Awos. 20 - Ebaibul

Ŋakiciketa ŋunatomon

¹ Kirwor nai Akuj ŋakiro nu daadaŋ tema,

² “Ayoŋ Ekapolon Akuj kus, ŋina abu okoyau iyes anakwap a Ijipit, anakibois a ŋina iraakatar iyes ŋipi.

³ Nyiyakatar ŋakujo ŋace mati ayoŋ bon.

⁴ “Nyitiyaut aŋuna kus etorube a idiobore erae akuj kus, kerae etorube a ibore a ŋini eyai kidiama nakuj, kori a ŋini eyai kwap tooma ŋalup, kori a ŋini eyai nakipi ŋuna alokwap ŋalup.

⁵ Nyiryediko kilipa neni kec; anerae ayoŋ Ekapolon Akuj kus, Akuj ŋina alilyan, esicani ayoŋ ŋidwe aŋuna ka asecit atapapa kec akitodol nanyamet ŋina a ŋauni ka ŋina a ŋaomwon a ŋulu akaŋerito ayoŋ,

⁶ nai etoodikini amina kaŋ ŋina nyiryaŋiryaŋa nanyamet ŋina ka aliput a ŋulu akaminasi ayoŋ, ido kiricito ŋakiciketa kaŋ.

⁷ “Nyisitiyaete ekiro ke Ekapolon Akuj kus analyokonu, anerae nyeesikini Akuj akisican ituŋanan ŋini isitiyae ekiro keŋ analyokonu.

⁸ “Totamunito akoloŋit ŋina a Sabato, ido kituruworito iŋes ŋina asegan.

⁹ Kitiyata ŋiticisyo kus daadaŋ ŋirwa ŋikanikapei.

¹⁰ Nai akoloŋit ŋina a ŋakanikaarei erae Sabato, akoloŋit ŋina ke Ekapolon Akuj kus; akoloŋit ŋin, nyitiyata etic edio: Nyitiyata iyes, nyitiyaete tari ŋidwe kus ŋulusapa, kori ŋulupesur, ŋiketiyak kus, kori ŋaketiyak kus, ŋibaren kus, kori ŋituŋa ŋulugelae ŋulu iboiyete alotaun kus,

¹¹ anerae ŋirwa ŋikanikapei, abu Ekapolon kitiya, tosub nakuj, akwap, anam ka ibore daadaŋ ŋini eyai tooma kec. Aŋun, abu Ekapolon kiterereŋ akoloŋit ŋina a Sabato kitesegu.

¹² “Tokerite ŋinituŋanan papa keŋ ka toto keŋ, ikotere tolalata ŋirwa ŋulu iboiyoto iyes anakwap a ŋina ikiini Ekapolon Akuj kus.

¹³ “Nyiar.

¹⁴ “Nyilom.

¹⁵ “Nyikoko.

¹⁶ “Nyisudo ŋakiro neni a ŋikidunyet kus.

¹⁷ “Nyiŋobel ŋinituŋanan akai a ikidunyet keŋ, nyiŋobel aberu a ekidunyet keŋ, kori eketiyan ka aketiyan a ikidunyet keŋ, kori emoŋ, kori esigirya, kori ibore ca daadaŋ ŋini erae ŋini a ikidunyet keŋ.”

¹⁸ Ani iirarete ŋituŋa daadaŋ agiro ka eruye ŋolo ka arupepe ka ani iŋolikinete akimilyaa ka emoru epurui, abu akuryanu min neni kec, tomaranikis, towua aneni alwanan.

¹⁹ Temasi ikes neni a Moses, “Bua erae iyoŋ ikisirwor isua, epupokinio isua ŋakiro ŋun. Nai nyicamak Akuj ebuni akisirwor isua, ani kikisirwor Akuj isua, ikitwaki isua.”

²⁰ Tema Moses neni a ŋituŋa, “Nyikuryaketa, anerae ebunit Akuj erae akikatakin iyes, ikotere torubakis iwuapito ŋakiro keŋ nyiseceta.”

²¹ Kidoŋo ŋituŋa ewuasi aneni alwanan, nai tolot Moses lomoru, toapiya lodou ŋolo pa acaor, ŋolo ayai neni ayai Akuj.

Ŋikisila ŋulu iwuapitae edukio Namuroet

²² Tema Ekapolon neni a Moses, “Tolimok Ŋisirael ŋakiro nu ebe, ‘Idaut iyes ŋikulepek aanyun atemar adau ayoŋ akirwor neni kus anakuj.

²³ Nyitiyaut aŋuna kus ŋakujo kilipete neni kec, ido kilipete neni kaŋ daŋ, nyemaikina iyes kitiyaut aŋuna kus ŋakujo tari alosilipa, kori alogolid.

²⁴ Emaikina iyes kitiyaut a ŋalup Namuroet aŋuna kaŋ, ido inanakis ŋainakineta kus neni kaŋ a nen, ŋainakineta kus ŋuna a ŋamesekin ka ŋimoŋin ŋuna epeyo ka ŋuna ke ekisil. Abuni ayoŋ akiterereŋ iyes anakibois a daadaŋ a ŋina akainakini ayoŋ iyes akilipya ayoŋ.

²⁵ Ani kitiyaut iyes a ŋamoru Namuroet aŋuna kaŋ, nyitiyaut a ŋamoru a ŋuna ibesitae ejok; anerae ani kibeta iyes ŋamoru ŋunakitiyaunet Namuroet ŋin, idaut iyes amunaar Namuroet ŋin.

²⁶ Nyiwuakis ŋadoketa Namuroet kaŋ ŋuna idoketa iyes, ikotere nyisileereun a nen ikwa itakaniata iyes.’ ”