Awos. 11 - Ebaibul

Tolimokinae Parao toceite akisicanet ŋina ebuni ekaku a daadaŋ

¹ Tema nai Ekapolon neni a Moses, “Ayauni ayoŋ akisicanet apei nabo neni a Parao ka nakwap a Ijipit. Ekaku ka akisicanet a ŋin, ikimyekini iŋes iyes torotokis a ne, ido ani ikimyekini iŋes iyes, ikiritari iŋes iyes jik.

² Tolimok ŋituŋa atemar emaikina ŋikilyok ka ŋaberu kiŋita ŋikidunyetkec ŋiboro ŋulu itiyaunitae ke esilipa ka egolid.”

³ (Abu Ekapolon inak Ŋijipitian arimaanikin Ŋisirael, ido abu Moses toruwor ŋolo etopoloorito ŋulu epukatotor Parao ka ŋituŋa ŋulu a Ijipit daŋ.)

⁴ Tema Moses neni a Parao, “Ŋakiro ŋuna irworo Ekapolon ikes nu: Ani takae eapuuni akidil akuwar, erimokini ayoŋ akwap a Ijipit daadaŋ.

⁵ Aari ayoŋ ŋikiyae ŋulusapa daadaŋ anakwap a Ijipit, akisyakin anikiyae a Parao a ŋinisapat a ŋini emaikina kisiboikinoe lokicoloŋ akipuka, tari nikiyae ŋinisapat ŋini a apito a ŋina eyai diyete amoru ŋinakiryeet. Aari ayoŋ tari ŋikiyae daadaŋ ŋulu a ŋibaren.

⁶ Eyakaun nai akigworo ŋina apolon nakwap a Ijipit daadaŋ, akigworo ŋina nyiirara ŋinapei koloŋ ka nyiiraryo nabo jik.

⁷ Nai mam iŋok ikomokini Ŋisirael, kerae neni a ekile, kori neni a ibarasit kec. Ŋun nai iyenunia iyoŋ atyeketait ŋina ewuak Ekapolon kidiŋ Ŋijipitian ka Ŋisirael.”

⁸ Tema nai Moses irikakini erwor keŋ, “Epote ŋikapolok kus lu daadaŋ neni kaŋ, toryediko alokiŋaren kaŋ ebasi, ‘Apesi, iyoŋ kaapei ka ŋituŋa kon.’ Ekaku a ŋun, arotokini ayoŋ.” Torotok nai Moses aneni a Parao eŋoit nooi.

⁹ Tema Ekapolon neni a Moses, “Nyepupokini Parao ŋakiro kon, anerae emaikina ŋaumonokineta kaŋ tolalata anakwap a Ijipit.”

¹⁰ Apotu Moses ka Aron kitiyata ŋaumonokineta ŋun daadaŋ alokiŋaren a Parao, nai abu Ekapolon kitogogoŋ akou a Parao, nyecamak Ŋisirael toloto anakwap keŋ.