Amos 2 - Ebaibul

¹ Alimu Ekapolon ŋakiro nu ebe, “Aŋuna arubakiniata ŋituŋa a Moab itiyaete ŋasecisya ŋuna alalak nooi, nyaesikini ayoŋ akisican ikes, anerae apotu ikes kicunya ŋakoyo a erwosit ke Edom toruwor ekuron.

² Aŋun, emyekini ayoŋ akim tonom Moab, enomiyari akim ŋaduketa a etaun Kerios ŋunajiet, etwakete ŋituŋa a Moab ŋulu alalak apaki ŋina eyakaunor aruruma, ecelet ka eruye a abureryaŋ a emesek.

³ Aari ayoŋ ekepukan a ŋituŋa a ŋul, ido amunyari ŋikepukak daadaŋ ŋulu a ŋituŋa a ŋul kaapei ka ekepukan kec.”

Atubokino a Yudaya

⁴ Tema Amos, “Alimu Ekapolon ŋakiro nu ebe, ‘Aŋuna arubakiniata ŋituŋa a Yudaya itiyaete ŋasecisya ŋuna alalak nooi, nyaesikini ayoŋ akisican ikes, anerae aŋero ikes akiwuap ŋikisila kaŋ ka nyiwuapa ikes ŋakiro ŋuna atubunit ayoŋ, nai etooliyo ikes alyokonu ŋinapei apotu atapapaa kec kiwuapa.

⁵ Aŋun, emyekini ayoŋ akim tonom Yudaya, enomiyari akim ŋaduketa a Yerusalem ŋunajiet.’ ”

Atubokino a Isirael

⁶ Tema Amos, “Alimu Ekapolon ŋakiro nu ebe, ‘Aŋuna arubakiniata ŋituŋa ka akwap a Isirael itiyaete ŋasecisya ŋuna alalak nooi, nyaesikini ayoŋ akisican ikes, anerae egyelanarete Ŋisirael ŋituŋa kec ŋulu iyookino a esilipa, egyelanarete ikes ŋituŋa ŋulu eyakatar akiitanit a egyelit a ŋamuk a ŋaarei,

⁷ iimakinito ikes ŋituŋa kec ŋulu a ŋican, nyecamito ikes akiŋarakin ŋulu eyakatar akiitanit. Ituruworito lokoku ka papa keŋ apese apei aberu kec, aŋun, enyasut ikes ekiro kaŋ ŋolo asegan;

⁸ eperete ikes alodiyete ŋamuroeta daadaŋ enapito ŋilowi ŋulu ijaunitae ituŋanan aŋuna a ŋamicae, ido emasete alo Kai ka Akuj kec epiini ŋolo itelemunio ituŋanan ŋini esecit.

⁹ Torae bo abu ayoŋ omunya Ŋiamori alokiŋaren kec, arae Ŋiamori ŋituŋa ŋulu aoyak ikwa ŋikito a Cedar ka agogoŋ ikes ikwa ŋikuyono; abu ayoŋ omunya ikes jik ŋinapei alokidiama tari nataagor.

¹⁰ Nabo abu ayoŋ okoyau iyes anakwap a Ijipit, okorik iyes ŋikaru ŋatomoniomwon analoŋisat, ikotere okoinak iyes akwap a Ŋiamori.

¹¹ Abu daŋ ayoŋ oseu ŋidwe kus ŋice eturuwo ŋikadwarak, eturuwo ŋisorok kus ŋice Ŋinasari Okoe ŋituŋa a Isirael, nyeriyan mono ŋakiro ŋun a?’ ”

¹² “‘Nai ipotu iyes kitamata epiini Ŋinasari epiini, ido tolimokis ŋikadwarak atemar nyecamakinitae iyes akidwar.

¹³ Aŋun, ekeimakini ayoŋ iyes neni iboiyoto iyes, lopite ŋolopei iimaror kwap agaari ŋina ileleba ŋikinyom,

¹⁴ Nyeiunosi tari ŋituŋa ŋulu sek apiranak ekerete, epalagunete ŋituŋa ŋulu sek agogoŋok, nyepedorete tari ŋituŋa ŋulu ajiok nooi aiun akiyar kec;

¹⁵ ebwaŋasi ŋikajiok a ŋikaleŋeleŋe, nyepedorete tari ŋituŋa ŋulu apiranak aiun, nyepedorete tari ŋituŋa ŋulu emeto ŋaŋolei aiun.

¹⁶ Akoloŋit ŋin, esurosi elerete ŋasigarya ŋuna sek adedeŋak.’ ”