Akisy. 17 - Ebaibul

Emacar ŋolo ka Acamunet

¹ Ani edolete ŋikaru ka Aburam ŋatomonikanikaomwon ka ŋikanikaomwon, totakanu Ekapolon neni ka Aburam tolimok iŋes tema, “Arae ayoŋ Akuj ŋina Etiron, kiwuap ŋakiro kaŋ torae ituŋanan ŋini iyookino.

² Ewuakini ayoŋ acamunet kaŋ ka iyoŋ, ido ekepituni ayoŋ iyoŋ nooi.”

³ Toryedik Aburam, kijuuru todol ereet kwap, tosodi Akuj tema,

⁴ “Aneni kaŋ, erae na acamunet kaŋ ka iyoŋ; iruwor iyoŋ papa a ŋakwapin a ŋuna alalak.

⁵ Nyenyarao nabo ekiro kon Aburam, nai enyarao ekiro kon Aburaam, anerae eketuruwo ayoŋ iyoŋ papa ŋakwapin a ŋuna alalak.

⁶ Eketipituni ayoŋ iyoŋ nooi, ido etolomuni ayoŋ ŋituŋa a ŋakwapin aloletok kon; elomunete ŋirwosi alotuŋa a ŋul.

⁷ Ewuakini ayoŋ acamunet kaŋ ka iyoŋ ka ŋiletok kon ŋulu a ŋanyameta a daadaŋ, eruwor acamunet ŋin ŋina a ŋikaru ka ŋikaru. Arubakini ayoŋ arae Akuj kon ka ŋina a ŋiletok kon.

⁸ Akainakini ayoŋ iyoŋ ka ŋiletok kon akwap na ŋina tokona iraakatar iyes ŋigelaanotin, akwap ŋina a Kanaan daadaŋ, toruwor ŋina kus jik, ido aruwor ayoŋ Akuj a ŋiletok kon.”

⁹ Tolimok Akuj Aburaam tema, “Emaikina iyoŋ torubak iricit acamunet kaŋ ka iyoŋ, iyoŋ kaapei ka ŋiletok kon ananyameta kec a daadaŋ.

¹⁰ Acamunet kaŋ ka iyoŋ ŋina emaikina iyoŋ kiric, toyai neni kon ka ayoŋ ta ŋiletok kon iŋes na: Itemokino ŋinikoku kus ŋinisapat kileŋerae.

¹¹ Kileŋera ikes toruwor ŋol emacar ŋolo ka acamunet kaŋ ka iyes.

¹² Ananyameta kus a daadaŋ, itemokino kileŋerae ŋidwe ŋulusapa daadaŋ apaki ŋina edolio ŋinikoku ŋirwa ŋikanikauni, itemokino kileŋerae tari ŋidwe a ŋipi ŋulu idounio alorerya kus ka ŋulu igyelunete iyes alotuŋa a ŋulugelae, a ŋulu nyerae ŋidwe a ŋiletok kus.

¹³ Kire jik, ŋisapa daadaŋ ŋulu idounio alorerya kus ka ŋulu igyelunete iyes, itemokino kileŋerae. Ŋun iturubakinete acamunet kaŋ ka iyes eyai neni kus erae ŋina a ŋikaru ka ŋikaru.

¹⁴ Isapat daadaŋ ŋini nyileŋeritae, eruwor igela alotuŋa keŋ, ido adau akimen acamunet kaŋ ka iyes.”

¹⁵ Tolimok Akuj Aburaam tema, “Nyinyarae nabo iyoŋ aberu kon Sarai, nai eruwor ekiro keŋ Sara;

¹⁶ eterereŋi ayoŋ iŋes ka daŋ iryamuni iyoŋ ikoku ŋinisapat aneni keŋ. Kire, eterereŋi ayoŋ iŋes ka eruwor iŋes toto a ŋituŋa a ŋakwapin; elomunete ŋirwosi a ŋakwapin aneni keŋ.”

¹⁷ Toryedik Aburaam, kijuuru todol ereet kwap, ido tokyeni. Kiŋis bon alotau keŋ tema, “Epedor mono ikoku auruun alokile a ŋolo adol ŋikaru keŋ amiat a? Epedori mono Sara ŋina adol ŋikaru ŋatomonikanikaomwon auruun ikoku a?”

¹⁸ Tema Aburaam neni ka Akuj, “Aye robo ca kiterereŋ iyoŋ Isimael toruwor ŋolo iboi iyookino alokiŋaren kon.”

¹⁹ Tema Akuj, “Mam, euruuni aberu kon Sara ikoku ŋinisapat aŋuna kon, ido ilimokini iyoŋ ekiro keŋ Isaka. Ewuak ayoŋ acamunet kaŋ ka iŋes erae ŋina a ŋikaru ka ŋikaru a ŋuna a ŋiletok keŋ.

²⁰ Adau ayoŋ akiirar aneni kon ŋuna a Isimael, eterereŋi ayoŋ iŋes ka etipituni etalala ŋituŋa keŋ nooi. Eruwor iŋes papa a ŋirwosi a ŋitomon ka ŋiarei ka etalalauni nooi ŋituŋa keŋ.

²¹ Nai acamunet kaŋ ka iyoŋ, etogogoŋi ayoŋ aneni a Isaka a ŋolo euruuni Sara aŋuna kon apaki napei na ekaru ŋolo moi.”

²² Kedau Akuj akirworo ka Aburaam, tolot Akuj, kimyek Aburaam.

²³ Ya nai Aburaam lokoku keŋ Isimael ka ŋidwe daadaŋ ŋulupi ŋulu auruunio alokal keŋ ka ŋulu agyelunio a ŋisiliŋa keŋ; ya ŋisapa daadaŋ ŋulu eboiyete alokal keŋ, kileŋer ikes akoloŋit ŋinapei ŋin ŋina erworotor iŋes ka Akuj; ikwapei alimokinitor Akuj iŋes.

²⁴ Arae ŋikaru ka Aburaam ŋatomonikanikaomwon ka ŋikanikaomwon apaki ŋina eleŋerere iŋes.

²⁵ Torae ŋikaru a Isimael a lokoku keŋ ŋitomon ka ŋiuni apaki ŋina eleŋerere.

²⁶ Akoloŋit ŋinapei eleŋerere Aburaam, iŋes eleŋerere lokoku keŋ daŋ Isimael;

²⁷ kaapei ka ŋisapa daadaŋ ŋulu eboiyete alokal keŋ, ŋulu auruunio a nen ka ŋulu agyelunio alotuŋa a ŋulugelae.