Akisy. 48 - Ebaibul

Kiterereŋ Yakob ŋidwe a Yosepu ŋulusapa

¹ Kelunyar apaki adio, tolimok ituŋanan ice Yosepu tema, “Edyaka papa kon.” Aŋun, abu Yosepu tolot ya ŋidwe keŋ ŋulusapa ŋiarei: Manase ka Epraim.

² Ani elimokini ituŋanan ice Yakob ebe, “Abu lokoku kon Yosepu neni kon,” Min agogoŋu adio neni a Yakob, tonyou kiboikin lokitaada.

³ Tema iŋes neni a Yosepu, “Abu Akuj ŋina Etiron totakanu neni kaŋ alo Lus anakwap a ŋina a Kanaan, abu eketerereŋ ayoŋ,

⁴ tema neni kaŋ, ‘Alosi ayoŋ akituruwor iyoŋ ŋolo iuri topit, eketuruwori ayoŋ iyoŋ ŋituŋa ŋulu alalak, ainakini ayoŋ akwap na neni a ŋiletok kon a ŋulu ikiwuapete iyoŋ, toruwor ŋina kec jik.’

⁵ Aŋun, ŋidwe kon ŋuluarei ŋulusapa ŋul, ŋulu ibu iyoŋ touru alo Ijipit eriŋa ayoŋ nyebuno neni kon nakwap a Ijipit, erae ikes ŋidwe kaŋ. Erae Epuraim ka Manase ŋidwe kaŋ; ikwapei eraakatar Ruben ka Simeon ŋidwe kaŋ.

⁶ Ŋidwe ŋuluce daadaŋ ŋulu iuri iyoŋ ekaku kec, erae ŋul ŋidwe kon; eyenunio ikes alororwa a ŋikaitotoi kec a Manase ka Epuraim, anakiboisyo a ŋuna eruwor ŋuna kec.

⁷ Alimu ayoŋ ŋun, anerae apaki ŋina abunio ayoŋ alo Padan, ŋuna apotu okoinakis ayoŋ akiyaloloŋ ikes nu, abu Rakel totwana anakwap a Kanaan eriŋa ewosyo, toris Epuras keapuu iwadio. Aŋun, abu ayoŋ onuk akuwan keŋ nen diyete erot ŋolo elosi Epuras” (iŋes Betelem).

⁸ Ani iŋolikini Isirael ŋidwe a Yosepu ŋulusapa ŋul, tema, “Ata ŋae lu?”

⁹ Tema Yosepu neni a papa keŋ, “Erae ikes ŋidwe kaŋ ŋulusapa, ŋulu akainaki ayoŋ Akuj a ne.” Tema papa keŋ, “Yau ikes neni kaŋ, ikotere eterereŋ ayoŋ ikes.”

¹⁰ Apaki ŋin, aris ŋakonyen a Isirael kemumu aŋuna ka amojoŋu, pa ete iŋes ejok. Aŋun, abu Yosepu kitaapu ŋidwe neni keŋ; tonu iŋes ikes totun ibooi.

¹¹ Tema Isirael neni a Yosepu, “Pa atamakinit ayoŋ atemar eŋolikini ereet kon, nai tokona akacamaki ayoŋ Akuj akiŋolikin tari ŋidwe kon.”

¹² Kisiyoto nai Yosepu ŋidwe anakejen a papa keŋ, ido toryedik kijuuru todol ereet kwap.

¹³ Toriko Yosepu ŋidwe ŋul ŋiarei, toriko Epuraim aloteten keŋ, ya nakan a Isirael ŋina alokedyeny, toriko Manase alokedyeny keŋ, ya nakan a Isirael ŋina aloteten, yau iŋes ikes diyete Isirael.

¹⁴ Nai abu Isirael toriyo ŋakan keŋ kitulunyak kidokok teten keŋ nakou a Epuraim a ŋolo adit, kidokok kedyeny keŋ nakou a Manase a ŋolo kiyae alokal.

¹⁵ Kiterereŋ Isirael Yosepu tema, “Elipi ayoŋ Akuj ŋina apotu atapapaa kaŋ Aburaam ka Isaka kiwuapa ŋakiro keŋ, Akuj ŋina erae Ekeyokon kaŋ anakiyar kaŋ a daadaŋ tari nakoloŋit na,

¹⁶ elipi emalaika ŋolo akalaku ayoŋ anawana a daadaŋ, kiterereŋ ŋidyain lu; ido alodwe a lu, torubakinae etamunitae ekiro kaŋ ka ŋirorwa atapapaa kaŋ Aburaam ka Isaka; elipi toruworos ikes ŋituŋa ŋulu elalak anakwap.”

¹⁷ Ani iŋolikini Yosepu papa keŋ idokokini teten keŋ nakou a Epuraim, abu iŋes nyelakar; aŋun, kikamu iŋes akan a papa keŋ ecamit alemar anakou a Epuraim ikotere iwuakini nakou a Manase.

¹⁸ Tema Yosepu neni a papa keŋ, “Meere ikwaŋina papa! Ikwapei eraakar ŋolo kiyae alokal lo, kidokok teten kon nakou keŋ.”

¹⁹ Nai towou papa keŋ, tema, “Ayeni ayoŋ lokoku, ayeni ayoŋ; eruwor iŋes daŋ ateker ka ŋolo epol. Kikote neni daŋ, eruwor lokaato keŋ ŋolo cici ŋolo epol akilo iŋes, ido elalaketa ŋiletok keŋ eruwor ŋituŋa a ŋakwapin.”

²⁰ Aŋun, kiterereŋ Isirael ikes akoloŋit ŋin tema, “Lororwa kus iŋes elimunioto Ŋisirael iterereŋete ŋuluce ebe, ‘Ikilipi Akuj ikituruwo iyes ŋulu ikwaan ka Epuraim ta Manase.’ ” Aŋun, abu iŋes kisiŋaren Epuraim aneni a Manase.

²¹ Tema nai Isirael neni a Yosepu, “Aapuu ayoŋ atwanare, nai eyakaun Akuj kaapei ka iyoŋ, ikiyai iŋes iyoŋ nabo nakwap atapapaa kon.

²² Eyatakini tokona ayoŋ neni kon atutubet apei akilo ŋuna ainakini neni a ŋikaitotoi kon; atutubet ŋin iŋes ŋina abu ayoŋ olemu a ŋakan kaŋ aneni a Ŋiamori esitiyae ŋileŋia ka ŋikaleŋeleŋe kaŋ.”