Akisy. 50 - Ebaibul

¹ Toapiya nai Yosepu loreet a papa keŋ kigwor a nen, ido tonu papa keŋ.

² Tolimok Yosepu ŋiketiyak keŋ ŋulu arae ŋimurok akiosakin nakuwan a papa keŋ ekitoe ŋolo nyitobosi akuwan. Aŋun, apotu ŋimurok kiosakis ekitoe nakuwan a Isirael;

³ yaasi ikes ŋirwa ŋatomoniomwon itiyaete ŋun, anerae apaki ŋina etya ŋin iŋes itemokino iosere akuwan nyebos. Kigworo Ŋijipitian aŋuna keŋ ŋirwa ŋatomonikanikaarei.

⁴ Ani edaun ŋirwa ŋulu egworotor ikes aŋuna a Yakob kisirwor Yosepu ŋituŋa ŋulu a ekal a Parao tema, “Ani tokona karae ayoŋ ŋolo ajok aneni kus, ekelipit iyes tolimokis Parao ŋakiro nu:

⁵ Abu papa kaŋ ekesikoŋ ayoŋ; tema, ‘Aapuu ayoŋ atwanare. Tonukae ayoŋ nalyal ŋina abu ayoŋ obok nakwap a Kanaan.’ Aŋun, ekelipit ayoŋ iyoŋ ikimyek ayoŋ etipeiyo inaa, ikotere anuki papa kaŋ, ido nai oboŋu.”

⁶ Toboŋok Parao tema, “Ape kitipeiyo, ido tonuk papa kon, ikwapei abunio iŋes ikisikoŋ iyoŋ, kitiya ŋun.”

⁷ Aŋun, abu Yosepu kitipeiyo Kanaan akinuk papa keŋ. Kitipeiyosi iŋes kaapei ka ŋiketiyak a Parao, ŋikasikou ŋulu a apukan a Parao ka ŋikasikou ŋulu akwap a Ijipit.

⁸ Toloto tari ŋituŋa ŋulu a ekal a Yosepu, ŋikaitotoi keŋ ka ŋituŋa a ekal a papa keŋ. Ŋidwe kec bon apotu kidoŋo Gosen ka ŋamesekin ta ŋaatuk.

⁹ Ya iŋes ŋagaari ka ŋikametok kec. Alal asepic ŋin nooi.

¹⁰ Ani edolunete ikes nalos ŋina ka Atad, ŋina eyai diyete Yorodan, kigworo a nen nooi iyaloloŋete; kigwor Yosepu papa keŋ a nen ŋirwa ŋikanikaarei.

¹¹ Ani iŋolikinete Ŋikanaani ŋulu eboiyete anakwap a ŋin epite ŋolo egworotor ikes analos a ŋina ka Atad, temasi, “Erae na akigworo ŋina apipilan aneni a Ŋijipitian.” Aŋun, apotu ikes tonyarata ekiro akibois a ŋin Abel-Misiraim. Eyai akibois ŋin diyete Yorodan.

¹² Apotu ŋidwe a Yakob ŋulusapa kitiyata neni keŋ ŋuna sek ecikakinit iŋes ikes akitiya.

¹³ Yaasi iŋes nakwap a Kanaan, tonuka naturukan ŋina ayai lomanikor ŋolo a Makipela, lomanikor ŋolo ayai diyete Mamure. Emanikor ŋol, iŋes agyeluni Aburaam aneni a Epuron a ŋolo arae Etitait, erae neni enukio ŋikatwak.

¹⁴ Kedau Yosepu akinuk papa keŋ, toboŋo Ijipit kaapei ka ŋikaitotoi keŋ ka ŋituŋa daadaŋ ŋulu alosito ka iŋes akinuk papa keŋ.

Kisyoni Yosepu ŋikaitotoi keŋ

¹⁵ Ani eanyunete ŋikaitotoi a Yosepu atemar atwana papa kec, temasi, “Ani mono keriŋa Yosepu ikimanit iwon, ido kinyaŋa ŋuna aronok ŋuna aponi iwon kitiyae neni keŋ?”

¹⁶ Aŋun, apotu ikes toloto neni a Yosepu temasi, “Abu papa kon tolimu ŋakiro nu eriŋa nyetwana ebe,

¹⁷ ‘Tolimokisi Yosepu nu: Ekemaimai ayoŋ iyoŋ, kisyoni ŋikaitotoi kon aŋuna aronok aŋuna apotu ikes kitiyata neni kon itogyelasi iyoŋ.’ Aŋun nai, tokona ikimaimai isua iyoŋ, kisyoni adyakaret a ŋiketiyak a Akuj a ŋina a papa kon.” Kikalou Yosepu irworikinete ikes neni keŋ.

¹⁸ Kikalout ŋikaitotoi keŋ daŋ, toramakinos kwap kiŋaren Yosepu temasi, “Ikiya isua ne ikirae ŋipi kon.”

¹⁹ Nai toboŋok Yosepu ikes tema, “Nyikuryaketa! Arae mono ayoŋ Akuj a?

²⁰ Tari daŋ ŋina icamitotor iyes akiar ayoŋ, abu Akuj tocamak ŋun, ikotere ŋuna ajokak etakanunete, toiunotor ŋituŋa ŋulu alalak, lopite ŋolo itiyaa Akuj tokona.

²¹ Aŋun, nyikuryaketa; ayoŋ elope eketani iyes kaapei ka ŋidwe kus ŋulu cicik.” A ŋakiro a ŋun, abu Yosepu tolema akuryanu alotai a ŋikaitotoi keŋ, kirwor neni kec erimaana.

Ŋirwa a Yosepu ŋulu esidyok ka atwanare keŋ

²² Aŋun, abu Yosepu kiboi alo Ijipit, iŋes kaapei ka ekal a papa keŋ; todolo ŋikaru keŋ amiat ka ŋitomon.

²³ Eŋolikinit Yosepu ŋidwe a ŋidwe a Epuraim; ŋidwe a Makir alokoku a Manase daŋ, abu Yosepu todak anakejen keŋ.

²⁴ Tema nai Yosepu neni a ŋikaitotoi keŋ, “Aapuu ayoŋ atwanare; nai kire ebuni Akuj neni kus akiŋarakin iyes, ikiyai iŋes iyes kitipeiyosi anakwap a na, toloto nakwap ŋina abu iŋes kikoŋ ainakin neni ka Aburaam, Isaka ka Yakob.”

²⁵ Aŋun, abu Yosepu kisikoŋ Ŋisirael tema, “Ani ebuni Akuj neni kus akiŋarakin iyes, yaasi ŋakoyo kaŋ a ne.”

²⁶ Totwana Yosepu erae ŋikaru keŋ amiat ka ŋitomon; kiosae akuwan keŋ a ekitoe a ŋolo nyitobosi, kiwuakinae tooma nasaduku anakwap a Ijipit.