Akisy. 35 - Ebaibul

Toboŋo Yakob Besel

¹ Tema Akuj neni a Yakob, “Tonyou, kitipeiyo Besel kiboi a nen. Todukok Namuroet nen ŋina ka Akuj a ŋina abu totakanu neni kon apaki ŋina isiya iyoŋ aneni alokaato kon ke Esau.”

² Aŋun, abu Yakob tolimok ŋituŋa a ekal keŋ ka ŋituŋa daadaŋ ŋulu arukitotor iŋes tema, “Tocakasi nariet ŋakujo ŋunagelaanotin ŋuna iyakatar iyes. Kitaleutu ŋawat kus ka tonapa ŋilowi ŋice;

³ ipotu nai oloto etipeiyosi Besel; ikotere ayoŋ adukokini nen Namuroet ŋina ka Akuj a ŋina abu ekeira ayoŋ apaki ŋina aryamunitor ŋican. Akuj ŋina abu torubak ikirukit ka ayoŋ aneni daadaŋ abu ayoŋ etor.”

⁴ Aŋun, inakis ŋituŋa ŋakujo ŋuna ayakatar ikes daadaŋ ŋunagelae neni a Yakob. Inakis ŋikadoŋidoŋ kec daŋ neni a Yakob; kiwua Yakob ŋul daadaŋ alodiyete ekuyon ŋolo ayai Sekem.

⁵ Ani eriŋa ikes ewosete, min ekabule lotaunio daadaŋ ŋulu aya nawaetin kec, aŋun, emam ituŋanan abu totupak ikes.

⁶ Todolut Yakob ka ŋituŋa daadaŋ ŋulu arukito ka iŋes Lus (iŋes Besel) nakibois ŋina ayai Kanaan.

⁷ Todukok Yakob Namuroet nen, tonyara ekiro a akibois a ŋin El Besel, anerae arae nen abunio Akuj totakanunia neni a Yakob apaki ŋina arotokinio aneni alokaato keŋ.

⁸ Apaki ŋin, totwana Debora ŋina apolouni Rebeka aneni keŋ; tonukae iŋes kwap ekuyon natiyaaret kwap Besel. Aŋun, aponi tonyarae ekiro a akibois a ŋin lokuyon ŋolo Alon-Bakus.

⁹ Totakanu nabo Akuj neni a Yakob apaki ŋina abunio iŋes alo Padanaram. Kiterereŋ Akuj iŋes.

¹⁰ Tema Akuj neni keŋ, “Erae ekiro kon Yakob; nyeriŋa nabo ikinyarao iyoŋ Yakob, nai ikinyarao iyoŋ Isirael.” Aŋun, abu Akuj tonyara ekiro keŋ Isirael.

¹¹ Tema Akuj neni keŋ, “Arae ayoŋ Akuj ŋina Etiron: Topit, tolalata ŋituŋa kon; elomunete aneni kon ŋituŋa ŋulu ka akwap a apei ka ŋituŋa ŋulu a ŋakwapin a ŋuna alalak, elomunete ŋirwosi aneni kon.

¹² Akainakini ayoŋ iyoŋ akwap ŋina abu oinak Aburaam ka Isaka, ainakini neni a ŋiletok kon ekaku kon.”

¹³ Kimyek nai Akuj Yakob a nen anakibois a ŋina erworotor ka iŋes.

¹⁴ Tosipok Yakob amoru nen nakibois ŋina abunio iŋes kirworikinotor ka Akuj; tobukok namoru epiini erae ainakinet, tobukok daŋ namoru ŋin akimyet.

¹⁵ Tolimok Yakob ekiro a akibois a ŋina abunio Akuj kisirworya iŋes a ŋin Besel

Akidouno a Benjamin ka atwanare a Rakel

¹⁶ Towotokis ikes alo Besel; ani eriŋa elwaka iwadio alo Epurat, toryebakin Rakel akidoun. Toryebakin iŋes nooi.

¹⁷ Ani eryeba iŋes nooi, tolimok akesidoununon iŋes tema, “Nyikuryaniar, anerae idouni iyoŋ tokona isapat ice.”

¹⁸ Ani eriŋa etau keŋ itedukae (aŋuna alosyo akiridakin), abu tolimok ekiro a idya keŋ a ŋin Benoni, nai abu papa a idya tolimok ekiro a idya Benjamin.

¹⁹ Totwan Rakel a nen, tonukae kidiŋ neni aya ikes ka Epurat (iŋes Betelem).

²⁰ Tosipok Yakob amoru kidiama alyal a Rakel; tari tokona eyai amoru ŋin neni ka alyal a Rakel.

²¹ Towotok Isirael a nen kiŋaren, kigurok eema keŋ yaye aduketait ŋina aoyan alotaun ke Eder.

²² Ani eriŋa Isirael iboi anakwap a ŋin, kebu Ruben tolot tolom Bila, apese a papa keŋ ŋina pa eisitae, kiira Isirael ŋakiro ŋun. Ayakar Yakob ŋidwe ŋitomon ka ŋiarei:

²³ Ŋidwe a Lea ikes lu: Ruben iŋes lokoku a Yakob ŋolo kiyae, totupak Simeon, Lepi, Yuda ka Isakar ta Sebulon.

²⁴ Ŋidwe a Rakel ikes lu: Yosepu ka Benjamin.

²⁵ Ŋidwe a Bila aketiyan a Rakel ikes lu: Dan ka Naputali.

²⁶ Ŋidwe a Silpa aketiyan a Lea ikes lu: Gad ka Aser. Arae ŋul daadaŋ ŋidwe ŋulu abu Yakob touru alo Padanaram.

Atwanare a Isaka

²⁷ Bu Yakob neni a papa keŋ a Isaka a ŋolo ayai Mamure, kori Kirias-Araba (iŋes Eburon), neni koloŋ kiboitotor Aburaam ka Isaka.

²⁸ Apaki ŋin, arae ŋikaru a Isaka amiat ka ŋatomonikanikauni.

²⁹ Ekaku, totwana Isaka emojoŋit nooi elalak ŋikaru, ido yaasi iŋes ŋidwe keŋ ŋulusapa, Esau ka Yakob, tonuka neni anukitae ŋituŋa keŋ.