Akisy. 32 - Ebaibul

¹ Torotok Yakob daŋ a nen, kiryamunos ka ŋimalaikan ŋulu ka Akuj;

² ani iŋolikini Yakob ŋimalaikan tema, “Erae na ajore ŋina ka Akuj!” Aŋun, tolimok iŋes ekiro a akibois a ŋin Makanaim.

Kiyakiya Yakob ŋainakineta neni ke Esau

³ Kiyakiya Yakob ŋituŋa neni ke Esau alokaato keŋ, a ŋolo ayai Seir nakwap ŋina enyaritae Edom.

⁴ Tema neni kec, “Tolimokisi ekapolon kaŋ Esau ŋakiro nu: Ebala eketiyan kon Yakob ebe, ‘Ikiboi ayoŋ ka Laban tari tokona arae egelaanot.

⁵ Ayakar ayoŋ ŋaatuk, ŋisigirya, ŋamesekin ka ŋamee, ŋiketiyak ka ŋaketiyak. Eyakuunit tokona ayoŋ ŋituŋa lu neni kon, ekapolon kaŋ, ikotere oruwor ayoŋ ŋolo eketalakarit iyoŋ.’”

⁶ Ani eboŋorete ŋituŋa ŋul neni a Yakob, tolimokis iŋes temasi, “Aponi isua tolotoi neni alokaato kon ke Esau, ebunit iŋes tokona akisiryam iyoŋ, erukunito iŋes ka ŋikilyok ŋamiae ŋaomwon.”

⁷ Tobul Yakob nooi ka kiyaloloŋ. Totyak ŋituŋa ŋulu arukito ka iŋes ŋaarei. Totyak ŋamesekin, ŋaatuk ka ŋikaala;

⁸ etami ebe, “Ani keryamu Esau awi apei torem, idoŋi ŋinace.”

⁹ Tosodi Yakob tema, “Okoe Akuj a papa kaŋ a Aburaam, Akuj a papa kaŋ a Isaka, okoe Ekapolon ŋolo ibu itolimok ayoŋ ebe, ‘Toboŋo nakwap kon ka loyeneta kon, etiyae ayoŋ ŋuna ajokak neni kon.’

¹⁰ Eketimit ayoŋ ŋolo arae eketiyan kon tari epite ŋolo ikitoodikinia iyoŋ ayoŋ atemar irae iyoŋ ŋolo ka amina a ŋina nyiryaŋiryaŋa ka akiyookino. Apaki ŋina adokya aŋolol Yorodan, ayakar ayoŋ ebela bon, nai tokona, ayakar ayoŋ ŋauyoi ŋaarei.

¹¹ Ekelipit, toiunae ayoŋ anakan a ŋuna alokaato kaŋ ke Esau, anerae akerit ayoŋ iŋes, acepaki ebuni akiar isua daadaŋ ŋaberu ka ŋidwe.

¹² Nai idau iyoŋ Akuj atemar itiyae ŋuna ajokak neni kaŋ, ido italalauni ŋiletok kaŋ ikwa asinyon ŋina ananam ŋina nyepedor akimarun.”

¹³ Akuwar ŋin, toper Yakob nen, tolemu ŋainakineta alobaren a ŋulu amyat iŋes, ya neni ke Esau alokaato keŋ.

¹⁴ Togolok ŋamee ŋamiae ŋaarei ka ŋikorwa ŋatomoniarei, ŋamesekin ŋamiae ŋaarei ka ŋimeesekin ŋatomoniarei,

¹⁵ ŋakaala ŋatomoniuni ka ŋitak kec, ŋaatuk ŋatomoniomwon ka ŋimoŋin ŋitomon, ŋasigirya ŋatomoniarei ka ŋisigirya ŋitomon.

¹⁶ Inak Yakob ŋiketiyak keŋ ŋibaren ŋul tomyaasi, tomyaarae ŋolokabila a ŋibaren ka a kec. Tolimok Yakob ŋiketiyak keŋ tema, “Toberaros kiŋaren eriŋa ayoŋ nyebuno, ido nyisudunyito ŋibaren imeto.”

¹⁷ Tolimok ŋulu eŋarenete tema, “Ani iryamasi iyes ka lokaato kaŋ Esau, ido ikiŋit iŋes iyes tema, ‘Ŋulu a ŋae iyes? Ai ilosete iyes? Ŋae ilope a ŋibaren a lu imeto iyes a lu?’

¹⁸ Toboŋokisi iyes iŋes temasi, ‘Erae ŋulu a Yakob a eketiyan kon, erae ŋibaren lu ainakinet neni kon a ekapolon keŋ, ebunit iŋes alokaku.’ ”

¹⁹ Tolimok ikwaŋinapei ŋulu a ŋiarei ka ŋulu a ŋiuni ta ŋuluce daŋ ŋulu ameto ŋibaren tema, “Tolimokisi Esau ŋakiro ŋunapei ŋun apaki ŋina iryamyata ka iŋes.

²⁰ Totenito alimokin iŋes ebe, ‘Ebunit eketiyan kon Yakob alokaku;’ ” anerae atami Yakob atemar italakari iŋes Esau a ŋainakineta a ŋuna esiŋareniyorit iŋes, ikotere nai ani iryamun iŋes ke Esau ekaku, tocamu Esau akijaun iŋes.

²¹ Aŋun, toloto ŋainakineta a Yakob kiŋareniyosi, nai abu Yakob toper akuwar ŋin nawi keŋ.

Kisilyakae Yakob alo Peniel

²² Akuwar ŋinapei ŋin, tonyou Yakob nakwaare ya ŋaberu keŋ ŋunaarei, ŋaketiyak keŋ ŋunaarei ka ŋidwe keŋ ŋulutomon ka ipei, todoka ayonae ŋina enyaritae Yabok.

²³ Kedau akitodokar ŋituŋa keŋ ekekwaye ayonae, kitodoka ibore daadaŋ ŋini ayakar iŋes.

²⁴ Kidoŋ iŋes bon lokekwat ŋoloce, kisilek ekile ece iŋes akuwar kia akitodol iwalari akwap.

²⁵ Ani eyenuni ekile ŋol atemar pa apedorit iŋes akiloun Yakob, kidicak ekile ŋol Yakob lokalokot kai aloŋole, tolomu akai aloŋole alokalokot a Yakob apaki ŋina elyakatar ikes.

²⁶ Tema nai ekile ŋol neni a Yakob, “Kimyekinae ayoŋ olot, anerae ewala akwap.” Toboŋok Yakob tema, “Nyekemyekini ayoŋ iyoŋ tolot, mati kikiterereŋ iyoŋ ayoŋ.”

²⁷ Kiŋit nai ekile ŋol Yakob tema, “Ŋae ekiro kon?” Toboŋok Yakob tema, “Yakob.”

²⁸ Tema iŋes neni a Yakob, “Nyenyarao nabo ekiro kon Yakob, nai enyarao Isirael, anerae idayu iyoŋ akisilek Akuj ka ŋituŋa, ido ibu iyoŋ kidaŋidaŋ.”

²⁹ Kiŋit nai Yakob ekile ŋol tema, “Ŋae mono ekiro kon.” Toboŋok nai ekile ŋol tema, “Kaanukiro iŋisitor iyoŋ ekiro kaŋ?” A nen, kiterereŋ ekile ŋol Yakob.

³⁰ Tolimok Yakob ekiro a akibois a ŋin Peniel, ebala, “Erae nu aŋuna ikiŋolikinor ayoŋ ka Akuj ŋireetin, ido nyeara Akuj ayoŋ.”

³¹ Aris akoloŋ kelomu apaki ŋina atubio Yakob alo Peniel icodo, anerae awanan ekalokot keŋ.

³² Aŋun, anyoun akoloŋit ŋin, nyenyamete Ŋisirael ŋamori ŋuna eya kai aloŋole alokalokot a ŋolotyaŋ daadaŋ, anerae aponi kidicakinae Yakob namoriit ŋina a alokai aloŋole.