Awos. 23 - Ebaibul

Akiyookino aŋuna a daadaŋ

¹ “Kimyekisi akisirop ŋakiro ŋuna erae alyokonu. Nyiriwo ka ituŋanan ŋini irworo alyokonu, nyiruworosi esuuda keŋ.

² Kimyekisi akiwuapit ŋasepico a ŋituŋa a ŋulu ecamito akitiya aronis. Ani ilimorete iyes ŋakiro kus aloikiiko, nyimunono ŋuna iyookino, ido nyirworo alyokonu iriito ka ŋikalalak.

³ Nyitoodiut daŋ atemar iikinito iyes aloikiiko ekulyakit ŋolo esecit.

⁴ “Ani kiraput iyes emoŋ, kori esigirya ŋolo ke emoit kus, emaikina kinyakakis nilope.

⁵ “Ani kiŋolikis iyes esigirya a ituŋanan a ŋini ikimanit iyes euryani aŋuna enuya egogos, nyimyekis euryani a nen, emaikina kiŋarakis ituŋanan ŋin, kitonyoikis esigirya keŋ.

⁶ Nyimunono aloikiiko ŋakiro ŋuna iyookino apaki ŋina isitakinitere ŋikulyak esecito.

⁷ Nyilomasi nakiro ŋuna etubokinere ituŋanan pa esecit, ido toarae ituŋanan ŋin emam ibore aronon itiyat, kori toarae ituŋanan ŋin emam ibore esecit; anerae atubokini ayoŋ ituŋanan ŋini itiyae aronis ŋin.

⁸ Nyicamut akaluŋuluŋut adio, anerae nyepedorete ŋikapolok aruwor ŋulu iyookino erae kecamununeete ŋakaluŋuluŋui, epedorete ikes akiloc ŋakiro a ŋulu iyookino.

⁹ “Kimyekisi akisiyaloloŋ ŋituŋa ŋulugelae ŋulu iboiyoto iyes; iyenete iyes ŋuna eya lotai a ŋituŋa a ŋulu erae ŋigelae, anerae iraakasi paaran iyes daŋ ŋigelae alo Ijipit.”

Ŋikisila aŋuna a Sabato

¹⁰ “Kitata ka tolema ŋimanikorin kus ŋikaru ŋikanikapei;

¹¹ ani edoli ekaru ŋolo a ŋikanikaarei, emaikina kimyekinae kieŋut nyitae. Nen nai elemuniata ŋituŋa kus ŋulu a ŋican akimuj ŋina elomuni bon a nen, ido ŋina imyekinete ŋul, toryamut ŋityaŋ tonyama. Kitiyata ŋakiro ŋun tari alomanikorin kus a ŋulu ke epiini ka alomanikorin kus a ŋulu a ŋikito a akimyet.

¹² “Kitiyata ŋiticisyo kus ŋirwa ŋikanikapei, nai ani edoli akoloŋit ŋina a ŋakanikaarei, emaikina kieŋut, ikotere ŋimoŋin ka ŋisigirya kus daŋ kieŋut, tosodi kieŋu epito ŋolo euritae alokalya kus ka kieŋu igelaanot ŋini iboiyete ka iyes.

¹³ Tomitakinito ŋakiro daadaŋ ŋuna akalimok ayoŋ iyes. Nyinyarata ŋirorwa a ŋakujo a ŋace; nyikiirar iyes inyarito ikes a ŋakitukwa kus.”

Ŋasuban ŋunauni alotooma ekaru

¹⁴ “Kitiyata ŋasuban neni kaŋ ŋakitiyaet ŋauni alotooma ekaru.

¹⁵ Totamunito akitiya ŋasuban ŋuna a ŋamugati a ŋuna emam ŋakinyalet. Kitiyata ŋasuban ŋun lopite ŋolo akalimokinitor ayoŋ iyes atemar emaikina tonyama ŋamugati ŋuna emam ŋakinyalet ŋirwa ŋikanikaarei. Kitiyata ŋun alolap a ŋolo ka Abib, anapaki a ŋina akalimokinit ayoŋ iyes, anerae ipotu iyes tolomut alo Ijipit elap ŋolo ka Abib. “Mam ituŋanan emaikina bu neni kaŋ emam ibore eyaunit ainakin ayoŋ.

¹⁶ “Totamunito akitiya ŋasuban ŋuna ka akilem ŋikinyom ŋulu ipotu iyes kitata ekiŋaren lomanikorin kus. Totamunito akitiya aŋolokaru ŋasuban ŋuna idauniata iyes acunun ŋikinyom ŋulu itato lomanikorin kus.

¹⁷ Emaikina ŋituŋa daadaŋ ŋulu erae ŋisapa alokidiŋ kus potu neni ke Ekapolon Akuj ŋaponet ŋauni a ŋolokaru.

¹⁸ “Nyemaikina iyes kiwuakis ŋakinyalet naokot ŋuna ka amuronot a ŋina eyaunitae neni kaŋ, kori nyemaikina kimyekis asepwae a ibarasit a ŋin kiboi kiwalak.

¹⁹ “Toseutu ŋaraito alokinyom kus a ŋulu ke ekiŋaren ŋuna ajokak, ido yaut Kai a Ekapolon Akuj kus. “Nyidorokis ikale ŋinimeot a ŋakile a toto keŋ.”

Kiikinae Ŋisirael atemar ikamarete ikes Kanaan

²⁰ “Kiirasi, alosi ayoŋ akiyakiyar emalaika kiŋaren kus, ikiyok iyes alorot, ikiya nakibois ŋina adau ayoŋ akitemokin.

²¹ Tomitakinito akiirar ŋakiro ŋuna irworo iŋes, nyiŋero iŋes, ani kiŋero, nyikisyoni iŋes iyes, anerae ayoŋ eyakuunit iŋes.

²² “Nai ani kimitakis iyes akiirar ŋuna irworo iŋes, ido kitiyata daadaŋ ŋuna abala ayoŋ kitiyata, abuni nai ayoŋ aruwor emoit a ŋimoe kus, ido etepegi ayoŋ ŋulu ikitepegete iyes.

²³ “Ani elosi emalaika kaŋ kiŋaren kus, ikiya iyes neni eya Ŋiamori, Ŋiitaiti, Ŋiperisi, Ŋikanaani, Ŋiipi ka Ŋiyebusi, ido erita ayoŋ ŋul daadaŋ,

²⁴ nyemaikina iyes toryediko alokiŋaren ŋakujo kec, kori kilipa neni kec, kori kiwuapa ŋuna itiyao aŋuna kec. Emaikina iyes kinyasut ŋakujo ŋun, tobwaŋabwaŋaasi ŋipirin ŋul ŋulu italetoe erae ŋakujo kec.

²⁵ Kilipa neni ke Ekapolon Akuj kus, eterereŋi ayoŋ akimuj ka ŋakipi kus; ido alemari ayoŋ ŋidekesyo aneni kus.

²⁶ Mam aberu ebwaŋun akook, kori ituŋanan eruwor ikolupanot anakwap kus; etalalae ayoŋ ŋirwa ŋulu ka akiyar kus.

²⁷ Eturuwori ayoŋ ŋituŋa ŋulu ikitepegete iyes ŋulu ekuryaka aŋuna kaŋ, esibileri ayoŋ ŋituŋa ŋulu ikitijiete iyes, ido esipumari ayoŋ ŋimoe kus toema aneni kus.

²⁸ Ewuakini ayoŋ ekabule neni a ŋimoe kus. Eritari ayoŋ Ŋiipi, Ŋikanaani ka Ŋiitaiti anakwap a ŋin apaki ŋina idolioto iyes nen.

²⁹ Nai nyeritari ayoŋ ikes alotooma ekaru epei, anerae esiluni akwap ŋin, ido ikilalakis iyes ŋityaŋ ŋulu anyamak.

³⁰ Eritari ayoŋ ikes alokiŋaren kus iwadio, iwadio, akitodol ŋina ilalakuniata iyes, kikamasi akwap ŋin daadaŋ.

³¹ Ewuakini ayoŋ ekukoru a akwap kus akisyakin a Nanam a ŋina Areŋan tari Nanam a Ŋipilistin, ido kikobar analoŋisat tari naŋolol Eupurate. Akajalakini ayoŋ iyes ŋituŋa ŋulu iboiyete anakwap a ŋin, ido iritarete iyes ikes toloto alokiŋaren kus.

³² Nyicamunosi ka ikes, kori ka ŋakujo kec.

³³ Nyicamakis ikes iboiyete anakwap kus, acepaki epedorete ikes akitesec iyes alokiŋaren kaŋ, anerae ikimodiyarete ikes iyes anakilip nakujo kec.”