Awos. 25 - Ebaibul

Ŋainakineta aŋuna ke Eema

¹ Tema Ekapolon neni a Moses,

² “Tolimok Ŋisirael yaut ainakinet neni kaŋ. Emaikina iyoŋ kijaununu ŋainakineta alotuŋa a daadaŋ a ŋulu ecamunete alotai kec ainakin ayoŋ ŋainakineta.

³ Kijaununu ŋainakineta nu aneni kec: Egolid, esilipa ka eburonis;

⁴ Kijaununu ŋilowi ŋulu amilimilak, ŋulupusiyek, ŋulu kipura-areŋak ka ŋausi ŋuna areŋak ta ŋajul a ŋamee.

⁵ Kijaununu ikes ŋilowi a ŋimeesekin ŋulu imanyimanyitae, ŋijamu a ŋaatuk ŋulu edaitae, ŋakito ŋuna a ŋiwo,

⁶ akimyet ŋina a ŋitaae, ŋikito ŋulu akukunyok ŋulu inyalere akimyet ŋina ke etal lotuŋa ka ŋina itoboboere eure a ekinyate.

⁷ Kijaununu ikes ŋamoru ŋuna areŋak ŋuna enyaritae Onikis ka ŋinapen ŋice ŋulu iwuanakinio narapeta ka eboli ŋolo ka atorobu.

⁸ Emaikina kitiyaut ŋituŋa akibois kaŋ ŋina Asegan, ikotere nai ayoŋ eboi kaapei ka ikes.

⁹ Kitiyautu Eema ŋolo iryamununoi, kiwuakis ŋiboro keŋ daadaŋ lopite ŋolo alosyo ayoŋ akitoodikin iyes.”

Asaduku ŋina ka Acamunet

¹⁰ “Emaikina Ŋisirael kitiyaut Asaduku anakito a ŋuna ke eewoi, kitiyaut aoyau ka Asaduku alosepyon erae ŋasentimitae amiat ka ŋatomon, torae aoyau alokiŋaren ka neni iteotor ŋasentimitae ŋatomonikanikapei ka ŋikanikapei, ido aoyau alokwap tari kidiama emaikina erae ŋasentimitae ŋatomonikanikapei ka ŋikanikapei.

¹¹ Toburusikis egolid tooma ka kiŋa Asaduku ŋin, ido kiwuakis egolid ece nawaetin a Asaduku daadaŋ alokiŋa.

¹² Kiwuak kwap ŋakejen a Asaduku a ŋin egolid ŋolo itiyaunitae ikwaan ka akokoro, a ŋina keju apeikokoro, ŋaarei epeiwae ka ŋaarei lowae ŋoloce.

¹³ Kitiyau ŋapetet ŋaarei ŋuna ka Asaduku a ŋin anakito a ŋuna ke eewoi, ido toburusik egolid napetet ŋun.

¹⁴ Kirepak ŋapetet ŋun nakejen ŋuna itiyaunitae ke egolid ikwaan ka akokoro ŋuna aya nawaetin ka Asaduku, ikotere edakitere Asaduku.

¹⁵ Nyemaikina tolemarae ŋapetet ŋun aneni iwuakinitae; kimyek kiboiyoto a nen.

¹⁶ Kiwuak Nasaduku ŋin ŋamoru ŋunadapal ŋaarei ŋuna abuni ayoŋ ainakin iyoŋ.

¹⁷ “Kitiyak kidiama Nasaduku ŋin akibois ŋina ka akisyonio ŋina erae egolid bon itiyaunitere; ŋina erae aoyau alosepyon ŋasentimitae amiat ka ŋitomon, torae aoyau alokiŋaren ka neni iteotor ŋasentimitae ŋatomonikanikapei ka ŋikanikapei.

¹⁸ Kitiyau ŋitorubei a Ŋisubuna

¹⁹ Kiwuak epei lowae epei ka ŋoloce lowae ŋoloce a akibois a ŋina a akisyonio. Kitiyau ikes etapakina nawaetin a akibois a ŋina a akisyonio erae ibore ipei bon.

²⁰ Emaikina Ŋisubuna ŋul epetarito ŋabebenuk kec kidiama, erounito ŋabebenuk kec akibois ŋina a akisyonio. Emaikina ikes iteosi, iŋoliyarito nakibois ŋina a akisyonio.

²¹ Emaikina iyoŋ kiwuak akibois ŋina a akisyonio ŋin kidiama Nasaduku, ido kiwuak tooma Asaduku ŋamoru ŋunaarei ŋuna akainakini ayoŋ iyoŋ.

²² Ikiryamun iwon nen, ido alokidiama akibois ŋina ka akisyonio ŋin, ŋina eyai kidiŋ Ŋisubuna ŋul ŋiarei ŋulu eya kidiama Asaduku ŋina ka Acamunet, akainakini ayoŋ iyoŋ Ŋakiciketa kaŋ daadaŋ aŋuna a Ŋisirael.”

Emesa ŋolo a ŋamugati a ŋuna ka ayakau ke Ekapolon

²³ “Emaikina iyoŋ kitiyau emesa anakito ke eewoi, kitiyau aoyau keŋ alosepyon erae ŋasentimitae ŋatomonikanikauni ka ŋikanikauni, torae aoyau alokiŋaren ka neni iteotor ŋasentimitae ŋatomoniomwon ka ŋiomwon, ido aoyau alokwap tari kidiama emaikina erae ŋasentimitae ŋatomonikanikapei ka ŋikanikapei.

²⁴ Toburusik egolid bon lomesa ŋol, ido kiwuak egolid ece nawaetin a emesa a ŋol daadaŋ alokiŋa.

²⁵ Kitiyau ŋikelyo a emesa a ŋol erae aoyau kec ŋamilimitae ŋatomonikanikaarei ka ŋikan, ido kiwuak egolid lokelyo ŋul.

²⁶ Kitiyau ke egolid ŋakejen ŋaomwon ŋuna ikwaan ka akokoro toenik lokoonae ŋuluomwon ŋulu a ŋakejen a emesa.

²⁷ Kiwuak ŋakejen ŋuna ikwaan ka akokoro ŋun diyete ŋikelyo ka Asaduku, todaka ŋapetet ŋuna edakeneneere Asaduku.

²⁸ Kitiyau anakito ke eewoi ŋapetet ŋuna edakitere emesa ŋol, toburusik egolid, ido todaka eya ŋakejen.

²⁹ Kitiyau ke egolid ŋasaani ka ŋakijikoi ŋuna isitiyao alomesa a ŋol akicunyia ekinyate. Kitiyau ke egolid ŋabakulei ka ŋikalaae ikwapei ŋiboro ŋulu einanakinere epiini neni ka Akuj.

³⁰ Emaikina iyoŋ kiwuak emesa ŋol kiŋaren Asaduku ŋina ka Acamunet, ido emaikina a ŋinakoloŋit eyai lomesa ŋol amugati aŋuna ka ayakau ke Ekapolon.”

Awoet ŋina a etaa

³¹ “Kitiyau ke egolid bon awoet ŋina a etaa. Kitiyau kidiama ka kwap awoet ŋin ke egolid a ŋolo ityekitae ejok nooi. Kitiyak ŋiboro lu nawoet ŋin etapakina erae ibore ipei bon: Ŋitorubei a ŋatur ŋuna esibito ŋikopoi, ŋitorubei a ŋakwii a ŋuna igaŋito ŋatur ka ŋitorubei a ŋatur a ŋuna ebusak nooi.

³² Kitiyak nen ŋaten ŋakanikapei ŋuna epetara nawaetin a awoet, ŋauni epeiwae awoet ka ŋauni lowae ŋoloce.

³³ Kitiyak naten ŋun ŋakanikapei ŋitorubei a ŋatur a ŋauni a ŋinateni, emaikina ŋatur ŋun ikwaan ka ŋuna ke ekitoe a ŋolo enyaritae alimond, toya naten ŋun ŋitorubei a ŋakwii a ŋuna igaŋito ŋatur ka ŋitorubei a ŋatur a ŋuna ebusak nooi.

³⁴ Kitiyak nawoet a etaa ŋin ŋitorubei a ŋikopoi ŋiomwon ŋulu ikwaan ka ŋatur a ekitoe a ŋolo enyaritae alimond, toya ŋitorubei a ŋakwii a ŋuna igaŋito ŋatur ka ŋitorubei a ŋatur a ŋuna ebusak nooi.

³⁵ Kitiyak ŋitorubei a ŋakwii a ŋun: Epei kwap nakisyakinet a ŋaten a ŋun a ŋaarei a ŋuna esyaunak, epei nabo kwap nakisyakinet a ŋuna alokidiŋ a ŋunaarei ka ŋoloce kwap nakisyakinet a ŋuna esidyok a ŋunaarei.

³⁶ Emaikina ŋitorubei a ŋakwii ka ŋulu a ŋaten etapakina nawoet a etaa erae ibore ipei bon ka ityekunitae a egolid bon.

³⁷ Kitiyau ŋitaae ŋikanikaarei kiwuak kidiama nawoet ŋin, ikotere ecai kiŋaren awoet ŋin.

³⁸ Kitiyau a egolid ŋasiniyae ka ŋasuwa ŋuna eridere ŋatotol ŋuna inokanakinere ŋitaae ŋul.

³⁹ Tolemu ŋakiloi ŋatomoniuni ka ŋikan ŋuna a egolid bon kitiyaunia awoet a etaa ka ŋiboro daadaŋ ŋulu isitiyao a nen.

⁴⁰ Kitiya ibore daadaŋ lopite ŋolo ikitoodikinitere iyoŋ alomoru.”