Akisy. 1 - Ebaibul

Tosub Akuj akwap

¹ Anakisyakinet, abu Akuj tosub kidiama ka akwap.

² Arae akwap ŋina amam iborekitamet ka amam ibore ayai tooma keŋ ka arapuwarit akiryonut kidiama nenicukul daadaŋ, aryakiryaki Etau ŋolo ka Akuj alokidiama ŋakipi.

³ Tema nai Akuj, “Toyakaun akica;” ido abu akica toyakaun.

⁴ Toanyu Akuj atemar ajok akica; totyaka Akuj akica anakiryonut.

⁵ Tolimok Akuj ekiro ka akica “Apaaran” ka ekiro ka akiryonut “Akuwar.” Toyakaun ataboŋ ka toyakaun ataparacu, arae ŋin akoloŋit ŋina esyakinan.

⁶ Tema Akuj, “Toyakaun ariwo kidiŋ ŋakipi, ikotere totyakite ŋakipi alokidiŋ.”

⁷ Tosub Akuj ariwo, totyak ŋakipi, ŋace kwap ariwo ka ŋace kidiama ariwo. Apotu ŋun kitiyakin.

⁸ Tolimok Akuj ariwo kidiama. Toyakaun ataboŋ ka toyakaun ataparacu, arae ŋin akoloŋit ŋina a ŋaarei.

⁹ Tema Akuj, “Tocunakinos nakibois apei ŋakipi daadaŋ ŋuna eyakasi kwap ariwo, ido totakanu akwap neni aonon.” Apotu ŋun kitiyakin.

¹⁰ Tolimok Akuj neni aonon alokwap “Akwap” ka tolimok neni ecunanakina ŋakipi “Ŋanamyo”, toanyu Akuj atemar ajokak ŋun.

¹¹ Tema Akuj, “Kitolomu akwap ŋikito ka ŋinya, ŋinya ŋulu erayete ŋicok a ŋikabilae kec ka ŋikito ŋulu erayete ŋaraito ŋuna eya ŋicok a ŋikabilae kec.” Apotu ŋun Kitiyakin.

¹² Kitolomu akwap ŋikito ka ŋinya, ŋinya ŋulu erayete ŋicok a ŋikabilae kec ka ŋikito ŋulu erayete ŋaraito ŋuna eya ŋicok a ŋikabilae kec. Toanyu Akuj atemar ajokak ŋun.

¹³ Toyakaun ataboŋ ka toyakaun ataparacu, arae ŋin akoloŋit ŋina a ŋauni.

¹⁴ Tema Akuj, “Toyakaun ŋiboorei ŋulu ecayete nariwo ŋina alokidiama, totyaka apaaran ka akuwar; toruworos ikes igyerito ŋatubeta ŋuna ke ekaru, ŋirwa ka ŋikaru.

¹⁵ Toruwor ikes akica anariwo a ŋina alokidiama, kinwak akica kec akwap.” Apotu ŋun kitiyakin.

¹⁶ Tosub Akuj ŋiboorei ŋulu ecayete ŋuluarei ŋulu apolok, kipuka ŋini epol akica keŋ apaaran ka ŋini edit akica keŋ kipuka akuwar; tosub daŋ Akuj ŋikacer.

¹⁷ Kiwuak Akuj ikes nariwo kidiama, kinwak akica kec akwap,

¹⁸ kipukata ikes apaaran ka akuwar, totyaka ikes akica ka akiryonut. Toanyu Akuj atemar ejokak ŋun.

¹⁹ Toyakaun ataboŋ ka toyakaun ataparacu, arae ŋin akoloŋit ŋina a ŋaomwon.

²⁰ Tema Akuj, “Toyakaun nakipi ŋityaŋ ŋulu elyato, ŋulu eyarete ka toporo ŋikyeny anariwo a ŋina alokidiama akwap.”

²¹ Tosub Akuj ŋityaŋ ŋulu apolok ŋulu eya nanamyo ka ŋisubuna ŋulu elyato anakipi, ŋulutyaŋ a ŋikabilae kec; ka ŋulukyeny ŋulu a ŋabebenuk a ŋikabilae kec. Toanyu Akuj atemar ejokak ŋun.

²² Kiterereŋ Akuj ikes tema, “Touryata, topita, kilelebunos nakipi ŋuna a ŋanamyo; topita ŋikyeny daŋ anakwap.”

²³ Toyakaun ataboŋ ka toyakaun ataparacu, arae ŋin akoloŋit ŋina a ŋakan.

²⁴ Tema nabo Akuj, “Toyakaun nakwap ŋisubuna ŋulu eyarete ŋulu a ŋolokabila: Ŋibaren, ŋityaŋ ŋulu elyato ka ŋityaŋ ŋulu ka ariet ŋulu a ŋolokabila.” Apotu ŋun kitiyakin.

²⁵ Tosub Akuj ŋityaŋ ŋulu anakwap a ŋikabilae kec: Ŋibaren a ŋikabilae kec, ŋityaŋ adaŋ ŋulu elyato alokwap a ŋikabilae kec. Toanyu Akuj atemar ejokak ŋul.

²⁶ Tema nai Akuj, “Osubutu ŋituŋa eyakatar ŋasima yok, ikikwaan ka iwon; kipukata ikes ŋityaŋ ŋulu ka anam, ŋikyeny ŋulu alokidiama, ŋibaren ka ŋityaŋ daadaŋ ŋulu ka akwap ta ibore daadaŋ ŋini elyat alokwap.”

²⁷ Tosub Akuj ŋituŋa eyakatar ŋasima keŋ, alopite a ŋolo eyakatar ŋasima keŋ, abu tosub ikes. Tosub ekile ka aberu.

²⁸ Kiterereŋ Akuj ikes; tolimok tema, “Touryata, topita, kilelebun nakwap kipukata iŋes; kipukata ŋityaŋ ŋulu ka anam, ŋikyeny daadaŋ ka ŋityaŋ daadaŋ ŋulu elosete ta ŋulu elyato.”

²⁹ Tema Akuj, “Kiŋolikisi, akainak ayoŋ iyes ŋikito daadaŋ ka ŋinya daadaŋ ŋulu erayete ŋicok anakwap, ŋolokitoe eraii daadaŋ, eruwor ŋaraito keŋ akimuj kus.

³⁰ Akainak ayoŋ iyes ŋityaŋ daadaŋ ŋulu ka akwap, ŋikyeny daadaŋ, ŋiboorei daadaŋ ŋulu elyato ka ŋinibore eyari alokwap daadaŋ ta ŋikito ka ŋinya ŋulu alibak daadaŋ, akainak iyes toruworos akimuj kus.” Apotu ŋun kitiyakin.

³¹ Toanyu Akuj ibore daadaŋ ŋini abu iŋes tosub, toryamu kire ejokak nooi. Toyakaun ataboŋ ka toyakaun ataparacu, arae ŋin akoloŋit ŋina a ŋakanikapei.