Aum. 2 - Ebaibul

Kiyookin ŋuna sek alimunit Akuj

¹ Adau bareca Ekapolon anaŋoit keŋ atubun akisican ŋituŋa a Sion! Eturuwo iŋes akibuses ŋina ailiilon ŋina a Isirael acaryoit. Abu Ekapolon kimyek Akai keŋ akoloŋit ŋina abunio iŋes toŋoya.

² Amunya Ekapolon emam akisyon ŋirerya daadaŋ ŋulu a ŋituŋa a Yakob; amunyumunyaki kwap ŋaduketa ŋunajiet ŋuna agogoŋok ŋuna a ŋituŋa a Yudaya. Eturuwo apukan a Yudaya akoŋinait ka eturuwo ŋikepukak a Yudaya ŋikoŋinae.

³ Anaŋoit keŋ a ŋina adedeŋan, alema Ekapolon ŋikagogoŋok daadaŋ anakwap a Isirael; awou akiŋarakin ikes epote ŋimoe. Amunya iŋes ŋituŋa a Yakob lopite ŋolo enyamuwarya akim ibore daadaŋ.

⁴ Amunya Ekapolon ŋituŋa keŋ ŋulu sek ikinyomit, amunya Ekapolon ŋituŋa daadaŋ ŋulu sek ikiruunitor iwon alotuŋa a Sion; amunya Ekapolon ŋituŋa keŋ anaŋoit lopite ŋolo enyamuwarya akim ibore.

⁵ Ekwaanikin Ekapolon aneni yok ka ŋimoe; amunya iŋes Ŋisirael; amunya ŋakais daadaŋ ŋuna iboiyoto ŋirwosi a Isirael, aritaki kwap ka eturuwo ŋaduketa kec ŋunajiet ŋireŋoroto, etalal nooi akigworo ka aumonokin alotuŋa a Yudaya.

⁶ Abwaŋabwaŋaa Akai keŋ neni sek ilipere iŋes, eela lopite ŋolo ielarya ituŋanan akai ŋina edukit lomanikor, amunaiya iŋes Akai ŋina ilipere iŋes; alema Ekapolon alo Sion ŋasuban ŋuna sek inumunumyo ka ŋirwa ŋulu a Sabato; aŋer iŋes anaŋoit keŋ a ŋina a dedeŋan erwosit ka esacaradoti.

⁷ Aŋer Ekapolon Namuroet keŋ, emyek akibois keŋ ŋina asegan. Acamaki ŋimoe ebwaŋabwaŋaarete ŋarwatatain a ŋakais a ŋuna iboiyoto ŋirwosi, ecelasi ŋimoe alo Kai ke Ekapolon itoodiunito atemar adaut ikes akiloun, ecelasi lopite ŋolo sek ecelatar ŋituŋa apaki ŋina a ŋasuban.

⁸ Adau Ekapolon atubun atemar toritakinae ŋarwatatain a Sion kwap. Adau Ekapolon akipim aoyau a ŋarwatatain a Sion, ikotere eritaari daadaŋ, nyeŋayaŋaya Ekapolon aritaar ikes. Aritaiya Ekapolon ŋakais ŋuna aoyak ka ŋarwatatain, eperete daadaŋ alokwap.

⁹ Aritaar ŋipukei a arwatata emuleleiyasi ŋamoru, amunaiya ka abilibilaa Ekapolon ŋasuwa ŋuna sek ilorere ŋikekya. Arikor nakwapin erwosit a Yerusalem ka ŋikapolok ŋulu epukatotor iŋes. Adaun ŋikisila. Nyisileerekino Ekapolon ŋikadwarak ŋakiro keŋ anakirujaeta.

¹⁰ Iboiyete ŋikasikou a Yerusalem alokwap ililiŋete cek; ipuripurito apuwa nakyes kec ka enapito ŋiguniyae; ijuuruyete ŋasorok ŋuna a Yerusalem.

¹¹ Amuumu ŋakonyen kaŋ aŋuna ka akigworo, eryebete ŋakiro etau kaŋ nooi. Akaup ayoŋ akiyaloloŋ aŋuna amunyarere ŋituŋa kaŋ ka aŋuna iridyata ŋidwe ka ŋiŋwea alorotin a ŋulu ke etaun.

¹² Igworosi a nen atatoto kec ebasi, “Ai eyai ibore ŋini ikinyami ka ikimasi isua?” Irworosi ikes ŋun iridete esibito ŋikilyok ŋulu ewanawanatae kimyekinae eperete alorotin a etaun. irworosi ikes ŋun iridete edakito atatoto kec ikes.

¹³ Okoe ŋituŋa a Yerusalem, anukiro tokona alimuni ayoŋ aŋuna kus? Nyo ekesikwaanikinia ayoŋ iyes? Ŋae tokona ekesikwaanikinia ayoŋ iyes ikotere ayoŋ ekesirworiuni iyes? Mam ekisal a ŋican kus, ikwaan ka neni emamukar esal ŋolo ka anam; mam ituŋanan epedori akiteyar iyes nabo.

¹⁴ Apotu ŋikadwarak kus kirujata aŋuna kus alyokonu ka ŋakiro ŋunacaryo, nyisileerekino ikes iyes ŋasecisya kus, ikotere iyes nyikirikor nakwapin. Nai apotu kirujata aŋuna kus alyokonu, ikiinakis iyes akinup ŋakiro ŋuna nyiyookino.

¹⁵ Ŋituŋa daadaŋ ŋulu itorunete Yerusalem, eramete ŋatorobwo eumokinito aŋuna kus. Epodosi ka imuŋimuŋete ŋakyes eumokinito aŋuna a ŋituŋa a Yerusalem ebasi, “Erae mono lo etaun ŋolo paaran ebus nooi akilo a? Erae mono lo etaun ŋolo paaran alelakinito ŋituŋa daadaŋ anakwap a?”

¹⁶ Ikikyenatar iyes ŋimoe kus daadaŋ; ikijuutiyanarete iyes ka ikimwanakinete ebasi, “Adaun ro iwon amunaar iŋes! Okoe, arae ro akoloŋit edaritae iwon na, etemokin tokona, ikiŋolik iwon!”

¹⁷ Etiya tokona Ekapolon ŋuna sek acamit akitiya; esiyook ŋakiro keŋ ŋunakoloŋ aris kitemok atemar kitiyakin. Ikimunya iŋes iwon emam akisyon, ainaki ŋimoe alelyan aŋuna ka akiloun iyes, ainaki agogoŋu neni a ŋimoe kus.

¹⁸ Okoe ŋituŋa a Yerusalem, kigworonokisi Ekapolon, kimyekisi ŋakiyo kus tolelyata ikwa ŋaŋololin nakwaare ka naparan. Torubakisi igworosi ŋapakio daadaŋ, nyitubo ŋakiyo anakonyen kus.

¹⁹ Tonyoutu, kigworonokisi Ekapolon akuwar kia, toboŋonokisi akigworonokin Ekapolon nakwaare, tolimokisi Ekapolon ŋakiro daadaŋ ŋuna eya lotai kus, kilipa neni keŋ ikyaarito ŋakan aŋuna a ŋidwe kus a ŋulu iridete alorotin a daadaŋ aŋuna ka akoro.

²⁰ Okoe Ekapolon, kiŋolik mono iyoŋ! Ŋae mono ŋinapei isican iyoŋ lopite lo? Emaikina mono ŋaberu tonyama ŋidwe kec ŋulu adaut ikes akitanun a?

²¹ Emaikina mono ŋisacaradotin ka ŋikadwarak toarakinae Kai a Ekapolon a? Eperete ŋawat a ŋisorok ka ŋikasikou alorotin a etaun, aar ŋimoe ŋisorok ka ŋasorok kosi. Ibu iyoŋ Ekapolon toar ikes akoloŋit ŋina iŋoitor iyoŋ, ibu toar ikes emam akisyon.

²² Ibu iyoŋ tonyarau ŋimoe kosi alowaetin kosi a daadaŋ esibit ŋituŋa ŋulu enyaraunitae nasuban. Emam ituŋanan abu tobucar, kori toyar akoloŋit ŋina iŋoitor iyoŋ. Apotu ŋimoe toara ŋidwe kosi ŋulu aponi isua todakae ka kitopolounoe.