Akisy. 33 - Ebaibul

Kiryamunos Yakob ke Esau

¹ Ani iŋoliyari Yakob kiŋaren, kiŋolik Esau ebunit erukito ka ŋikilyok ŋamiae ŋaomwon. Tokorak Yakob ŋidwe, inak ŋice neni a Lea, ŋice neni a Rakel ka neni a ŋaketiyak kec a ŋunaarei.

² Kisiŋaren ŋaketiyak ka ŋidwe kec, totupakis Lea ka ŋidwe keŋ, potu Rakel ka Yosepu alokaku kec a daadaŋ.

³ Eŋarenikinit Yakob ikes daadaŋ, toryedik alokwap ŋaryediket ŋakanikaarei akidol ŋina aapiyarya neni ke Esau alokaato keŋ.

⁴ Toem Esau kisiryam Yakob, totunakin neni keŋ; totun emosiriŋ a Yakob, tonu, ido kikalout.

⁵ Ani ikeuni Esau ereet, iŋolikini ŋaberu ka ŋidwe, tema, “Ata ŋae lu, ŋulu irukito ka iyoŋ lu?” Toboŋok Yakob tema, “Erae ŋidwe lu ŋulu ainaki Akuj anajokis keŋ neni a eketiyan kon.”

⁶ Toapuut ŋaketiyak a Yakob kaapei ka ŋidwe kec neni aya ikes, ido toryediko alokwap.

⁷ Lea daŋ ka ŋidwe keŋ, potu diyete toryediko alokwap. Ekaku, potu Yosepu ka Rakel diyete nen, toryediko alokwap.

⁸ Kiŋit Esau Yakob tema, “Anukiro iakuunitor iyoŋ ŋibaren ŋulu apotu eryama ka ayoŋ?” Toboŋok Yakob tema, “Erae aŋuna ka aryamunia ajokis aneni a ekapolon kaŋ.”

⁹ Nai tema Esau, “Eya ayoŋ ŋulu eketemokino, lokaato kaŋ; kiricak aŋuna kon ŋulu iyakar iyoŋ.”

¹⁰ Toboŋok Yakob tema, “Mam, ani karyamunit ayoŋ ajokis aneni kon, tocamu ainakinet ŋin aneni kaŋ. Ikoni akiŋolikin ereet kon akiŋolikin ereet ŋolo ka Akuj, anerae ikijau iyoŋ ayoŋ anajokis a ŋina etya na.

¹¹ Ekelipit ayoŋ iyoŋ, tocamu ainakinet kaŋ na ŋina ikiinunitae iyoŋ, anerae etiya Akuj neni kaŋ ejok nooi, ido ayakar ayoŋ ibore daadaŋ ŋini acamit.” Aŋuna abunio Yakob torubak edyekit Esau, abu Esau tocamu akijaar ainakinet a Yakob.

¹² Tema nai Esau neni a Yakob, “Apena oloto orukosi.”

¹³ Tolimok Yakob Esau tema, “Eyeni Ekapolon kaŋ atemar edisyak ŋidwe kaŋ ka itanakete ŋakinei ka ŋaatuk ŋuna amyat ayoŋ, ido ani karubak ayoŋ amyat ikes apaaran daadaŋ, etwakete ŋakinei daadaŋ.

¹⁴ Ekelipit ayoŋ iyoŋ ekapolon kaŋ toberari kiŋaren eketiyan kon, abuni ayoŋ iwadio iwadio lopite ŋolo elosyoto ŋibaren ŋulu amyat ayoŋ ka lopite ŋolo elosyoto ŋidwe; akitodol ŋina adolunio Seir neni a ekapolon kaŋ.”

¹⁵ Tolimok Esau Yakob tema, “Tocamakinae nai ayoŋ ekemyekinia iyoŋ ŋikilyok ŋice ŋulu ikirukit ka ayoŋ.” Nai tema Yakob, “Kaanukiro itiyaa iyoŋ ŋun? Kimyekinae ayoŋ oruwor ŋolo ajok aneni kon, ekapolon kaŋ.”

¹⁶ Aŋun, abu Esau toboŋo Seir akoloŋit ŋin.

¹⁷ Nai towot Yakob Sukos, todukok akai keŋ nen, todukok daŋ neni eperete ŋibaren. Aŋuna abunio iŋes todukio nen, abu tolimok ekiro a akibois a ŋin Sukos.

Todol Yakob Sekem

¹⁸ Kedau Yakob arotokin alo Padanaram, todol ejok lotaun ŋolo a Sekem ŋolo ayai nakwap ŋina a Kanaan, tolom kiŋaren etaun ŋol.

¹⁹ Togyelu a ŋisilipae a amiat aneni a ŋidwe ka Amor a papa keŋ a Sekem ŋalup ŋuna abu iŋes todukok eema keŋ.

²⁰ Todukok Namuroet nen, tonyara ekiro a akibois a ŋin El-Eloe-Isirael.