Awos. 14 - Ebaibul

Akidok anam ŋina Areŋan

¹ Tema nai Ekapolon neni a Moses,

² “Tolimok Ŋisirael toboŋut toloma kiŋaren Piakiros, kidiŋ Migidol ka Anam ŋina Areŋan. Emaikina iyes toloma diyete anam, kiteos ka Baal-Sepon.

³ Einakini nen Parao atamakin ebe, ‘Irimirimete Ŋisirael akwap pa eyenete neni lotot; eretak ikes aloŋisat.’

⁴ Etogogoŋi ayoŋ akou a Parao, ido ikiwuapak iyes, ikotere ayoŋ oryamu apolou anakiloun Parao ka ŋasigarya keŋ daadaŋ ka eyenunete Ŋijipitian atemar arae ayoŋ Ekapolon.” Apotu Ŋisirael kitiyata ŋun.

⁵ Ani elimokinio erwosit a Ijipit atemar kesiwa Ŋisirael, kibelekis iŋes ka ŋulu epukatotor ŋatameta kec, temasi iŋitasi, “Nyo etiyae iwon, ŋini ikisimyek iwon Ŋisirael torotokis anakitiyanakin iwon?”

⁶ Aŋun, abu Parao kisitemok ŋituŋa agaari keŋ ŋina iritae a ŋaŋolei, ido abu torukosi ka ŋasigarya keŋ.

⁷ Tosyaa iŋes ŋagaari ŋamiae ŋakanikapei ŋuna iritae a ŋaŋolei ka ya ŋagaari a Ijipit ŋunace daadaŋ, kitodoka ŋikapolok ŋulu epukatotor iŋes nagaari ŋun daadaŋ.

⁸ Abu Ekapolon kitogogoŋ akou a Parao a erwosit a Ijipit kisiwuap iŋes Ŋisirael ŋulu apotu torotokis anakwap keŋ erae ŋikelounak ŋulu alakara.

⁹ Kiwuapakis Ŋijipitian Ŋisirael, toloto ŋaŋolei ka ŋagaari a Parao daadaŋ, ŋikametok ŋagaari keŋ daŋ ta ŋasigarya keŋ. Toditasi Ŋijipitian Ŋisirael alodiyete Anam ŋina Areŋan aneni alomito, aneni anyaritae Piakiros, alokiŋaren Baal-Sepon.

¹⁰ Ani eapiyari Parao neni a Ŋisirael, kiŋoliyasi Ŋisirael kaku, kiŋolikis Ŋijipitian eponito neni kec keapuut. Kikalout Ŋisirael nooi neni ke Ekapolon, anerae abu akuryanu min neni kec.

¹¹ Kiŋita ikes Moses temasi, “Amam mono neni ikinukio isua alo Ijipit ikiyaunia iyoŋ isua atwanare a ne analoŋisat a? Anukiro nu ŋuna itiya iyoŋ neni kosi, ŋuna ikiyaunia iyoŋ isua alo Ijipit?

¹² Pa mono ikilimokinitae isua iyoŋ alo Ijipit ebe, ‘Kimyekinae isua make etiyanakisi Ŋijipitian a’? Ajok ro isua akitiyanakin Ŋijipitian akilo atwaniun naloŋisat.”

¹³ Abu nai Moses toboŋok ŋituŋa tema, “Nyikuryaketa. Kicata, iŋolikinete iyes alakuno ŋina ikiinakini iyes Ekapolon nakoloŋit na. Ŋijipitian ŋul ŋulu itete iyes tokona, nyiŋolikinete nabo iyes ikes jik.

¹⁴ Eji Ekapolon aŋuna kus; emaikina iyes tolemasi akuryanu bon aneni kus.”

¹⁵ Kiŋit nai Ekapolon Moses tema, “Kaanukiro ikigworonokinio iyoŋ ayoŋ? Tolimok Ŋisirael torubakis elosete kiŋaren.

¹⁶ Kikyaa akan kon kidiama anam itiŋit ebela kon, ikotere etyakasi ŋakipi ananam kitoro Ŋisirael neni eonit, todokasi yaye anam.

¹⁷ Etogogoŋi ayoŋ ŋakyes a Ŋijipitian, tolomasi nanam kiwuapakis Ŋisirael. Eketopoloorete ayoŋ Parao ka ŋasigarya keŋ daadaŋ; ŋikametok ŋagaari keŋ ka ŋikametok ŋaŋolei keŋ.

¹⁸ Eyenunete Ŋijipitian atemar arae ayoŋ Ekapolon apaki ŋina eketopolooryata ayoŋ Parao ka ŋagaari keŋ ta ŋikametok ŋaŋolei keŋ.”

¹⁹ Abu nai emalaika ka Akuj ŋolo sek eŋarenikinit ajore a Ŋisirael toboŋo kaku ajore. Toboŋo adis daŋ kaku towo alokaku ajore a Ŋisirael,

²⁰ alokidiŋ ajore a Ŋijipitian ka ŋina a Ŋisirael, akuwar kya abu adis ŋin yau akiryonut lowae ŋolo a Ŋijipitian ka akica lowae ŋolo a Ŋisirael; apotu ŋajorei ŋun nyeapikin akuwar daadaŋ.

²¹ Kikyaa nai Moses akan keŋ kidiama Nanam, ido abu Ekapolon akuwar ŋin daadaŋ totub ŋakipi ananam, kitoon nen a ekuwuam a ŋolo akutunit alo Kide.

²² Tolomasi Ŋisirael Nanam ŋina Areŋan, kitoro neni aonit. Arounito ikes ŋakipi aloteten ka alokedyeny esibit ŋarwatatain.

²³ Kiwuapakis Ŋijipitian ikes, tolomasi Nanam ŋina Areŋan, tolomasi ŋaŋolei, ŋagaari ka ŋikametok ŋagaari a Parao daadaŋ Nanam.

²⁴ Ani eapuuni akiwalar, toripiu Ekapolon kwap anadis ka anarira, kiŋolik ŋasigarya a Ŋijipitian, kisibiler ikes.

²⁵ Tomunana ŋakejen a ŋagaari kec, nyitepedo Ŋijipitian amyaar ikes. Temasi nai Ŋijipitian, “Oema aneni a Ŋisirael! Iŋarakinit Ekapolon Ŋisirael akitijiore iwon Ŋijipitian.”

Kitamata ŋakipi Ŋijipitian

²⁶ Tema nai Ekapolon neni a Moses, “Kikyaa akan kon kidiama Nanam, ikotere imorikinosi ŋakipi kitamata Ŋijipitian kaapei ka ŋikametok ŋagaari, tosiposi ŋagaari kec alokidiŋ Anam.”

²⁷ Aŋun, abu Moses kikyaa akan keŋ kidiama Nanam, ani ereŋuni akide iwalari, kilelyakin ŋakipi lopite ŋolopei sek ayakatar nanam. Ani eemete Ŋijipitian alokidiŋ anam aneni aonit, tomunya Ekapolon Ŋijipitian a Nanam.

²⁸ Toboŋokis ŋakipi ayakau lopite ŋolopei sek ayakatar, toburusiyasi ŋagaari ka toara ŋikametok kec kaapei ka ŋasigarya a Parao daadaŋ ŋuna sek ewuapito Ŋisirael alokidiŋ Anam, mam ipei daŋ abu kidoŋ.

²⁹ Nai apotu Ŋisirael todoka Anam eonit neni alosyoto ikes ka erounito ikes ŋakipi esibit ŋarwatatain aloteten ka alokedyeny kec.

³⁰ Abu Ekapolon toiu Ŋisirael akoloŋit ŋin anakan a Ŋijipitian. Kiŋolikis Ŋisirael Ŋijipitian ileeuyete etwakito alokipetot ka Anam.

³¹ Ani iŋolikinete Ŋisirael apedor ŋina apolon ŋina abu Ekapolon kitoodik Ŋijipitian, apotu Ŋisirael tokera Ekapolon, ido kikinyoma iŋes ka Moses eketiyan keŋ.