Amos 3 - Ebaibul

Asecit a Isirael ka akisicanio

¹ Tema Amos, “Kiirasi ŋakiro nu ŋuna irworo Ekapolon neni kus ikitoroniyarit iyes ŋituŋa a Isirael, iyes ŋituŋa daadaŋ ŋulu abu Ekapolon ikiyau anakwap a ŋina a Ijipit.

² Alimu Ekapolon ŋakiro nu ebe, ‘Iyes bon abu ayoŋ okoyenu ka ekeric alokidiŋ ŋituŋa a ŋakwapin a daadaŋ, aŋun, ekesicani ayoŋ iyes aŋuna a ŋasecisya kus.’

³ “Epedorete mono ŋituŋa ŋiarei arukit alorot elosete pa sek keyeunito ikes alosit kaapei a?

⁴ Epedori mono eŋatuny akiruruma anamoni kemam etyaŋ ŋolo ikamunit a? Epedori mono itaok a eŋatuny arwore anadui keŋ pa enyamit ediotyaŋ a?

⁵ Epedori mono akirum ikienyit erae kemam atawuatat elokakinitae a? Epedori mono atawuatat ayatakin kemam ibore eyatakinit a?

⁶ Ani mono keruu abureryaŋ a emesek alotaun, nyetiŋi mono ekabule ŋituŋa a? Epedorete mono ŋican adolokin etaun pa kecamaki Ekapolon a?

⁷ “Kire, nyitiyakini Ekapolon Akuj ŋadikiro nyisileerekino neni a ŋiketiyak keŋ a ŋikadwarak ŋuna imunono ŋuna eyeunit iŋes akitiya.

⁸ Erurumak eŋatuny, ŋae nyebuli? Erworik Ekapolon Akuj, ŋae nyepedori akidwar?

⁹ Kiserakisi ŋulu iboiyete anakais a ŋunajipit a ŋuna alo Acidod ka anakais a ŋunajiet alo Ijipit atemar, Tocunakinos lokamukumukui ŋulu a Samaria, ido kiŋolikis epite ŋolo iŋodiatar ŋituŋa alotaun ka epite ŋolo isicanatar ikes make.”

¹⁰ Alimu Ekapolon Akuj ŋakiro nu ebe, “Nyeyenete ikes akitiya ŋuna iyookino, eryenyaanikinito ŋulu iboiyete anakais a ŋuna ka apukan ŋituŋa ka eŋatanarete ŋiboro kec.”

¹¹ Aŋun, alimu Ekapolon ŋakiro nu ebe, “Irikaunete ŋimoe akwap kus kirimokis kidiŋ, eritakinete kwap ŋaduketa kus ŋunajiet, ido toŋatasi ŋiboro daadaŋ anakais kus a ŋuna ka apukan.”

¹² Alimu Ekapolon ŋakiro nu ebe, “Ikwaŋina edemunia ekeyokon eŋatuny ŋakejen a ibarasit ŋaarei, kori akit bon a akine keŋ, ŋituŋa a Isirael ŋidikudyo ŋulu iboiyete alo Samaria eiunio, ido eemyata ikes ŋakejen a ekitaada ka akicoloŋ bon.”

¹³ Alimu Ekapolon Akuj ŋina a ŋajoresyo ŋakiro nu aŋuna a ŋiletok a Yakob,

¹⁴ “Akoloŋit ŋina esicania ayoŋ ŋituŋa a Isirael aŋuna a ŋasecisya kec, amunaari ayoŋ ŋamuroeta ŋuna eya lotaun Besel, atubori ayoŋ ŋamomwar ŋuna eya lokoonae a Ŋamuroeta tocakakin kwap.

¹⁵ Enyasuni ayoŋ ŋakais kec ŋuna edukitoe lotaunio ka ŋuna edukitoe lorerya, edaunosi ŋakais ŋuna edukitoe a ŋikyal a ŋitome, edaunosi ŋakais ŋuna apolok nooi.”