Akisy. 15 - Ebaibul

Acamunet ŋina ka Akuj ka Aburam

¹ Kelunyar ŋun daadaŋ, bu akirot ke Ekapolon neni ka Aburam anatakanikinet ebala, “Aburam, nyikuryaniar! Arae ayoŋ aupal kon, iyatakin eropit kon nooi.”

² Kiŋit Aburam Ekapolon tema, “Okoe, Ekapolon Akuj, inyoni ikiini iyoŋ ayoŋ, anerae arubak ayoŋ eboi emam ikoku, ido Eleasar ŋolo alo Damasko iŋes eruwor ekeruman ŋiboro kaŋ?”

³ Tolimu nabo Aburam tema, “Kiira, emam ikoku ikiinak iyoŋ ayoŋ, aŋun, eruwor epito ŋolo alokal kaŋ irumi ŋiboro kaŋ.”

⁴ Nai kirworik Ekapolon neni ka Aburam tema, “Nyeruwor ituŋanan ŋin ekeruman ŋiboro kon, nai isapat ŋini iuruuni iyoŋ, iŋes irumi ŋiboro kon.”

⁵ Kitolomu Ekapolon Aburam kiŋa tema, “Kirereiyo kidiama, kimar ŋikacer erae kipedori akimar ikes.” Tolimok Ekapolon Aburam tema, “Elalata ŋiletok kon ikwa ŋikacer.”

⁶ Anupit Aburam Ekapolon; aŋuna ka anupit keŋ, abu Ekapolon tocamu iŋes erae ŋolo iyookino.

⁷ Tolimok Ekapolon Aburam tema, “Arae ayoŋ Ekapolon ŋolo abu okoyau iyoŋ alo Ur anakwap a ŋina a Ŋibabiloniyae; aŋuna ka ainakin iyoŋ akwap na toruwor ŋina kon.”

⁸ Kiŋit Aburam Ekapolon tema, “Okoe, Ekapolon Akuj kaŋ, inyoni eketaanyuni ayoŋ atemar eruwor akwap na ŋina kaŋ?”

⁹ Tolimok Ekapolon iŋes tema, “Yau neni kaŋ ataok ŋina a ŋikaru a ŋiuni, akale ŋinameot ŋina a ŋikaru a ŋiuni ka ekale ŋolomesek ŋolo a ŋikaru a ŋiuni, ta akuri ka icuit.”

¹⁰ Tolemu Aburam ŋul daadaŋ, totubutubu erae ŋanusyo, kiperyonok ibakasi; nai nyetubutub ŋikyeny.

¹¹ Ani epote ŋikyeny ŋulu enyamete akiriŋ nakiriŋ, kitwara Aburam.

¹² Ani ewaiyari akoloŋ, kilurut Aburam ŋajo, tojotoor nooi; a nen, min akiryonut ŋina eryono cuc ŋina ikitubuli neni ayai Aburam.

¹³ Kirworik Ekapolon neni ka Aburam tema, “Toyenu nu kire atemar, erikoryo ŋiletok kon nakwap ŋinagela, neni eruworotor ŋipi ka isicanio nooi ŋikaru ŋamiae ŋaomwon.

¹⁴ Nai esicani ayoŋ ŋituŋa ŋulu ka akwap a ŋina eruworotor ikes ŋipi. Ani ekaku, elomunete ikes anakwap a ŋin eyakatar ŋiboro ŋulu alalak nooi.

¹⁵ Ani eruwor iyoŋ, ilosi neni atapapaa kon emam ŋace, ikinukyo iyoŋ idaun toris kikoŋikoŋ;

¹⁶ ido eboŋunete ŋiletok kon ne edoli anyamet ŋina a ŋaomwon; anerae eriŋa aronis ŋina a Ŋiamori nyedauna.”

¹⁷ Ani edoiyori akoloŋ, irwoniar akwap, kitoro ŋanusyo a ŋityaŋ ŋuna esibakitae ŋun kidiŋ amot ŋina ka akim ŋina apurui ka atoc ŋina anepi.

¹⁸ Akoloŋit ŋin, tocamun Akuj ka Aburam tema Akuj, “Ainak ayoŋ akwap na neni a ŋiletok kon, anyoun anaŋolol a ŋina alo Ijipit tari naŋolol ŋina apolon nooi ŋina enyaritae Eupurate,

¹⁹ akwap a Ŋikeni, a Ŋikenisi, a Ŋikadimoni,

²⁰ a Ŋiitaiti, a Ŋiperisi, a Ŋirepaim,

²¹ a Ŋiamori, a Ŋikanaani ka ŋina a Ŋigiragasi ta ŋina a Ŋiyebusi.”