Aum. 5 - Ebaibul

Adyekitoi aŋuna ka akisyonio

¹ Okoe Ekapolon, totamu ŋakiro ŋuna etiyakinosi neni kosi, kiŋoliu neni kosi, ikotere kiŋolik epite ŋolo ikijamuwarere isua.

² Aruwor akwap kosi ŋina a ŋigelaanotin, aruwor ŋirerya kosi ŋulu a ŋituŋa a ŋakwapin a ŋace.

³ Aruworoi isua ŋikokyok, adaun atapapa kosi, ekwaanikin atatoto kosi ka ŋapuseru.

⁴ Ikireikin isua akigyel ŋakipi ŋuna emasyo, ikireikin isua akigyel ŋakito ŋuna inokyo.

⁵ Ikimetae ka aryenyeo lopite ŋolo emetere ŋisigirya, kori ŋikaala, ikiup isua, nai nyikicamakinitae isua eeŋutu.

⁶ Aponi isua tocamunae ikipukaete ŋituŋa a Ijipit ka Asiriya, ikotere isua ikiryamuni akimuj ŋina ikitemokino.

⁷ Apotu atapapa kosi toseca, emam tokona ikes a ne, ikiryamunit tokona isua ŋican aŋuna a ŋasecisya kec.

⁸ Ikipukato tokona isua ŋituŋa ŋulu nyejokak akilo tari ŋipi, emam ituŋanan ikiuni isua anapedor kec.

⁹ Ejalitae isua akiyar kosi iwaritae akimuj, anerae eyakasi ŋimoe kosi neni daadaŋ eyai akimuj anariet.

¹⁰ Etomwan pe akoro ŋawat kosi, ekokis emwaka ekeno, amwakut pe ŋamunyin a ŋawat kosi, ekokis emwaka ekitet.

¹¹ Aloma ŋituŋa ŋaberu kosi alo Sion, areikis ŋituŋa ŋapesur alotaunio a Yudaya ŋuna sek nyiryamanakina ka ŋikilyok akiryamakin ka ikes.

¹² Arikonor ŋikarikok kosi, enenonokin lopirin; mam ituŋanan itopoloorit ŋikasikou kosi.

¹³ Ereikinitae ŋisorok kosi akiryere ikwa ŋipi; iryaŋanarosi ŋidyain edakito ŋakito ŋuna apotyok.

¹⁴ Nyeriŋa ŋikasikou iboiyonokin lopuke ŋolo ke etaun akitub ŋakiro, nyeriŋa ŋisorok ecunanakin aeore.

¹⁵ Adaun alelyanu alotai kosi; edoŋao paaran isua aŋuna ka alelyanu, nai tokona ikigworo aŋuna ka akiyaloloŋ.

¹⁶ Adaun ibore daadaŋ ŋini sek ikituror isua. Aponi isua tosecae, ido tokona ikiryamunit isua ŋican.

¹⁷ Aŋun, eyalaar ŋitai kosi ka amuumu ŋakonyen kosi,

¹⁸ anerae asilyor emukura ŋolo a Sion aruwor ereŋorot; irimito ŋikweei anaduketa keŋ a ŋuna eritanakina.

¹⁹ Nai okoe Ekapolon, iyoŋ irae erwosit ŋolo a ŋikaru ka ŋikaru. Erubakini apukan kon ananyameta a daadaŋ.

²⁰ Kaanukiro irubakinia iyoŋ pa ikitamunit isua apaki ŋina aoyan? Kaanukiro ikimyekinia iyoŋ isua ŋirwa ŋulu alalak?

²¹ Kinyakunae isua neni kon okoe Ekapolon, ikotere isua ikiboŋuni neni kon. Inakinae isua ekiboiye ŋolo ajokan ŋolo ikwaan ka ŋolo paaran a ekiŋaren.

²² Ikiŋer mono iyoŋ isua ŋikaru ka ŋikaru a? Mam mono apaki ŋina emaikina aŋoit kon todaunor a?