Akisy. 9 - Ebaibul

Tocamun Akuj ka Noa

¹ Kiterereŋ Akuj Noa ka ŋidwe keŋ ŋulusapa. Tolimok ikes tema, “Touryata, topita kilelebunos nakwap.

² Ikikerete iyes ŋityaŋ ŋulu ka akwap daadaŋ, ŋikyeny ŋulu eporete daadaŋ ka ibore daadaŋ ŋini elyat alokwap ta ŋikolya daadaŋ. Ainak ayoŋ ikes nakan kus.

³ Akainak ayoŋ iyes ibore daadaŋ, ŋini eyari tolosi, toruwor akimuj kus, lopite ŋolopei abunio okoinak iyes ŋikito ka ŋinya, akainak tokona ayoŋ iyes ibore daadaŋ.

⁴ Nai nyinyama akiriŋ eyakasi ŋaokot, nyiira ŋaokot tari anakiriŋ.

⁵ Nai kire, ŋini ebukori ŋaokot kon, eŋisi ayoŋ ŋuna kebukorya. Eŋisi ayoŋ ŋun ŋolotyaŋ ka ŋinituŋanan. Eŋisi ayoŋ ituŋanan kirwor ŋuna kebukorya iŋes ŋaokot a ŋinice.

⁶ Iŋes ŋini ebukori ŋaokot a ituŋanan, ituŋanan pei ebukori ŋaokot keŋ daŋ, anerae abu Akuj tosub ituŋanan eyakar ŋasima keŋ.

⁷ Nai iyes, touryata, topita kielakinos nakwap, topitut a nen.”

⁸ Tolimok nai Akuj Noa kaapei ka ŋidwe keŋ ŋulusapa tema,

⁹ “Kiirasi, ani eruwor ayoŋ, ewuakini acamunet ka iyes ka ŋikusipapae

¹⁰ ta ibore ŋini eyari daadaŋ ŋini irukito ka iyes: Ŋikyeny, ŋibaren ka ŋityaŋ daadaŋ ŋulu anakwap, alokimar kec a daadaŋ a ŋulu apotu tolomut anataker.

¹¹ Ewuakini acamunet kaŋ ka iyes, ŋina nyemunyareta nabo ŋakipi ŋisubuna ŋulu eyarete ka nyemunaarete nabo ŋakipi akwap.”

¹² Tema Akuj, “Erae lo emacar ŋolo ka acamunet a ŋina alosi ayoŋ akiwuakin kidiŋ ayoŋ ka iyes ka ibore daadaŋ ŋini eyari ŋini iya ka iyes nakwap, ido eruwor acamunet na ŋina a ŋanyameta a daadaŋ a ŋuna eponito aloŋaren.

¹³ Ewuak ayoŋ alokakinet lodouwon, eruwor iŋes emacar ŋolo ka acamunet kaŋ ka daadaŋ ŋulu eya nakwap.

¹⁴ Apaki daadaŋ ŋina ewuakinia ayoŋ ŋidouwon kidiama, ido kiŋolikis iyes alokakinet alodowon,

¹⁵ atamuni ayoŋ acamunet kaŋ ka iyes ta ibore daadaŋ ŋini eyari anakwap. Nyeruwor nabo ŋakipi a ŋidouwon a ŋul ŋuna emunyarete ibore daadaŋ ŋini eyari anakwap.

¹⁶ Ani emini alokakinet lodouwon, eŋolikini ayoŋ iŋes, ido otamu acamunet ŋina a ŋikaru ka ŋikaru ŋina ikiyakar ayoŋ ka ibore daadaŋ ŋini eyari, ŋini eyai nakwap.”

¹⁷ Tolimok Akuj Noa tema, “Erae ŋol emacar ŋolo ka acamunet a ŋina ewuak ayoŋ acamunor ka ibore daadaŋ ŋini eyari ŋini eyai nakwap.”

Noa ka ŋidwe keŋ ŋulusapa

¹⁸ Erae lu ŋidwe a Noa ŋulu alomunete anataker: Sem, Am ka Yapes. Am iŋes abu touru Kanaan.

¹⁹ Arae ŋuluuni ŋul ŋidwe a Noa, ido ŋuluuni ŋul ikes erae atapapaa a ŋituŋa a daadaŋ anakwap.

²⁰ Noa ŋolo sek arae eketan, iŋes abu kisyaki akidup ŋikito ŋulu ke epiini.

²¹ Tocu epiini tomat, tomerakin, toper aloeema keŋ pa imukoro.

²² Ani ebuni Am papa a Kanaan, kiŋolik papa keŋ eleri, tosodi toloma kiŋa, tolimok ŋikaitotoi keŋ ŋuluarei.

²³ Tolemut Sem ka Yapes elou kimukokis kidiama ŋiseketa kec, toloto neni a papa kec ikusikusete kimukosi iŋes iŋoliyarito nariet; nyiŋolikina ikes epite ŋolo aleryo papa kec.

²⁴ Ani ekyenyuni Noa alomeret keŋ, ido toyenu ŋuna kebu lokoku keŋ ŋolo cici kitiya,

²⁵ tolimu tema; “Ilamam Kanaan, eruwor iŋes epito ŋolocaryoit aneni a ŋipi a ŋikaitotoi keŋ.”

²⁶ Tema nabo, “Erereŋ Ekapolon Akuj ŋina a Sem; emaikina Kanaan toruwor epito a Sem.

²⁷ Elipi ayoŋ Akuj kipit Yapes, Emaikina iŋes kiboi aloeemae a ŋulu a Sem, emaikina Kanaan toruwor epito keŋ.”

²⁸ Abu Noa ekaku ka akalele kiboi ŋikaru ŋamiae ŋauni ka ŋatomonikan.

²⁹ Arae ŋikaru a Noa daadaŋ ŋamiae ŋakanikaomwon ka ŋatomonikan. Ekaku a ŋikaru a ŋul, totwan.