Akisy. 4 - Ebaibul

Toar Kain Abel

¹ Kiryamakin Adam ka aberu keŋ Epa, toryamu akook, kidou Kain, ido tema, “Edou ayoŋ ekile anakiŋarakinet a ŋina ke Ekapolon.”

² Kidou nabo Epa Abel lokaato a Kain. Abu Abel toruwor ekeyokon a ŋamesekin, toruwor Kain eketan.

³ Ekaku a ŋirwa a ŋice, yau Kain ainakinet ŋina a ŋaraito a ŋuna a emanikor keŋ neni ke Ekapolon.

⁴ Yau Abel daŋ ipei a ŋikiyae a ŋamesekin toar inak Ekapolon akiriŋ ŋina ataronon. Tolakari Ekapolon aŋuna ka Abel ka ainakinet keŋ.

⁵ Nai nyelakar Ekapolon aŋuna a Kain ka ainakinet keŋ. Aŋun, toŋo Kain nooi, tonyoridid ereet.

⁶ Kiŋit Akuj Kain tema, “Anukiro iŋoitor iyoŋ nooi ka anukiro enyorididio ereet kon?

⁷ Ani mono kitiya iyoŋ ejok, nyikicamunio mono iyoŋ a? Nai ani pa kitiya iyoŋ ejok, erubakini asecit ikidapit iyoŋ a lopuke, ikiitanit iyoŋ; nai itemokino iyoŋ kilou asecit.”

⁸ Tema Kain neni ka Abel a lokaato keŋ, “Bua apena nariet.” Ani eriŋa ikes eya nariet, tonyoik Kain Abel lokaato keŋ, toar.

⁹ Kiŋit Ekapolon Kain tema, “Ai eyai lokaato kon Abel?” Toboŋok Kain tema, “Nyayeni ayoŋ, arae ayoŋ ekeyokon lokaato kaŋ a?”

¹⁰ Kiŋit Akuj iŋes tema, “Nyo itiya iyoŋ? Igworosi neni kaŋ ŋaokot alokaato kon analup.

¹¹ Anyoun tokona, iruwor iyoŋ ŋolo ilamam nooi, nyitae iyoŋ nabo ŋalup ŋuna apotu toŋaar kijuwasi ŋaokot alokaato kon a ŋolo ibu iyoŋ toar.

¹² Ani ŋina itaa iyoŋ ŋalup, nyitokokete ejok ŋikinyom ŋulu itae iyoŋ. Idokini iyoŋ nariyet, toruwor ekerimiton anakwap.”

¹³ Tolimok Kain Ekapolon tema, “Epol akisicanet kaŋ nooi nyapedori ayoŋ akidaŋidaŋ!

¹⁴ Ikirita iyoŋ ayoŋ nakoloŋit na analup, ido aŋopiyari ayoŋ aneni kon; aruwor ayoŋ ŋolo adokinit ka ekerimiton anakwap, ido epedori ŋinituŋanan ikiryama ka ayoŋ akiar ayoŋ.”

¹⁵ Tolimok Ekapolon Kain tema, “Nyikote neni! Ani ca ŋini ikiari iyoŋ, inyaŋaryo ŋakinyaŋaret ŋakanikaarei.” Tosodi Ekapolon kiwuak emacar neni a Kain, ikotere nyearya ituŋanan ŋini iryamun ka Kain iŋes.

¹⁶ Torotok Kain alokiŋaren Ekapolon, tolot akiboi Nod, nakwap ŋina ayai Kide Eden.

Ŋipapae a Kain

¹⁷ Kiryamakin Kain ka aberu keŋ, toryamu aberu ŋin akook, kidou ikoku tolimok ekiro a ikoku Enok. Toduku Kain etaun ŋolo abu tolimok ekiro Enok, ekiro alokoku keŋ.

¹⁸ Touru Enok Irad, touru Irad Meuyael, touru Meuyael Metusael, touru Metusael Lamek.

¹⁹ Kiit Lamek ŋaberu ŋaarei, ekiro a ŋina esyaunan arae Ada ka ŋolo a ŋina a ŋaarei arae Sila.

²⁰ Touru Ada Yabal; Yabal iŋes arae papa a ŋituŋa a ŋulu eboiyete aloeemae, torae ŋikeyokok a ŋibaren.

²¹ Arae Yubal lokaato a Yabal, iŋes arae papa a ŋituŋa a ŋulu aramete agita ka tokusete apilu.

²² Touru nabo Sila Tubalikain, ŋolo etiyae anasuwa ŋiboro ŋulu egelegelya. Arae Naama nakaato a Tubalikain.

²³ Tema Lamek neni a ŋaberu keŋ, “Ada ka Sila, kiirarae ayoŋ, iyes ŋaberu kaŋ; topupokisi ŋakiro kaŋ! Aar ayoŋ ekile aŋuna akawania ayoŋ, aar ayoŋ esorokit aŋuna akaramya ayoŋ.

²⁴ Ani kinyaŋaritae Kain ŋakinyaŋaret ŋakanikaarei, inyaŋaryo Lamek ŋakinyaŋaret ŋatomonikanikaarei.”

²⁵ Kiryamakin nabo Adam ka Epa, kidou Epa isapat tolimok ekiro Set, anerae abu iŋes tema, “Akainaki ayoŋ Ekapolon ikoku ice ŋini ilunyokin lorot ka Abel a ŋolo abu Kain toar.”

²⁶ Touru Set daŋ isapat, tolimok ekiro Enos. Apaki ŋin nai esyakiniata ŋituŋa akikinyomit ekiro ŋolo ke Ekapolon.