ŋiuni ka ŋawoeta kec ŋauni.

¹⁶ Kiwuak lopuke ka alapatu a ŋina alokiŋa Eema ŋolo iryamununoi anaŋga ŋina erae aoyau alosepyon ŋimitae ŋikanikaomwon, toyakas ŋiraŋgi lu: Ŋolopus, ŋolo kipurat-areŋan ka ŋolo areŋan. Emaikina anaŋga ŋin erae ŋina amilimilan ŋina edonyuno ejok, ŋina edonyokinitoe nawae ŋiusyo ŋice ŋulu isibusitere. Emaikina eyakasi nen ŋipirin ŋiomwon ka ŋawoeta kec ŋaomwon.

¹⁷ Emaikina ŋipirin daadaŋ ŋulu eya nalapatu ŋin ilodotoi ke esilipa, toyakas ŋikodoce ŋulu ke esilipa; torae ŋawoeta a ŋipirin a ŋul ŋuna itiyaunitae ke eburonis.

¹⁸ Emaikina aoyau a alapatu a ŋin alosepyon erae ŋimitae ŋatomoniarei ka ŋikanikapei, torae aoyau alokiŋaren ka neni iteotor ŋimitae ŋatomoniarei ka ŋiuni; toyakas ŋanaŋgae ŋuna inenosi ŋuna erae aoyau alokwap tari kidiama ŋimitae 2.3, torae ŋuna amilimilak ŋuna edonyuno ejok, ŋuna eropakinitae eburonis alokwap.

¹⁹ Emaikina ŋiboro daadaŋ ŋulu isitiyao alotooma Eema ŋolo iryamununoi ka ŋases ŋuna ke Eema a ŋolo iryamununoi ta ŋases daadaŋ ŋuna ka alapatu a ŋina alokiŋa Eema ŋolo iryamununoi erae eburonis itiyaunitere.”

Akimyet ŋina ke etaa

²⁰ “Emaikina iyoŋ tolimok Ŋisirael yautu neni kon akimyet ŋina ecuunitae alokito a ŋulu enyaritae Olipa, kinokonakinia iyoŋ etaa a ŋinakoloŋit.

²¹ Emaikina Aron ka ŋidwe keŋ ŋulusapa kidara ŋitaae enokete ŋinapei eboŋ tari taparacu alokiŋaren Ekapolon, anakibois a ŋina ilipere a ŋina ayaaye anaŋga alokiŋaren Eema. Emaikina nu toruwor etal ŋolo erae eruba aneni a Ŋisirael tari a ananyameta a ŋuna eponito.