Akisy. 19 - Ebaibul

Aronis a ŋituŋa a Sodoma

¹ Ani eboŋ, potu ŋimalaikan ŋuluarei ŋul Sodoma. Apaki ŋin, eboi Lot alopuke a Sodoma. Ani iŋolikini Lot ikes tokuraun kisiryam ikes, toryedik, kijuuru todol ereet kwap.

² Tema, “Ekeŋitakinit iyes ŋikapolok kaŋ toriut akiper kai a eketiyan kus, kilotasi ŋakejen; kisyokakis nai moi taparacu eriŋa ataparacu.” Tolimokis ikes Lot temasi, “Mam, eperyo isua nenilapat alokidiŋ etaun.”

³ Todyek Lot ikes nooi, ido toriwo neni ayai iŋes, toloto kai keŋ. Kijau Lot ikes, tolimok ŋiketiyak keŋ akitemokin akimuj. Kipout ŋamugati ŋuna amam ŋakinyalet kimuja ikes.

⁴ Nai, ani eriŋa ikes nyinapakina, kirikaut akai a Lot ŋikilyok ŋulu a etaun a ŋolo a Sodoma, ŋisorok ka ŋikasikou, mam ipei daŋ alokilyok ŋini amam a nen.

⁵ Tonyarata ikes Lot temasi, “Nyaalu ŋikilyok ŋulu sek apote neni kon eboŋ? Yau ikes kiŋa ne neni kosi ikotere toyenae isua ikes.”

⁶ Toloma Lot kiŋa epuke neni ayakasi ikes, togolok epuke keloma iŋes kiŋa;

⁷ tolimok ikes tema, “Ŋikaitotoi kaŋ, akadyekit ayoŋ iyes, nyitiyata aronis.

⁸ Kiirasi, ayakar ayoŋ ŋidwe kaŋ ŋulupesur ŋiarei ŋulu nyiryamakina ka ŋikilyok, kimyekinae oyau ikes kiŋa ne neni kus, kitiyata neni kec ŋuna ikitalakarito iyes, nai nyitiyata ŋadi neni a ŋikilyok a lu, anerae adaut ikes alomun kai kaŋ.”

⁹ Nai toboŋokis ikes temasi, “Kiyoto!” Tosodi temasi, “Abuni lo ne erae egela, ido itemokino mono iŋes erae ekatubon jwi jwi a? Ikisicanio tokona isua iyoŋ erono nooi akilo ŋikilyok ŋul.” Kijukasi ikes Lot nooi, kiimakis lopuke aŋuna ka abwaŋia epuke.

¹⁰ Nai apotu ŋikilyok ŋuluarei ŋulu ayakasi tooma kai ŋul kireput ŋakan kec aneni aŋaara alopuke, kiriyasi Lot tooma akai, ido togolokis epuke.

¹¹ Apotu ikes kitumudukana ŋikilyok ŋulu ayakasi kiŋa epuke; toŋopik ikes epuke. Apotu ŋun kitiyakin neni a ŋisorok ka neni a ŋikasikou.

Akinyasuno a Sodoma ka Gomora

¹² Kiŋita ŋikilyok ŋuluarei ŋul Lot temasi, “Eya ŋituŋa kon ŋice eya ne ikwapei ŋidwe kon ŋulusapa, ŋikamurak kon ka ŋidwe kon ŋulupesur ta daadaŋ ŋulu erae ŋituŋa kon lotaun lo a? Kirirau ikes tolomarya anakibois a na,

¹³ anerae eapi isua akinyasun akibois na aŋuna alalaaror nooi ŋituŋa a akibois a na akigworonokin Ekapolon, aŋun, ikiyaku Ekapolon isua akinyasun iŋes.”

¹⁴ Toloma Lot alokai keŋ tolot tolimok ŋikilyok ŋulu eikinitae akiit ŋidwe keŋ tema, “Tonyoutu, olomasi anakibois a na; anerae eapi Akuj akinyasun etaun lo.” Nai totakan aneni a ŋikilyok a ŋul esibit pa emukekinit Lot ŋuna erworo.

¹⁵ Ani ereŋuni akwap eapuuni akiwalar, todyeka ŋimalaikan Lot, temasi, “Tonyou, ya aberu kon ka ŋidwe kon ŋulupesur ŋulu eya ne, ani kemam, ikimunyaryo iyes daŋ anakisicanio a ŋina a etaun a lo.”

¹⁶ Torubak Lot irimirimi, kikamut nai ŋimalaikan akan a Lot ka ŋina ka aberu keŋ, ta ŋuna a ŋidwe keŋ a ŋuluarei a ŋulupesur a ŋul; anerae arimakinit Ekapolon iŋes, torikut ŋimalaikan iŋes kiŋa, kimyekis alokiŋa etaun.

¹⁷ Ani erikunete ŋimalaikan ikes kiŋa, tolimokis ŋimalaikan ikes temasi, “Toema aŋuna ka akiyar kus nyiŋoliut kaku, kori nyiwo aiwadio anenilapat, toema lomukura, ani pa kiema, idaunosi.”

¹⁸ Tolimok Lot ikes tema, “Mam, meere ikoŋina ŋikapolok kaŋ!

¹⁹ Adau ayoŋ eketiyan kus aryamun ajokis alokiŋaren kus ka ikitoodikis iyes ayoŋ arimao ŋina apolon anaiun akiyar kaŋ. Nyaemi ayoŋ lomukura, anerae epedori akisicanio na aryamun ayoŋ alorot, ido otwan.

²⁰ Kiŋolikisi, eapi etaun ŋol nooi, apedori ayoŋ akiem neni keŋ, ido edit iŋes. Kimyekinae ayoŋ oem nen, nyedit mono etaun ŋol a? Epedori akiyar kaŋ aiun.”

²¹ Tolimok Ekapolon iŋes tema, “Ejok nooi, adau ayoŋ acamakin ŋun aŋuna kon, ido nyenyasuni daŋ ayoŋ etaun ŋol ŋolo ikilimok iyoŋ ayoŋ.

²² Kiwonyak, toem inaa, anerae emam ŋuna etiyakini ayoŋ eriŋa iyoŋ nyedolo inaa.” Aŋun, aponi tolimokinae ekiro a etaun a ŋolo aemi Lot Soar.

²³ Aris akoloŋ kelomu apaki ŋina adolio Lot Soar.

²⁴ Totiyau Akuj sulpa ka akim alokidiama ikwa akiru lotaunio ŋulu a Sodoma ka Gomora;

²⁵ tomunya ŋitaunio ŋul ka ŋadipoe a ŋimukura ka ŋituŋa a ŋitaunio a ŋul daadaŋ ta ibore daadaŋ ŋini alomunit analup kec.

²⁶ Nai kebu aberu a Lot emotuno alokaku Lot kiŋolia kaku, ido toruwor acumbi, kidoŋ esipo nen.

²⁷ Ani iwalari, kisyokak Aburaam nakibois ŋina sek awuar iŋes alokiŋaren Ekapolon;

²⁸ kirereiyo a nen kwap lowae ŋolo a Sodoma ka Gomora ka lowae ŋolo a ŋadipoe a ŋimukura, kiŋolik apuru a akwap a ŋin eremit kidiama ikwa ŋina ka arira a ŋina ti apolon.

²⁹ Nai ŋina enyasunia Akuj ŋitaunio ŋulu aya nadipo anakwap a ŋin, abu iŋes tominak Aburaam, ido tolema Lot alotaunio a ŋul apaki ŋina enyasunia ŋitaunio ŋul, ŋulu sek eboiyo Lot ekiŋaren.

Epite ŋolo esyakiniata Ŋimoabi ka Ŋiamoni

³⁰ Torotok Lot alo Soar kitipeiyo lomukura, kiboiyo nen ka ŋidwe keŋ ŋuluarei ŋulupesur, anerae abu iŋes tokuryaniar akiboi alo Soar. Kiboiyoto Lot ka ŋidwe keŋ ŋuluarei ŋul anaturukan.

³¹ Tolimok nakoku a Lot ŋina apolon ŋina cici tema, “Amojoŋ papa, ido emam ekile ebuni ne akiit iwon, torae bo epite a ŋituŋa a daadaŋ anakwap akiita.

³² Bua, oinakisi papa epiini, ikotere tomerakin, ikituruwo iwon ŋaberu keŋ, eturubakisi iwon ŋiletok a papa eya.”

³³ Kitamata ikes papa kec epiini akoloŋit ŋin nakwaare, kisyau ŋina apolon tolot neni a papa keŋ kiryamakin ka iŋes pa eyeni papa keŋ apaki ŋina keperyo apese ŋin nen ka ŋina kenyounio tolot.

³⁴ Akoloŋit ŋina atupakini ŋin, tolimok apese ŋina apolon ŋina cici tema, “Kiira, abu bien ayoŋ nakwaare eryamakin ka papa, etamata nabo papa takae eboŋ epiini, ikotere tolot iyoŋ daŋ kiryamakin ka iŋes, eturubakisi iwon ŋiletok a papa eya.”

³⁵ Kitamata ikes papa kec epiini akoloŋit ŋin nabo nakwaare, tolot ŋina cici kiryamakin ka papa keŋ pa eyeni papa keŋ apaki ŋina keperyo apese ŋin nen kori ŋina kenyounio tolot.

³⁶ Aŋun, apotu ŋidwe a Lot ŋulupesur ŋul toryamut ŋidwe ŋulu arae papa kec aurikini ikes.

³⁷ Abu apese ŋina apolon kidou ikoku ŋinisapat tolimok ekiro keŋ Moab, iŋes papaa a Ŋimoabi tari tokona.

³⁸ Abu apese ŋina cici daŋ kidou ikoku ŋinisapat tolimok ekiro keŋ Benami; iŋes papaa a Ŋiamoni tari tokona.