Awos. 17 - Ebaibul

Tolomut ŋakipi anataaba

¹ Towotokis Ŋisirael daadaŋ analoŋisat a ŋina a Sin, torubakis ewosete anakibois ka apei tari ŋinace, lopite ŋolo ecikitor Ekapolon ikes. Toloma ikes neni enyaritae Repidim, nai amam ŋakipi a nen ŋuna emasete ikes.

² Aŋun, apotu ikes kisiburata Moses a nen temasi neni a Moses, “Inakinae isua ŋakipi tomatae.” Kiŋit Moses ikes tema, “Kaanukiro ikisiburaata iyes ayoŋ? Kaanukiro ikatakinitotor iyes Ekapolon?”

³ Tonyam akure ŋituŋa a nen nooi, kiŋuruŋura neni a Moses. Kiŋita Moses temasi, “Kaanukiro ikitipeunio iyoŋ isua alo Ijipit akitaar isua ka ŋidwe kosi ta ŋibaren kosi akure?”

⁴ Aŋun, abu Moses kikalou neni ke Ekapolon kiŋit tema, “Nyo emaikina ayoŋ etiya neni a ŋituŋa a lu? Etenito ikes akicak ayoŋ a ŋamoru.”

⁵ Kirwor Ekapolon neni a Moses tema, “Ape tolot kiŋaren ŋituŋa, ya ŋikasikou a Ŋisirael ŋidi torukosi ka iyoŋ; totiŋ ebela kon ŋolo ibunio toramya aŋolol Nile.

⁶ Awoi ayoŋ alokiŋaren kon anataaba a ŋina eyai lomukura ŋolo enyaritae Oreb. Toram ataaba ŋin, elomunete ŋakipi a nen, ido tomata ŋituŋa.” Abu Moses kitiya ŋun iteete ŋikasikou a Ŋisirael.

⁷ Tolimok Moses ŋirorwa a akibois a ŋin Masa anerae apotu Ŋisirael kisiburata ka kikatakis Ekapolon a nen kiŋita temasi, “Eyai mono Ekapolon kaapei ka iwon, kori mam?”

Toremo Ŋiamaleki Ŋisirael, nai aponi tobwaŋae

⁸ Toŋaut Ŋiamaleki ajore, toremo Ŋisirael alo Repidim.

⁹ Tema Moses neni a Yosua, “Toseu ŋikilyok ŋidi alotuŋa yok toloto kitijioto Ŋiamaleki. Awoi ayoŋ moi taparacu alokidiama emukura atiŋit ebela ŋolo ka Akuj.”

¹⁰ Aŋun, abu Yosua kitiya ikwapei alimokinitor Moses iŋes, kitiji Ŋiamaleki apaki ŋina ayakatar Moses ka Aron ta Ur kidiama emukura.

¹¹ Apaki daadaŋ ŋina ekyaaritor Moses akan keŋ, elounito Ŋisirael Ŋiamaleki; ido apaki daadaŋ ŋina etikiunio Moses akan keŋ, kilout Ŋiamaleki Ŋisirael.

¹² Nai abu toup Moses akikyaarit ŋakan keŋ, aŋun, apotu ŋirukitos keŋ tolemut amoru kisiboikis Moses nen. Totiŋa Aron ka Ur ŋakan a Moses kikyaasi, ipei kikyaa teten ka ŋinice kikyaa kedyeny. Aŋun, apotu ŋakan a Moses torubakis ikyaara akitodol ŋina adoiyorya akoloŋ.

¹³ Aŋun, abu Yosua tobwaŋ Ŋiamaleki toar a ŋileŋia.

¹⁴ Tema nai Ekapolon neni a Moses, “Kigir ŋakiro nu lokitaabo ikotere etamunitae, ido tolimununuye ikes epupi Yosua, anerae esunyari ayoŋ jik Ŋiamaleki todaun ituŋanan etamunit ikes anakwap a na.”

¹⁵ Todukok Moses Namuroet nen tolimok ekiro keŋ ebe, “Erae Ekapolon abendera kaŋ.”

¹⁶ Tema iŋes, “Ani ikyaaritae abendera ŋina ke Ekapolon, itiji Ekapolon Ŋiamaleki ŋulu a ŋanyameta a daadaŋ.”