Awos. 15 - Ebaibul

Eete a Moses

¹ Apotu nai Moses ka Ŋisirael toeikis eete lo neni ke Ekapolon temasi: “Aeikini ayoŋ neni ke Ekapolon, anerae itopolooritae iŋes nooi aŋuna elounia ŋimoe; emasak iŋes ŋaŋolei ka ŋikametok kec Nanam.

² Ekapolon iŋes erae agogoŋu kaŋ ka apedor kaŋ. Ekapolon iŋes erae aiuno kaŋ. Erae iŋes Akuj kaŋ epuri ayoŋ iŋes, erae iŋes Akuj a papa kaŋ, etopoloori ayoŋ iŋes.

³ Erae Ekapolon ekajion; Ekapolon iŋes ekiro keŋ.

⁴ Emasak iŋes ŋagaari ka ŋasigarya a Parao Nanam. Etamat Anam ŋina Areŋan ŋikapolok ŋulu ekinyomitae nooi ŋulu epukatotor Parao.

⁵ Adoiyosi ikes kwap ŋakipi nyetakanete; adoiyosi ikes kwap ŋakipi ikwa amoru.

⁶ Okoe Ekapolon, akan kon teten iŋes etoodiu apedor ŋina apolon nooi. akan kon teten iŋes abu kiela ŋimoe.

⁷ Ibu iyoŋ anapolou kon a ŋina ailiilon tobwaŋ ŋimoe kon; ibu iyoŋ anaŋoit kon tomurukudaa ikes ikwa ŋakasirim ŋuna etukitoe.

⁸ Ibu iyoŋ tokutak anam, totyakas ŋakipi ananam, apotu ŋakipi towua ikwa arwatata; apotu ŋakipi ŋuna aya nenicukul ananam kidiko.

⁹ Abu emoit tema, ‘Ewuapi ayoŋ ikes, aditari ayoŋ ikes, atyakatyakae ayoŋ ibore ŋini aŋatuni, aŋatari ayoŋ ŋiboro kec daadaŋ ŋulu acamit. Alemuni ayoŋ ekileŋ kaŋ, ido amunyari ayoŋ ikes a apedor kaŋ.’

¹⁰ Nai ibu iyoŋ kitukut ekuwuam kon, ido abu Anam kilelyaiya ikes. Apotu ikes tosiposi kwap ŋakipi ikwa asuwat ŋina apotyon, apotu ikes tosiposi kwap ŋakipi ŋunacukul nooi.

¹¹ Okoe Ekapolon, ŋae ikwaan ka iyoŋ anakujo a ŋunace? Ŋae ikwaan ka iyoŋ, iyakar iyoŋ apolou ŋina ailiilon a asegis, iyakar iyoŋ apolou ŋina itiyaa ŋakujuwuanisya, ka ŋaumonokineta.

¹² Ibu iyoŋ kikyaa akan kon ŋina aloteten, ido abu akwap kiliko ŋimoe kon.

¹³ Anamina kon a ŋina nyiryaŋiryaŋa, itenari iyoŋ ŋituŋa kon ŋulu idau iyoŋ alakun. Anagogoŋu kon ke elope, itenari iyoŋ ikes nakibois kon ŋina asegan.

¹⁴ Iirarete ŋituŋa a ŋakwapin ŋakiro nu tomaranikis make; ikamuni ekabule Ŋipilistin.

¹⁵ Ebuli nooi ŋirwosi ŋulu ke Edom, ikamuni ekabule ŋikarikok ŋulu a Moab; eemete Ŋikanaani daadaŋ nariet.

¹⁶ Emini ekabule ka akuryanu neni kec; anapedor a ŋina ka akan kon. Okoe Ekapolon! Itiiraete ikes ikwa amoru, akitodol ŋina elunyarotor ŋituŋa kon, itiiraete ikes akitodol ŋina elunyarotor ŋituŋa ŋulu ibu iyoŋ toiu.

¹⁷ Iyai iyoŋ ŋituŋa kon kisiboik ikes lomukura kon a elope, nakibois ŋina ibu iyoŋ Ekapolon kituruwo ŋina kon, nakibois ŋina asegan ŋina ibu iyoŋ Ekapolon kitemok a ŋakan kon.

¹⁸ Iyoŋ Ekapolon irubakini irae ekepukan ŋolo a ŋikaru ka ŋikaru.”

¹⁹ Ani elomarete ŋaŋolei ka ŋagaari ta ŋikametok ŋaŋolei a Parao Nanam, kinyakak Ekapolon ŋakipi ka Anam lopite ŋolopei sek ayakatar, toburusiyasi ŋakipi Ŋijipitian. Nai apotu Ŋisirael todoka Anam ŋin eonit neni etorete ikes.

Eete a Miriam

²⁰ Tolemu nai nakaato ka Aron ŋina arae akadwaran, ŋina anyaritae Miriam ebur, kiwuapakis ŋaberu daadaŋ iŋes etiŋito ŋiburin kidoŋaete.

²¹ Toeik Miriam ikes eete lo tema, “Oeikisi neni ke Ekapolon, anerae etopolooritae iŋes nooi aŋuna elounia ŋimoe; emasak iŋes ŋaŋolei ka ŋikametok kec nanam.”

Kitobobounoe ŋakipi ŋuna sek adwarak

²² Kitena nai Moses Ŋisirael a Nanam a ŋina Areŋan, toloto ikes naloŋisat ŋina enyaritae Sur. Toloto ikes analoŋisat todol ŋirwa ŋiuni nyeryamuna ŋakipi.

²³ Ani edolunete neni enyaritae Mara, nyepedosi akimat ŋakipi akibois a ŋin, anerae adwarak. (Aŋuna adwaryata ŋakipi a nen iŋes anyaritere akibois ŋin Mara.)

²⁴ Kiŋuruŋura ŋituŋa neni a Moses kiŋita temasi, “Nyo ikimasi isua?”

²⁵ Kikalou Moses neni ke Ekapolon, ido abu Ekapolon kitoodik akitoe ŋinadio cici, kimasak Moses akitoe ŋin nakipi, tobobout ŋakipi ŋuna sek adwarak. Abu nai Ekapolon inak Ŋisirael ŋikisila ka ŋuna atubunit iŋes, kikatak ikes

²⁶ tema, “Ani kiwuapa iyes ejok ŋuna irworo Ekapolon Akuj kus, ido kitiyata ŋuna iyookino alokiŋaren kaŋ, totamunito nooi akiwuapit ŋakiciketa ka ŋikisila kaŋ daadaŋ, nyayauni ayoŋ neni kus adio a ŋakisicaneta a ŋuna abu ayoŋ esicania Ŋijipitian, anerae arae ayoŋ Ekapolon ŋolo eketaŋaleununui iyes.”

²⁷ Todolut nai Ŋisirael neni enyaritae Elim, neni aya ŋilelyan ŋitomon ka ŋiarei ka ŋiŋolya ŋatomonikanikaarei; toloma nen diyete ŋakipi.