Awos. 22 - Ebaibul

Ŋikisila aŋuna ke etacit a ŋamicae

¹ “Ani kekokoiya ituŋanan emoŋ, kori amesek toar, kori togyela, emaikina ekokolan ŋol totac ŋimoŋin ŋikan aŋuna ke emoŋ ke epei ka totac ŋamesekin ŋaomwon aŋuna ka amesek ka apei.

² Ani kikamun ituŋanan ekokoi, ido kidicae totwan, mam etacit elemunio aŋuna a ekokolan a ŋol.

³ Nai ani kitiyakina ŋakiro ŋun kedau akoloŋ alomun, emaikina ituŋanan ŋini aari ekokolan totac iŋes. “Emaikina kire jik ekokolan totac ibore ŋini ekokoiyarit, nai ani kemam ibore etacia, emaikina togyelarae iŋes kisitiyae ŋisiliŋa ŋulu agyelarere iŋes atacia ibore ŋini ekokoiyarit iŋes.

⁴ Ani keryamun ibarasit ŋini akokoiyarit iŋes eriŋa eyari, emyat iŋes, kerae emoŋ, kori esigirya, kori amesek, emaikina iŋes totacu ŋibaren ŋiarei aŋuna a ipei.

⁵ “Ani kitanyam ituŋanan ŋibaren keŋ emanikor, kori epiini a ituŋanan a ice, emaikina iŋes totac a ŋikinyom a ŋulu ajokak nooi alomanikor keŋ, kori a epiini keŋ a ŋolo ajokan nooi.

⁶ “Ani kicunyak ituŋanan akim topetar tonom ŋamon ka kitoro ŋatukon a ŋikinyom a ŋulu elemitae, kori ŋikinyom ŋulu eriŋa nyelema, kori tonomiya emanikor daadaŋ, emaikina ituŋanan ŋini ecunyakini akim totac ŋikinyom ŋul daadaŋ.

⁷ “Ani kicikak ituŋanan ikidunyet keŋ ŋisiliŋa, kori ŋiboro akiyok aŋuna keŋ, ido tokokoiyarae a nen, emaikina ŋini akokoiyarit erae kikamun, totacu ŋice ŋiarei aŋuna a ipei.

⁸ Ani pa kikamun ekokolan ŋol, emaikina kisitakinae alokiŋaren ŋikatubok ituŋanan ŋini ecikakinitae ŋiboro toanyut ŋikatubok ŋul keyai sek ibore elemarit ilope a ŋiboro a ŋul aneni a ikidunyet keŋ a ŋini ecikakinitae ŋiboro.

⁹ “Ŋiburasyo ŋuluce daadaŋ ŋulu iburaata ŋituŋa aŋuna kerae ke emoŋ, a esigirya, a amesek ka a ŋilowi, kori aŋuna a ibore a ice a ŋini ecakara, a ŋini ebala ipei, ‘Erae ibore en ŋini kaŋ,’” emaikina ebura ŋol yaarae neni a ŋikatubok. Ani ŋini eryamunete ŋikatubok edyakarit, emaikina ŋin totac ŋinice a ŋiboro, kori a ŋibaren a ŋiarei aŋuna a ipei.

¹⁰ “Ani kicikak ituŋanan ekidunyet keŋ esigirya, kori emoŋ, kori amesek, kori ibarasit ice daadaŋ, ido totwan ibarasit ŋin, kori towana, kori tolema ibore ice, pa eyeni ŋini ecikakinitae,

¹¹ emaikina ebura ŋolo ikoni ŋol tocamunos ŋituŋa ŋul ŋiarei, kikoŋo alokiŋaren Ekapolon atemar mam sek nyitatacit ŋini alemar ikeebore ekidunyet keŋ ibore idio. Emaikina ŋini alemar ikeebore tocamu ŋakiro ŋun, ido mam ibore etacakini ikidunyet keŋ ŋin iŋes.

¹² Nai ani kekokoiyaritae ibarasit ŋin aneni a ŋini ecikakinit iŋes, emaikina totacakinae elope a ibarasit ibarasit ice.

¹³ Ani keryamunitae alyal ŋina kenyamyata ŋityaŋ ibarasit ŋin, emaikina inunae ilope a ibarasit a ŋin ibore idio ŋini idoŋit anibarasit keŋ, ido nyitatacio ituŋanan ŋin ibarasit ŋin.

¹⁴ “Ani kijaa ituŋanan ibarasit aneni a ŋinice akisitiya mono, ido towana aneni keŋ, kori totwan emam ilope, emaikina ibarasit ŋin totacae.

¹⁵ Ani kitiyakina ŋadi nibarasit ŋin eyai ilope, nyetacyo erae ca kerae sek ŋini epaŋgaunitae; ŋisiliŋa bon ŋulu epaŋgaunitere emaikina totacae.”

Ŋikisila aŋuna ke ekiboiye kaapei ka ŋikisila aŋuna ke edin

¹⁶ “Ani kimaimaiya ituŋanan apese ŋina sek nyiryamakina ke ekile ŋina sek nyetiŋit, ido kiryamakinos ka iŋes, emaikina ituŋanan ŋin kiit apese ŋin toruwor aberu keŋ.

¹⁷ Nai ani keŋer papa ka apese a ŋin ituŋanan ŋin, emaikina ituŋanan ŋin tolemu ibore ŋinipei sek etya ŋini iisere ŋapesur.

¹⁸ “Nyemaikina iyes kimyekis ŋakekukujak eyarete.

¹⁹ “Ituŋanan daadaŋ ŋini elosi akiryamanakin ka ŋibaren, emaikina toarae.

²⁰ “Ituŋanan daadaŋ ŋini einakini amuronot keŋ neni ka akuj ka ace akilo Ekapolon bon, emaikina toarae.

²¹ “Nyemaikina iyes tobolyatar, kori kisiyaloloŋo ituŋanan ŋinigela ŋini iboiyete ka iyes; anerae iraakasi paaran iyes daŋ ŋigelae anakwap a Ijipit.

²² Nyemaikina iyes tojamuwasi apuserut adio, kori ikoki idio.

²³ Ani kijamuwasi iyes ikes, esyoni ayoŋ ikes apaki ŋina ikalounioto neni kaŋ;

²⁴ aŋoi ayoŋ nooi, akamunyari iyes ke ekileŋ, toruworos ŋaberu kus ŋapuseru ka toruworos ŋidwe kus ŋikokyok.

²⁵ “Ani kidenikis iyes ituŋanan kaŋ ŋinikulyakit idio ŋisiliŋa, nyemaikina iyes kimicata ikes esibit ideniyorito ibore idio, nyiyatakis ibore ice nibore ŋini imicao ikes.

²⁶ Ani kekoda ituŋanan elou a ŋinice aŋuna ka akidarunia ibore ŋini imicae iŋes, emaikina kinyakakinae ituŋanan ŋin elou keŋ ŋolo ekodunitae eriŋa akoloŋ nyedoiyoro;

²⁷ anerae acepaki elou ŋol bon eyakar ekidunyet keŋ akimukor; ai nai elemunia ekidunyet keŋ ŋol ibore ice ŋini imukoror? Ani kikalou ekidunyet keŋ ŋol neni kaŋ, eirari ayoŋ akigworo keŋ, anerae esyoniono ayoŋ.

²⁸ “Nyemaikina iyes kiyanya Akuj, kori kiceno ekarikon a ŋituŋa kus.

²⁹ “Nyiŋero ainakin Akuj ŋainakineta ŋuna a ŋikinyom kus, kori ŋamyeta ŋuna icuyete iyes. Emaikina iyes ikiinakis ayoŋ ŋidwe kus ŋulusapa ŋulu kiyae.

³⁰ Kitiyata ŋun anaatuk ka anamesekin daŋ. Kimyekisi ŋitak ka ŋikaalei toruko ka atatoto kec ŋirwa ŋikanikaarei bon, ido ikiinakis ayoŋ edolete ŋirwa kec ŋikanikauni.

³¹ Emaikina iyes irae ŋituŋa kaŋ ŋulu italeuno neni kaŋ. Aŋun, nyemaikina iyes tonyama akiriŋ ŋina enyamitor etyaŋ ibarasit, kori etyaŋ. Emaikina inakis ŋiŋokwo tonyama akiriŋ ŋin.”