Amos 4 - Ebaibul

¹ Torubak Amos irworo tema, “Kiirasi ŋakiro nu iyes ŋaberu ŋuna iboiyete alo Samaria, iyes ŋuna itumito ikwa ŋaatuk ŋuna edakasi Basan, iyes ŋuna isicanito ŋikulyak ka iimakinito ŋulu eyakatar akiitanit, iyes ŋuna ilimonokinete ŋikilyok kus atemar inakinae isua ikotere ikimasi!

² Ekoŋ Ekapolon Akuj ŋina Asegan atemar, kire jik, edoluni apaki ŋina ikirikorere iyes a ŋikodoce, ikirikoryo iyes daadaŋ a ŋikodoce ikwa ŋikolya.

³ Ikirikoryo iyes ikitorere neni eorori anarwatata a etaun, ŋinituŋanan ka akeŋ, ikimasar Arinon.

⁴ “Toloto Besel, ido tosecesecata a nen, toloto Gilgal, ido kitalalata ŋasecisya kus, yaununutu a ŋina taparacu ŋamuronisya kus, yaununutu atutubet apei alotooma ŋitomon a ŋiboro kus a ŋinapaki erae ainakinet epete ŋirwauni,

⁵ Yautu anacamit kus ainakinet ŋina a ŋamugati a ŋuna emam ŋakinyalet, tolimonosi iturosi ŋainakineta kus ŋuna iinanakinete iyes anacamit kus, anerae ŋuna iminasi iyes akitiya ŋun, okoe ŋituŋa a Isirael.”

Towou Isirael akiwuap ŋuna alimuni Ekapolon

⁶ Torubak Amos irworo tema, “Ebala Ekapolon, ‘Abu ayoŋ ekesican iyes a akoro alotaunio kus a daadaŋ, abu akimuj tomamuun anakiboisyo kus a daadaŋ; nai ipotu iyes nyikiwa.

⁷ Abu daŋ ayoŋ nyekeyakik iyes akiru apaki ŋina edoŋitor ŋilapyo ŋiuni bon todol apaki ŋina elemere ŋikinyom. Abu ayoŋ eyaku akiru lotaun epei, nai nyeyakik akiru lotaun ece, ayai akiru lomanikor epei nai emanikor ŋolo amam akiru, apotu ŋikinyom keŋ toiniyasi,

⁸ aŋun, apotu ŋituŋa ke etaun a epei toloto lotaun ece aryamun ŋakipi ŋuna emasete, nai apotu nyeryamut ŋuna itemokino ikes; nai ipotu iyes nyikiwa.

⁹ “‘Abu ayoŋ eyakuu ekuwuam ŋolo amwanan ka ekurut ŋolo eremi ŋikinyom alomanikorin kus, abu ayoŋ etoon ŋimanikorin kus ŋulu a ŋikinyom ka ŋulu a epiini, abu emaase kirika ŋikito kus ŋulu a ŋiboboryo ka ŋulu ka Olipa, nai ipotu iyes nyikiwa.

¹⁰ Abu ayoŋ ekeyakik iyes ŋakisicaneta lopite ŋolo abunio eyakikinia nakwap a Ijipit; abu ayoŋ oar ŋisorok kus a ekileŋ, abu ayoŋ emyek tomyaarae ŋaŋolei kus, ido abu ayoŋ etobos tul ŋakiboisyo kus, nai ipotu iyes nyikiwa.

¹¹ “‘Abu ayoŋ okomunya iyes ŋice, lopite ŋolo abunio omunyarya ŋituŋa a Sodoma ka Gomora, iyes ŋulu ipotu toiunos anamunyaro, ikwaan iyes ka ŋakito elemunio anakim, nai ipotu iyes nyikiwa.

¹² Aŋun, abuni ayoŋ akisican iyes, okoe Ŋisirael, aŋuna abunio ayoŋ akitiya ŋun, totena akiryamun ka Akuj kus ŋina ebuni atubokin iyes.

¹³ “‘Kiirasi mono iyes iŋes ŋolo abu tosub ŋimoru ka ekuwuam, iŋes ŋolo isileerekini ŋituŋa ŋatameta keŋ ka iloconokini akuwar toruwor apaaran, iŋes ŋolo ipukat nakuj ka akwap, erae ekiro keŋ Ekapolon Akuj ŋina a ŋajoresyo.’”