Akisy. 2 - Ebaibul

¹ Kirikakin akisub kidiama, akwap ka ŋinibore daadaŋ ŋini eyai neni kec.

² Ani akoloŋit ŋina a ŋakanikaarei, kirikakinite Akuj akisub ŋiboro daadaŋ ŋulu sek asubi, ido abu kieŋu akoloŋit ŋin alotic keŋ a daadaŋ a ŋolo a akisub.

³ Kiterereŋ Akuj akoloŋit ŋina a ŋakanikaarei kitesegu, anerae akoloŋit ŋin, abu iŋes kieŋu alotic keŋ a daadaŋ a ŋolo a akisub.

⁴ Erae ŋol epite ŋolo asubia Akuj kidiama ta akwap. Akoloŋit ŋina asubia Ekapolon Akuj akwap ka kidiama,

Emanikor ŋolo ka Eden

⁵ ariŋa ŋikito ka ŋinya ŋulu ka ariet nyepena nakwap ka ariŋa nyerupuna ibore daadaŋ alokwap, anerae ariŋa Ekapolon Akuj nyisilima akiru ka amam ituŋanan ŋini etae akwap.

⁶ Nai aitununuyete ŋakipi alokwap tolelekis akwap daadaŋ.

⁷ Toyeu nai Ekapolon Akuj ituŋanan a ŋalup, tokutak ekieŋanu ŋolo erae akiyar lokumes a ituŋanan; toruwor ituŋanan ŋin ŋini eyari.

⁸ Kiwuak Ekapolon Akuj emanikor lowae ŋolo alo Kide, neni anyaritae Eden, kiwuak ituŋanan ŋini asubuni iŋes nen.

⁹ Analup a ŋuna a emanikor a ŋol, abu Ekapolon Akuj kiturup ŋikito daadaŋ ŋulu ebusak ka ajokak aŋuna ka akimuj. Ayakasi daŋ kidiŋ emanikor ŋol ŋikito ŋiarei, epei ŋolo ka akiyar ka epei ŋolo ka ayenut ajokis ka aronis.

¹⁰ Ayai aŋolol ŋina ageunit alomanikor a Eden, ŋina alelenakini emanikor ŋol, ekicarit aŋolol ŋin a nen ŋaomwon.

¹¹ Arae ekiro a ŋina esyaunan Pison, ŋin iŋes ŋina irimokinit akwap ŋina ka Apila daadaŋ ŋina eyai egolid

¹² ka ejok egolid a akwap a ŋin ka eyai nakwap ŋin eminae ŋolo akukunyon ka ŋamoru ŋuna areŋak puu ŋuna enyaritae Onikis.

¹³ Arae ekiro ka aŋolol a ŋina a ŋaarei Gion, ŋin iŋes ŋina irimokinit akwap ŋina a Kuc.

¹⁴ Arae ekiro ka aŋolol a ŋina a ŋauni Tigris, ŋin iŋes ŋina elele lowae ŋolo alo Kide anakwap a ŋina ka Asiriya. Aŋolol ŋina a ŋaomwon iŋes Eupurate.

¹⁵ Ya Ekapolon Akuj ituŋanan, kiwuak lomanikor ka Eden, akitiya nen ka akidar emanikor ŋol.

¹⁶ Kicik Ekapolon Akuj ituŋanan tema, “Ipedori iyoŋ akinyam ŋaraito a ŋolokitoe daadaŋ eyai lomanikor;

¹⁷ nai ŋuna a Ekitoe a ŋolo ka ayenut ajokis ka aronis, nyitemokino iyoŋ akinyam, anerae akoloŋit ŋina inyamia iyoŋ ikes, itwani iyoŋ kire jik.”

¹⁸ Tema Ekapolon Akuj, “Nyejok ekile erae iŋes bon eyai. Etiyauni ayoŋ ikeŋarakinan ŋini ejok aneni keŋ.”

¹⁹ Tosodi Ekapolon Akuj kitatakanu analup ŋityaŋ ŋulu ka ariet daadaŋ ka ŋikyeny daadaŋ, yau ikes neni a ekile ecamit aanyun epite ŋolo enyaraa ekile ikes. Ekiro daadaŋ ŋolo abunio ekile tonyaraa ŋinisubuna daadaŋ, ekiro keŋ ŋolopei.

²⁰ Tolimonok ekile ŋibaren, ŋikyeny ka ŋityaŋ daadaŋ ŋulu ka ariet ŋirorwa. Nai mam alosubuna a ŋul ŋini abu Akuj toryamu itemokino erae ikeŋarakinan ekile.

²¹ Kitojotoo Ekapolon Akuj ekile nooi, tosodi tolemu amaran keŋ apei, kimuleleya nen a akiriŋ.

²² Kitiyau Ekapolon Akuj aberu anamaran a ŋina alemuni alokile, ido yau aberu ŋin neni a ekile.

²³ Tema ekile, “Erae tokona na akoit ŋina anakoyo kaŋ, akuwan ŋina anakuwan kaŋ. Enyarao iŋes aberu, anerae neni ke ekile elemunitere iŋes.”

²⁴ Aŋakiro aŋun, eesikini ekile papa keŋ ka toto keŋ, tosodi kimorikinos ka aberu keŋ; toruworos ikes apeikuwan.

²⁵ Apaki ŋin alerete, ekile ka aberu keŋ, pa erumito ikes ŋileec.