Amos 1 - Ebaibul

¹ Erae nu ŋakiro ka Amos a ŋolo arae epei a ŋikeyokok alotaun a ŋolo anyaritae Tekoa. Abu Akuj kisileerek Amos aŋuna a Isirael alorwa a ŋulu epukator Usia Yudaya, kipukate Yeroboam lokoku a Yoas Isirael. Esileerekini Akuj Amos ŋakiro nu ŋikaru ŋiarei eriŋa nyeyakauna amaranikinet ka akwap.

Atubokino a ŋikidunyet a Isirael

² Tema Amos, “Ipopolae Ekapolon alo Sion, egiro etoil keŋ alo Yerusalem; aoko ŋinya aneni edakasi ŋibaren. aoko alomoru Karimel.”

³ Alimu Ekapolon ŋakiro nu ebe, “Aŋuna arubakiniata ŋituŋa a Damasko itiyaete ŋasecisya ŋuna alalak nooi, nyaesikini ayoŋ akisican ikes, anerae apotu ikes kisicana ŋituŋa a Gilead, kidica ikes lopite ŋolo eramere ŋimomwa.

⁴ Aŋun, emyekini ayoŋ akim tonom ekal ka Asael, enomiyari akim ŋaduketa ŋuna ka Ben-Adad ŋunajiet.

⁵ Eelari ayoŋ ŋasuwa ŋuna edukitere epuke a Damasko, ido amunyari ŋituŋa daadaŋ ŋulu iboiyete anakadipaalat ka Apen, alemari ayoŋ ŋini eyakar apedor alo Bes-Eden, erikoryo ŋituŋa ka Aram nakwap a Kir.”

⁶ Alimu Ekapolon ŋakiro nu ebe, “Aŋuna arubakiniata ŋituŋa a Gasa itiyaete ŋasecisya ŋuna alaak nooi, nyaesikini ayoŋ akisican ikes, anerae apotu ikes torikosi ŋituŋa daadaŋ alorerya kec, togyelasi erae ŋipi neni a ŋituŋa ke Edom.

⁷ Aŋun, emyekini ayoŋ akim tonom ŋarwatatain a Gasa, enomiyari akim ŋaduketa keŋ ŋunajiet.

⁸ Amunyari ayoŋ ŋituŋa daadaŋ ŋulu iboiyete alotaun Acidod, kaapei ka erwosit ka Asikelon; esicani ayoŋ ŋituŋa ŋulu iboiyete alotaun Ekiron, emunyar ŋipiya a Ŋipilistin daadaŋ.”

⁹ Alimu Ekapolon ŋakiro nu ebe, “Aŋuna arubakiniata ŋituŋa a Tiro itiyaete ŋasecisya ŋuna alalak nooi, nyaesikini ayoŋ akisican ikes, anerae apotu ikes torikosi ŋituŋa daadaŋ alorerya kec, togyelasi erae ŋipi neni a ŋituŋa ke Edom, ido nyiricakina ikes acamunet ŋina emaikina eyai kidiŋ kec ikwapei ŋiyeneta.

¹⁰ Aŋun, emyekini ayoŋ akim tonom ŋarwatatain a Tiro, enomiyari akim ŋaduketa keŋ ŋunajiet.”

¹¹ Alimu Ekapolon ŋakiro nu ebe, “Aŋuna arubakiniata ŋituŋa ke Edom itiyaete ŋasecisya ŋuna alalak nooi, nyaesikini ayoŋ akisican ikes, anerae apotu ikes kirita ŋikaitotoi kec a ŋileŋia, apotu ikes toŋero jik akisyon ŋikaitotoi kec, apotu ikes torubakis jik eŋoikinito ŋikaitotoi kec, apotu ikes nyejoŋoto jik aŋoikinit ŋikaitotoi kec.

¹² Aŋun, emyekini ayoŋ akim tonom etaun Teman, enomiyari akim ŋaduketa a Bosira ŋunajiet.”

¹³ Alimu Ekapolon ŋakiro nu ebe, “Aŋuna arubakiniata Ŋiamoni itiyaete ŋasecisya ŋuna alalak nooi, nyaesikini ayoŋ akisican ikes, anerae apotu ikes apaki ŋina enyasyata akwap kec topunonosi ŋakookyes a ŋaberu a ŋuna apotiyete alo Gilead, aŋuna ka akiyatakin akwap kec.

¹⁴ Aŋun, emyekini ayoŋ akim tonom ŋarwatatain ŋuna ke etaun Raba, enomiyari akim ŋaduketa keŋ ŋunajiet; ido eyakaun ecelet akoloŋit ŋina ke ejie ka emwanuni ejie ka epuruuni apuwa esibit ŋina a ekuwuam a ŋolo ekusi nooi,

¹⁵ ido erikoryo erwosit a Raba nakwap ace, kaapei ka ŋikapolok ŋulu ipukatotor iŋes.”