Akisy. 31 - Ebaibul

Tosiya Yakob ekal keŋ ka ŋibaren keŋ aneni a Laban

¹ Apaki ŋin, kiira Yakob atemar ebasi ŋidwe a Laban ŋulusapa ebe, “Aya Yakob ibore daadaŋ ŋini erae ŋini a papa yok, abarya iŋes ibore daadaŋ ŋini sek arae ŋini a papa yok.”

² Toanyu daŋ Yakob atemar pa amina Laban iŋes apaki ŋin lopite ŋolo sek aminar ekiŋaren.

³ Tema nai Ekapolon neni a Yakob, “Toboŋo nakwap atapapaa kon ka neni a ŋiyeneta kon, ikirukit ayoŋ ka iyoŋ.”

⁴ Aŋun, abu Yakob kiyakiya ituŋanan anyarare Rakel ka Lea nariet neni ayakar iŋes ŋibaren.

⁵ Tolimok ikes tema, “Aanyu ayoŋ atemar nyeriŋa papa kus akamina ayoŋ lopite ŋolo paaran akaminar. Nai ŋinapei nyimyekina Akuj apapa kaŋ ayoŋ.

⁶ Iyenete iyes atemar adau ayoŋ akitiya neni a papa kus ka agogoŋu kaŋ a daadaŋ,

⁷ nai akamodiki ayoŋ papa kus, elocok eropit kaŋ ŋarwa ŋatomon, nai nyecamakina Akuj iŋes akawani ayoŋ.

⁸ Ani elimuni Laban ebe, ‘Eruwor ŋibaren ŋulukoliyek eropit kon,’ touryata ŋibaren daadaŋ nenikol bon; ani elimuni Laban ebe, ‘Eruwor ŋibaren ŋulumeriyek eropit kon,’ touryata ŋibaren daadaŋ nenimeri.

⁹ Aŋun, alema Akuj ŋibaren aneni a papa kus, ido akainaki ayoŋ.”

¹⁰ Apaki ŋina asupotor ŋibaren, abu ayoŋ eruja, anakiruja kaŋ, abu eŋoliya kidiama eŋolik ŋikorwa ŋulu asupito ŋibaren erae ŋulububuwo, ŋulukoliyek ka ŋulumeriyek.

¹¹ Okonyar nai emalaika ka Akuj ayoŋ anakiruja tema, “Yakob” eyi ayoŋ otema, “Ayai!”

¹² Tosodi tema, “Kiŋoliu kidiama toanyuwa ŋikorwa daadaŋ ŋulu esupito ŋibaren erae ŋulububuwo, ŋulumeriyek ka ŋulukoliyek. Acamak ayoŋ nu kitiyakin, anerae eŋolik ayoŋ ŋakiro daadaŋ ŋuna itiyae Laban neni kon.

¹³ Arae ayoŋ Akuj a Besel, Akuj a akibois a ŋina ibu iyoŋ tosipok amoru, ido tobukok akimyet kidiama keŋ, ido kikoŋ neni kaŋ. Tonyou tokona anakibois a na atipei, toboŋo nakwap ŋina ikidounere iyoŋ.”

¹⁴ Tolimokis Rakel ka Lea Yakob temasi, “Emam ibore idio ŋini irumyo isua alokal a papa kosi.

¹⁵ Ikimarit iŋes isua ikirae ŋagelaanotin, anerae adau iŋes akipotor isua, ido erika ŋisiliŋa ŋulu ainio iŋes aŋuna kosi.

¹⁶ Ibore daadaŋ ŋini alemu Akuj aneni a papa kosi, erae ŋini kosi ka ŋidwe kosi; aŋun, kitiya ŋuna ikilimok Akuj iyoŋ.”

¹⁷ Aŋun, abu Yakob torotok, kitodokak ŋidwe keŋ ka ŋaberu keŋ lokaala;

¹⁸ tomyaa ŋibaren keŋ daadaŋ, ya ŋiboro keŋ daadaŋ ŋulu kebu toryamu a nen. Tomyaa ŋibaren ŋulu erae ŋulu keŋ bon, ŋulu kebu toryamu alo Padanaram. Towot nakwap ŋina a Kanaan neni a papa keŋ.

¹⁹ Apaki ŋin, alosit Laban akitub ŋajul a ŋamesekin keŋ. Aŋun, abu Rakel kisitiya apaki ŋin akokoiyarya ŋakujo ŋuna a ekal a papa keŋ.

²⁰ Tomodik Yakob Laban ŋolo anakwap ka Aramea, aŋuna pa abunio tolimok iŋes atemar acamit arotokin.

²¹ Aŋun, abu torotok, ya ibore keŋ daadaŋ. Abu iŋes todok aŋolol ŋina enyaritae Eupurate, tolot lowae ŋolo a ŋikamukumukui ŋolo ka akwap a ŋina enyaritae Gilead.

Todita Laban Yakob alorot

²² Ani epete ŋirwa ŋiuni, tolimokinae Laban atemar asii Yakob.

²³ Ani iirari Laban ŋun, tolemu ŋikilyok ŋulu arae ŋiyeneta keŋ, totupakis erot a Yakob, todol ŋirwa ŋikanikaarei etupito, toryamut ikes Yakob anakwap a ŋina a ŋikamukumukui a ŋina enyaritae Gilead.

²⁴ Ani nakwaare, bu Akuj anakiruja neni a Laban a ŋolo anakwap a ŋina ka Aramea tema, “Tocoite ilimokini Yakob ŋakiro ŋadi, ŋuna ajokak, kori ŋuna aronok.”

²⁵ Todita Laban Yakob alorot, apaki ŋina arisyo kelomya ka kigurok eema Gilead, nakwap ŋina a ŋikamukumukui. Kigurokis Laban daŋ ka ŋiyeneta keŋ ŋiemae kec nakwap ŋina a ŋikamukumukui ŋin.

²⁶ Kiŋit Laban Yakob tema, “Anukiro nu ŋuna itiya iyoŋ? Idau iyoŋ amodikin ayoŋ, ido iya ŋidwe kaŋ ŋulupesur ikwapei ŋirikon kon alojie.

²⁷ Kaanukiro isiya ka ikiŋalaa iyoŋ ayoŋ torotok ekililiŋat? Kekemyekinit ayoŋ iyoŋ tolot ilakara ka keeitoe apaki ŋin a ŋiburin ka ŋagitae.

²⁸ Kaanukiro pa ikimyekinia iyoŋ ayoŋ onu ŋipapae ka ŋidwe kaŋ etolot emam ŋace? Idau iyoŋ akitiya ŋakiro ŋuna ka abaŋao.

²⁹ Ayakar ayoŋ apedor akiwan iyoŋ; nai abu Akuj a papa kon kirwor neni kaŋ bien nakwaare tema, ‘Tocoite ilimokini Yakob ŋakiro ŋadi, ŋuna ajokak, kori ŋuna aronok.’

³⁰ Tari ŋina amaikina iyoŋ tolosyo aŋuna ikiburitor nooi ekal a papa kon, nyo ikokoiyarya iyoŋ ŋakujo kaŋ.”

³¹ Toboŋok Yakob Laban tema, “Akuryana ayoŋ, anerae atami atemar ikidemari iyoŋ ayoŋ atanakoku kon ka agogoŋu.

³² Nai ituŋanan daadaŋ ŋini iryamuni iyoŋ eyakar ŋakujo kon, nyemaikina toyar. Alokiŋaren ŋiyeneta yok, kiwaru iyoŋ elope ibore kon ŋini ayakar ayoŋ, ido tolema.” Apaki ŋin, pa ayeni Yakob atemar kekokounit Rakel ŋakujo a Laban.

³³ Aŋun, abu Laban toloma loeema a Yakob, a Lea ka ŋolo a ŋaketiyak a ŋunaarei, nai abu nyeryamu ŋakujo. Toloma aloeema a Lea tolot loeema a Rakel.

³⁴ Kerae Rakel kelemunit ŋakujo ŋuna a ekal a Papa keŋ, kiwuakinit iŋes ikes nisaaja ŋini a ekaal ŋini eboiyo iŋes. Kiwar Laban ŋakujo keŋ loboro daadaŋ aloeema, nai nyeryamu jik.

³⁵ Tema Rakel neni a papa keŋ, “Kisyoni ayoŋ ekapolon kaŋ aŋuna pa awoya ayoŋ alokiŋaren kon, erae aŋuna ayakar ayoŋ lolap iŋes pa awoya.” Abu Laban kiwar ŋakujo ŋuna a ekal keŋ, nai nyeryamu.

³⁶ Apaki ŋin, toŋo Yakob kitepegak Laban kiŋit tema, “Nyo asecit ayoŋ? Anisecit etiya ayoŋ ŋina ikiwuapya iyoŋ ayoŋ a aryenyeo?

³⁷ Idau iyoŋ tokona akiwar ŋakujo kon aloboro kaŋ daadaŋ, nyo iryamu iyoŋ ŋini erae ŋini a ekal kon? Kiwuak ne, kiŋaren ŋiyeneta kon ka ŋulu kaŋ, kimyek ikes totubo ŋakiro aŋuna yok a ŋiarei.

³⁸ Adau ayoŋ akiboi ka iyoŋ ŋikaru ŋatomoniarei, emam ŋamesekin, kori ŋamee kon ŋuna apotu kiyecut, nyenyama ayoŋ ŋimeesekin a ŋakinei kon.

³⁹ Nyeyauna ayoŋ neni kon ibarasit idio ŋini enyamito ŋityaŋ, nai atacenene ayoŋ elope ŋul. Ikitatacenene iyoŋ ayoŋ ŋibaren kon ŋulu akokoiyanaryo naparan, kori nakwaare.

⁴⁰ Ekote ŋakiro ne aneni kaŋ: Abu akoloŋ okonomenenee ayoŋ naparan, okonyamenenee akaterot nakwaare ka adaunun ŋajo anakonyen kaŋ.

⁴¹ Ŋikaru ŋulutomoniarei lu daadaŋ, ŋulu eboiyo ayoŋ alokal kon, abu etiya neni kon ŋikaru ŋitomon ka ŋiomwon aŋuna a ŋidwe kon a ŋulupesur a ŋuluarei ka ŋikaru ŋikanikapei aŋuna a ŋakinei kon, ido ilocok iyoŋ eropit kaŋ ŋarwa ŋatomon.

⁴² Ani kerae nyikirukit ayoŋ ka Akuj a papa kaŋ, Akuj ŋina ka Aburaam ka kerae nyetopoloorit ayoŋ Isaka, kire jik, kikiritarit iyoŋ ayoŋ aneni kon eororete ŋakan. Abu Akuj ikisibura iyoŋ bien nakwaare, anerae abu kiŋolik ŋican kaŋ ka etic ŋolo etiya ayoŋ a ŋakan kaŋ.”

Tocamunos Laban ka Yakob

⁴³ Toboŋok Laban Yakob tema, “Erae ŋidwe ŋulupesur lu ŋulu kaŋ, ŋidwe kec daŋ erae ŋulu kaŋ, ŋakinei daŋ erae ŋuna kaŋ ka ibore en daadaŋ ŋini ite iyoŋ erae ŋini kaŋ. Nai anu mono emaikina ayoŋ etiya nakuwar na aŋuna a ŋidwe kaŋ a ŋulupesur a lu, kori aŋuna a ŋidwe kec a ŋulu auruut ikes?

⁴⁴ Bua tokona, ewuakisi acamunet yok; toruwor acamunet ŋin esuuda aneni yok.”

⁴⁵ Aŋun, abu Yakob tolemu amoru, tosipok kwap esibit epir.

⁴⁶ Tema neni a ŋiyeneta keŋ, “Kirirautu ŋamoru,” kiriraut ikes ŋamoru totukokis; ido kimuja a nen alodiyete atukot a ŋamoru.

⁴⁷ Tonyara Laban atukot a ŋamoru a ŋun Yegar-Sudusa. Tonyara Yakob daŋ atukot a ŋamoru a ŋun Galeed.

⁴⁸ Tema Laban, “Erae atukot a ŋamoru na esuuda kaŋ ka iyoŋ nakuwar na.” Aŋun, abu iŋes tonyara ekiro a atukot a ŋamoru a ŋun Galeed,

⁴⁹ tosodi tonyara ekiro a amoru a ŋina asipokini iŋes esibit epir ebe Misipa, anerae abala iŋes, “Ikite Ekapolon ayoŋ ka iyoŋ, apaki tari ŋina nyikirukitor.

⁵⁰ Ani kiteryamu iyoŋ ŋidwe kaŋ ŋican, kori kiryamu iyoŋ ŋaberu ŋace kiyatak lodwe kaŋ, erae Akuj esuuda yok tari kemam ituŋanan ŋini ikirukit ka iwon a ne.”

⁵¹ Tolimok nai Laban Yakob tema, “Kiŋolik atukot a ŋamoru na ka kiŋolik amoru ŋina esipo na, ŋuna ewuak ayoŋ kidiŋ yok.

⁵² Erae atukot a ŋamoru na esuuda ka ŋina esipo daŋ erae esuuda ŋolo nyalunyunor ayoŋ anatukot a ŋamoru a na neni kon ka iyoŋ daŋ nyilunyunor anatukot a ŋamoru ka anamoru a ŋina esipo neni kaŋ, owanas.

⁵³ Elipi ayoŋ Akuj ŋina ka Aburaam ka Naor, Akuj ŋina a papa kec totub ŋakiro yok.” Apotu ŋakiro ŋun kisikoŋo Yakob anakerit Papa keŋ Isaka.

⁵⁴ Tolemu Yakob amuronot anakwap a ŋina a ŋikamukumukui a ŋin, tonyarau ŋiyeneta keŋ nakimuj. Kedaut akimuj, topero nen akuwar ŋin.

⁵⁵ Ani taparacu iwalari, tonyou Laban, tonu ŋipapae keŋ ka ŋidwe keŋ ŋulupesur ŋul, kiterereŋ, ido torotok toboŋo lore keŋ.