Akisy. 43 - Ebaibul

Toboŋut ŋikaitotoi a Yosepu Ijipit nabo yaut Benjamin

¹ Toroniar nooi eron anakwap a Kanaan.

² Ani kirikasi ikes akimuj ŋina ayaunete alo Ijipit, tema papa kec ikes, “Apesi nabo togyelut akimuj aŋuna yok.”

³ Nai tolimok Yuda papa keŋ tema, “Ikicikit isua ekile ŋolo epolokinit akimuj anakwap a ŋin ka adedeŋu nooi ebala, ‘Nyikiŋolikinete iyes ayoŋ mati kiyautu iyes lokaato kus.’

⁴ Ani kimyek iyoŋ lokaato kosi orukosi ka isua, ikitiyaar isua Ijipit agyelun akimuj;

⁵ nai ani pa kimyek iyoŋ iŋes orukosi ka isua, nyikitiyaar isua Ijipit, anerae abu ekile ŋol tema neni kosi, ‘Nyikiŋolikinete iyes ayoŋ mati kiyautu iyes lokaato kus.’ ”

⁶ Tema Isirael neni kec, “Anukiro iyauniata iyes ŋatyokisyo nu neni kaŋ aŋuna ilimokiniata ekile ŋol atemar iyakatar iyes lokaato kus ece?”

⁷ Toboŋokis ikes iŋes temasi, “Abu ekile ŋol ikiŋitiŋit isua ecamit ayenun isua ejok ka ekal kosi. Tema, ‘Eriŋa papa kus eyari a? Eyai iyes lokaato kus ece a?’ Ido ŋuna aponi isua toboŋokinoe iŋes arae ŋuna eŋita iŋes. Alipite nai apedoritere isua ayenun atemar etemari iŋes, ‘Yautu lokaato kus totiyaunotor laalo’?”

⁸ Tema Yuda neni a papa keŋ Isirael, “Tocamak edya orukosi ka ayoŋ, kimyekinae isua tolotoi, ikotere ikiyari nyikitwaka iyoŋ ka isua ta ŋidwe yok ŋulu cicik.

⁹ Ayoŋ elope edari edya; keya ŋuna etakanunete neni keŋ, kimarak nakou kaŋ. Ani pa kenyaku ayoŋ iŋes, ewuak kiŋaren kon, kicenoi ayoŋ toruwor asecenu ŋina kaŋ ŋikaru ka ŋikaru.

¹⁰ Ani kerae nyeŋelitae, ketinen isua keboŋor ama ŋaboŋoret ŋaarei.”

¹¹ Tema nai papa kec Isirael neni kec, “Ani kemaikina kikokis nen, kitiyata nai nu: Tosekisi ŋaraito ŋadi ŋuna ka akwap a na locweei kus yaasi erae ainakinet kus neni a ekile a ŋol; yaasi: Ekitoe ŋolo a ŋajemei edio, ao adio, ŋikito ŋulu itoboboete akimuj, ŋimina ŋulu ekukuny icunyio ka ŋaraito ŋuna esibit ŋakamurya ta ŋuna esibit emaide ŋuna enyaritae alimond.

¹² Yaasi ŋisiliŋa ŋulu etya ŋulupei kuwar. Kinyakasi ŋisiliŋa ŋulu ipotu iyes kinyakut alocweei, acepaki pa kiŋolikinito ikes.

¹³ Yaasi lokaato kus daŋ, toloto nabo neni a ekile a ŋol;

¹⁴ elipit Akuj ŋina Etiron ikiinak iyes akisyonio alokiŋaren ekile ŋol, ikotere iŋes inyakuni lokaato kus ŋoloce kaapei ka Benjamin. Ani eruwor ayoŋ, adau atwaniyar ŋidwe erae atwaniyar.”

¹⁵ Aŋun, apotu ŋisapa ŋul yaasi ainakinet, ŋisiliŋa ŋulu atya ŋulu sek ayaito ikes, yaasi ikes Benjamin daŋ. Totiyaaros ikes toloto Ijipit, towua alokiŋaren Yosepu.

¹⁶ Ani iŋolikini Yosepu Benjamin erukito ka ikes, tema neni a ŋolo apolokinit ŋiketiyak alokai keŋ, “Yau ŋikilyok ŋul tooma kai, toŋol ibarasit kitemok, anerae emaikina emuja yoŋ kaapei ka ŋikilyok ŋul takae naparan.”

¹⁷ Kitiya eketiyan ŋol ikwapei alimokinitor Yosepu iŋes, ya ŋikilyok ŋul kai a Yosepu.

¹⁸ Tokuryaketa ŋikilyok ŋul, anerae aponi yaarae ikes kai a Yosepu temasi, “Erae ŋakiro a ŋisiliŋa a ŋulu enyakakinitae locweei yok kuwar ekiŋaren, iŋes ikiyaunere iwon tooma ne, ikotere ekapolon eryamuni apaki ŋinakitoroniyaret iwon, ikituruwo ŋipi, ido ya ŋisigirya yok.”

¹⁹ Aŋun, toloto ikes neni a ŋolo apolokinit etic alokai a Yosepu, kirworo ka iŋes alopuke a akai.

²⁰ Temasi ikes, “Okoe ekapolon kosi, aponi isua ekiŋaren totiyaunetei kwap ne akigyel akimuj;

²¹ ani edolyo isua neni aperyo eboŋoryo, toŋaarae ŋicweei kosi, toryamunae ŋisiliŋa a ŋinituŋanan eya daadaŋ. Aŋun, enyakun isua ŋisiliŋa ŋul eya ne.

²² Nabo daŋ eyaunitae isua ŋisiliŋa ŋice agyelya akimuj. Nyeyenio isua ituŋanan ŋini kebu kiwuak ŋisiliŋa kosi locweei kosi.”

²³ Toboŋok eketiyan ŋol ikes tema, “Nyiyaloloŋo, Nyikuryaketa; acepaki emaikina erae Akuj kus ka Akuj a papa kus kebu kiwuak ebari locweei kus aŋuna kus; abu ayoŋ ejaa ŋisiliŋa kus.” Tosodi nai eketiyan ŋol yau Simeon kiŋa neni a ŋikaitotoi keŋ.

²⁴ Ani kedau ekapolokiniton etic alokai a Yosepu ŋol ayaun ŋikilyok ŋul tooma akai a Yosepu, ainakin ŋakipi, akisilotar ikes ŋakejen ka kedau ainakin ŋisigirya kec ŋinya,

²⁵ kitemokis ikes ainakinet kec neni a Yosepu. Aapi Yosepu adolun, edaritae iŋes apaki ŋin kidiŋ apaaran, anerae aris ikes kiirasi atemar imujete ikes naparan a nen.

²⁶ Ani ebuni Yosepu lore, inasi ikes iŋes ŋainakineta ŋuna aris ikes keyaut kai, toryediko alokiŋaren keŋ.

²⁷ Kiŋit Yosepu ikes epite ŋolo eyakatar tema, “Eŋale papa kus, ekasikout ŋolo ŋoon irworosi iyes ŋakiro keŋ a? Eriŋa iŋes eyari a?”

²⁸ Toboŋokis ikes temasi, “Eŋale eketiyan kon papa kosi; eriŋa eyari.” Kijuuroto ikes itopoloorito Yosepu.

²⁹ Toŋoleŋolek nai Yosepu, kiŋolik lokaato keŋ Benjamin, ŋolo arukunete ka iŋes anakook a apei, ido kiŋit ikes tema, “Erae lo lokaato kus ŋolo cici ŋolo ibasi iyes ayoŋ a? Elipi Akuj ikiŋarak iyoŋ lokoku kaŋ!”

³⁰ Etya nen, kiwonyak Yosepu kiŋa, anerae abu alakara aŋuna a lokaato keŋ kilelebun lotau keŋ, todikino ikalouni. Aŋun, abu tolot tooma nagule keŋ bon, kigwor a nen.

³¹ Kedau akigwor, kilota ereet keŋ, tolomu kiŋa etikit etau tema, “Tokorakisi akimuj.”

³² Tokorakinae iŋes akimuj keŋ bon, ŋipeyok daŋ ŋina kec bon, Ŋijipitian daŋ kimuja ka a kec, anerae pa emujete Ŋijipitian kaapei ka Ŋiburaniyae, arae nen asiilyo aneni a Ŋijipitian.

³³ Eboiyete ŋikilyok ŋul alopite a ŋolo epolooto alokal, ŋolo apolon mono tari neni a ŋolo cici, kitekinos make eumokinito.

³⁴ Ani ekorakinio ikes akimuj alomesa a Yosepu, alal ŋina akorakinitae Benjamin nooi adeparit etyae ŋina akorakinitae ŋituŋa ŋuluce arae ŋina etya ŋina a ŋituŋa a ŋikan. Apotu ikes kimuja ka tomata, tolakaros kaapei ka iŋes.