Akisy. 27 - Ebaibul

Kiterereŋ Isaka Yakob

¹ Ani emojoŋi Isaka ejoŋoete ŋakonyen akitere ejok, tonyarau lokoku keŋ Esau ŋolokiyae, tolimok iŋes tema, “Lokoku”; toboŋok Esau tema, “Ayai.”

² Tema Isaka, “Kiŋolik iyoŋ, amojoŋ ayoŋ, nyayeni ayoŋ akoloŋit ŋina ekekarya.

³ Aŋun, tolemu ŋiboro kon ŋulu a ejie, ekileŋ ka ŋikaleŋeleŋe, tolot nariet itaarak etyaŋ edio,

⁴ ani kiar, iyau ikipoki ayoŋ akimuj ŋina ajokan ŋina sek amina ayoŋ, iyau emuj, ikotere eketerereŋ ayoŋ iyoŋ eriŋa ayoŋ nyetwana.”

⁵ Apaki ŋin, apupi Rebeka ŋakiro ŋuna alimonokini Isaka lokoku keŋ Esau. Ani erotokini Esau nariet akirika ŋityaŋ ŋulu eyauni neni a papa keŋ,

⁶ tolimok Rebeka lokoku keŋ Yakob tema, “Abu ayoŋ eira papa kon isirwori lokaato kon Esau ebala,

⁷ ‘Toarakinae ayoŋ etyaŋ, ikipoki ayoŋ akimuj ŋina ajokan emuj, ikotere eketerereŋ ayoŋ iyoŋ alokiŋaren Ekapolon eriŋa ayoŋ nyetwana.’

⁸ Aŋun, lokoku kaŋ, kiwuap ŋakiro kaŋ ŋuna ekecikakini ayoŋ iyoŋ.

⁹ Ape losipan a ŋamesekin, toseu ŋikaalei ŋiarei iyau, ikotere etemok ayoŋ akimuj ŋina ajokan aŋuna a papa kon, akimuj ŋina sek emina iŋes.

¹⁰ Ani ketemok ayoŋ, iya iyoŋ neni a papa kon kimuj iŋes, ikotere ikiterereŋ iyoŋ eriŋa iŋes nyetwana.”

¹¹ Nai tolimok Yakob toto keŋ Rebeka tema, “Kiira, erae lokaato kaŋ Esau ŋolo ecekum akuwan, ido nyecekum akuwan kaŋ.

¹² Acepaki akararapi ayoŋ papa kaŋ, ido esubuni akyenar ayoŋ iŋes, yaut ŋun ŋicen nakuwan kaŋ akilo ŋarereŋisyo.”

¹³ Tema toto keŋ neni a Yakob, “Kimyek ŋicen kon potu neni kaŋ lokoku, emaikina iyoŋ kiwuap ŋakiro kaŋ bon, tolot iyau ŋikaalei ŋul neni kaŋ.”

¹⁴ Aŋun, abu Yakob tolot todaku ŋikaalei, yau neni a toto keŋ; kitemok nai toto keŋ akimuj ŋina ajokan, ŋina ekoni ŋina amina papa a Yakob.

¹⁵ Tolemu nai Rebeka ŋilowi ŋulu ebusak ŋulu ke Esau alokoku keŋ a ŋolo apolon, ayakasi ŋilowi ŋul kai, kitanapik Yakob lokoku keŋ ŋolo cici.

¹⁶ Kitanapik ŋilowi a ŋikaalei nakan ka lodokole.

¹⁷ Tosodi inak akimuj ŋin ŋina ajokan ka amugati ŋina epot iŋes neni alokoku keŋ Yakob.

¹⁸ Tolot Yakob neni a papa keŋ tema, “Papa” tema papa keŋ, “Ayai, ŋae iyoŋ lokoku?”

¹⁹ Tolimok Yakob papa keŋ tema, “Arae ayoŋ Esau lokoku kon ŋolokiyae. Etiya ayoŋ ikwa ŋina ikilimokinitor iyoŋ ayoŋ, kiboikin tokona kimuj etyaŋ ŋolo aar ayoŋ, ikotere ikiterereŋ ayoŋ.”

²⁰ Nai kiŋit Isaka lokoku keŋ tema, “Ikokini mono iyoŋ lokoku iari etyaŋ atipei ai? ” Toboŋok iŋes tema, “Ekapolon ŋolo erae Akuj kon abu okoinak ayoŋ aryamun atipei.”

²¹ Tolimok Isaka Yakob tema, “Toapu ne, ikotere okotap ayoŋ iyoŋ okoyen lokoku, oyenu erae kirae iyoŋ kire lokoku kaŋ Esau, kori ice.”

²² Aŋun, abu Yakob tolot toapiya neni a Isaka a papa keŋ a ŋolo abu torarap iŋes ecamit akiyen, tosodi tema, “Erae etoil ŋolo a Yakob, nai erae ŋakan ŋakan a Esau.”

²³ Abu Isaka nyeyen Yakob, anerae acekum ŋakan keŋ ikwa ŋakan ke Esau alokaato keŋ, aŋun, abu Isaka kiterereŋ Yakob.

²⁴ Kiŋit tema, “Irae mono iyoŋ kire lokoku kaŋ Esau a?” Toboŋok Yakob tema, “Arae.”

²⁵ Tosodi Isaka tema, “Yau akimuj ŋin neni kaŋ, ikotere emuj etyaŋ alokoku kaŋ eketerereŋ iyoŋ.” Aŋun, abu Yakob yau akimuj neni keŋ kimuj, inak epiini daŋ tomat.

²⁶ Tolimok nai Isaka lokoku keŋ tema, “Toapu ne itonu ayoŋ lokoku.”

²⁷ Toapu nai Yakob neni a papa keŋ tonu iŋes; kiŋu Isaka eure a ŋilowi ke Esau, tosodi kiterereŋ Yakob tema, “Kire, ikoni eure alokoku kaŋ ŋolo a emanikor a ŋolo iterereŋit Ekapolon.

²⁸ Elipi ikiinak Akuj iyoŋ akiru anakuj ŋina isikopi ŋalup ka kitojok ŋalup torata ŋuna etiitiyete, ikiinak iŋes iyoŋ ŋikinyom ŋulu alalak ka epiini ŋolo alalan.

²⁹ Ikitiyanakinete ŋituŋa iyoŋ ka eryedikete ŋituŋa a ŋakwapin neni kon. Iruwor iyoŋ ekapolon a ŋikaitotoi kon, ekukonokin ŋisapa ŋulu ke ekal kus aloŋaren kon, ilamam ituŋanan daadaŋ ŋini ikilami iyoŋ ka erereŋ ituŋanan daadaŋ ŋini ikiterereŋi iyoŋ.”

Arereŋu ŋina abu Esau totwania

³⁰ Apaki ŋinapei erikakinia Isaka akiterereŋ Yakob, kerotoki Yakob aneni a papa keŋ, todolu lokaato keŋ Esau alorika.

³¹ Kitemok Esau daŋ akimuj ŋina ajokan, ido yau neni a papa keŋ, tolimok papa keŋ tema, “Kiboikin papa kimuj etyaŋ alokoku kon, ikotere ikiterereŋ ayoŋ.”

³² Kiŋit Isaka lokoku keŋ Esau tema, “Ŋae iyoŋ lokoku?” Toboŋok Esau tema, “Arae ayoŋ Esau lokoku kon ŋolokiyae.”

³³ Tomaranik Isaka nooi tema, “Arae bo ŋae ŋolo abu toar etyaŋ okoinu ayoŋ onyam daadaŋ eriŋa iyoŋ nyebuno, ido adau ayoŋ akiterereŋ iŋes? Kire! Erubakini iŋes erae ŋolo erereŋ!”

³⁴ Ani iirari Esau ŋakiro ŋuna alimuni papa keŋ, kikalou nooi enomorito ŋakiro etau, tema neni a papa keŋ, “Kiterereŋoe papa! Kiterereŋoe ayoŋ daŋ papa!”

³⁵ Nai toboŋok Isaka tema, “Abu lokaato kon tomodiun, ido adau akiya arereŋu kon.”

³⁶ Tema Esau, “Nyiyookino mono ekiro ŋolo elimokinitae iŋes ebe Yakob a? Anerae akamodiki tokona iŋes ayoŋ ŋamodikinet ŋaarei. Ŋina esyaunan abu ekejaa ayoŋ apolou ŋina araakar ekiyae, tokona, aya arereŋu ŋina arae ŋina kaŋ.” Kiŋit Esau papa keŋ tema, “Emam arereŋu idekinit iyoŋ aŋuna kaŋ a?”

³⁷ Toboŋok Isaka Esau tema, “Adau ayoŋ akituruwor Yakob ekapolon kon ka adau ainakin ŋikaitotoi keŋ daadaŋ aruwor ŋiketiyak keŋ, ainak ayoŋ neni keŋ ŋikinyom ka epiini. Anukiro nai tokona emaikina ayoŋ etiya neni kon lokoku?”

³⁸ Tema Esau neni a papa keŋ, “Arereŋu mono apei bon iyakar iyoŋ papa a? Kiterereŋoe papa! Kiterereŋoe ayoŋ daŋ papa!” Kiworou Esau nooi kikalou.

³⁹ Toboŋok Isaka iŋes tema, “Kiira elwaniar akibois kon analup a ŋuna ajokak a ŋuna etiitiyete ka aneni isikopiyonokini akiru ilimi.

⁴⁰ Iyarikini iyoŋ loboro ŋulu irikaa, ido itiyanakini iyoŋ lokaato kon; nai ani kiwou iyoŋ akitiyanakin iŋes, ipedori akitiya ŋuna icamit.”

Kitisi adedeŋu ke Esau Yakob

⁴¹ Kiman Esau Yakob aŋuna ka arereŋu a ŋina abu Isaka inak Yakob, tema Esau alotau keŋ, “Aapuut ŋirwa ŋulu egworyo ayoŋ papa kaŋ; ekaku, aari ayoŋ Yakob lokaato kaŋ.”

⁴² Nai keponi tolimokinae Rebeka ŋakiro a Esau alokoku keŋ a ŋolokiyae; aŋun, abu iŋes kiyakiya ituŋanan anyarare Yakob lokoku keŋ ŋolo cici, tema neni a Yakob, “Ililiŋia lokaato kon Esau ŋakiro, ido itemonokin akiar iyoŋ.

⁴³ Aŋun, lokoku, kiwuap ŋakiro kaŋ; tosi atipei Aran neni a Laban alokaato kaŋ.

⁴⁴ Kiboiyoto ka iŋes apaki adio akitodol ŋina edaunor aŋoit aneni alokaato kon

⁴⁵ ka ŋina epuripuryaaror anyunyura keŋ aŋuna kon kimuryakis daŋ ŋuna itiya iyoŋ neni keŋ. Eyakuuni ayoŋ ituŋanan itonyar iyoŋ aina edaun ŋun. Kaanukiro atwaniyarya ayoŋ iyes daadaŋ akoloŋit apei?”

⁴⁶ Tema nai Rebeka neni a Isaka, “Akaup ayoŋ akiyar kaŋ na aŋuna a ŋaberu a ŋuna erae Ŋaitaiti. Ani kiit Yakob Aititait ikwapei ŋaberu nu, apei anaberu a ŋuna ka akwap a na, anijokis aryamuni ayoŋ anakiyar kaŋ?”