Akisy. 8 - Ebaibul

Todipaar ŋakipi

¹ Nai abu nyimuryak Akuj Noa ka ŋibaren ta ibore daadaŋ ŋini ayari ŋini aya ka iŋes nataker. Kitukut Akuj ekuwuam anakwap, kitidipaiya ŋakipi.

² Togoloi ŋiitan ŋulu a ŋauwuata ka ŋirotin daadaŋ ŋulu ebuneneo akiru, nyisilimi tari akiru.

³ Todipaar ŋakipi iwadio iwadio anakwap. Ekaku a ŋirwa amiat ka ŋatomonikan, tokudiokut ŋakipi anakwap.

⁴ Ani edoli elap ŋolo a ŋikanikaarei ŋirwa ke elap ŋitomon ka ŋikanikaarei, totiyaun ataker kwap, kidokokin kidiama ŋimoru ŋulu enyaritae Ararat.

⁵ Torubakis ŋakipi iyosete adipaar akitodol elap ŋolo a ŋitomon, ŋirwa ke elap epei a elap a ŋol, totakanut ŋaitae a ŋimoru.

⁶ Ekaku a ŋirwa a ŋatomoniomwon, toŋaa Noa ŋidirisae ŋulu ewuakinit iŋes nataker.

⁷ Kitoloma ekuruk kiŋa, kiyakiya kwap, kirim alokwap akitodol ŋina ejuwarya akwap.

⁸ Kiyakiya nai Noa akuri akiŋolikin kijuwarit akwap;

⁹ nai toryamu akuri emam neni kicaka alokwap, ido toboŋo nataker, anerae ariŋa ŋakipi erapuwarito akwap daadaŋ. Kirepu Noa akan keŋ alodirisa kikam akuri ya tooma ataker.

¹⁰ Kidaridarak iŋes ŋirwa ŋikanikaarei, tosodi kiyakiya nabo anataker akuri kwap.

¹¹ Ani edoli eboŋ, toboŋu akuri neni a Noa iwokit anakituk akuyon ŋina ketubuni iŋes alokitoe a ŋolo enyaritae Olipa, ŋina keriŋa itilijauni. Kitaanyu ŋin Noa atemar kiŋoŋaar ŋakipi anakwap.

¹² Kidaridarak nabo ŋirwa ŋikanikaarei, tosodi kiyakiya nabo akuri kwap, ido abu akuri ŋin nyeboŋo neni keŋ jik.

¹³ Akoloŋit ŋina esyaunan a elap a ŋolo ke epei, ekaru ŋolo aruworotor ŋikaru a Noa ŋamiae ŋakanikapei ke epei, kijuwa akwap ŋakipi, toono. Topuko Noa ataker alokidiama toripiya kwap, kiŋolik akwap kijuwa ka keono.

¹⁴ Ani edoli ŋirwa ke elap ŋatomoniarei ka ŋikanikaarei elap ŋolo a ŋiarei, toonite akwap deu.

¹⁵ Tolimok Akuj Noa tema,

¹⁶ “Tolomutu anataker kaapei ka aberu kon ka ŋidwe kon ŋulusapa ta ŋaberu kec.

¹⁷ Tolomutu kiŋa anataker kaapei ka ibore ŋini eyari daadaŋ: Ŋikyeny, ŋityaŋ, ŋiboorei ŋulu alyatok; ikotere touryata, topitut, kielakin akwap daadaŋ.”

¹⁸ Aŋun apotu Noa ka aberu keŋ ka ŋidwe keŋ ŋulusapa ta ŋaberu kec tolomut kiŋa ataker.

¹⁹ Tolomasi kiŋa ataker a ŋikabilae kec ŋityaŋ daadaŋ, ŋiboorei ŋulu alyatok daadaŋ, ŋikyeny daadaŋ ka ibore daadaŋ ŋini eyai nakwap.

Akiikinet ka Akuj neni a Noa

²⁰ Todukok Noa Namuroet aŋuna ka Akuj, tolemu ŋityaŋ ka ŋikyeny ŋulu itojokitae, tope a Namuroet erae ainakinet neni ka Akuj.

²¹ Tojoik nooi Akuj eure a ŋainakineta a ŋun, tema alotau keŋ, “Mam nabo nyeceni ayoŋ ŋalup aŋuna a ituŋanan, anerae etami ituŋanan aronis ŋinapei eriŋa edit, kori mam nabo jik nyamunyari ayoŋ ibore daadaŋ ŋini eyari anakwap, lopite ŋolo abunio omunyarya paan.

²² Ani ca eriŋa akwap eyai, erubakinete lu eyakasi nakwap: apaki ŋinakitaet ka apaki ŋinalemet, alilimu ka amwanis, akiporo ka akamu, apaaran ka akuwar.”