Akis. 9 - Ebaibul

Arupepe ŋina a ŋakan

¹ Abu emalaika ŋolo a ŋikan tokutak arupepe keŋ. Oanyuwa etop ŋolo kebu kimasun anakuj kwap, ainakinitae etop ŋol ekipuŋguwo ŋolo ŋaaret auwuat ŋina aoyan ŋina nyesalunit alokwap.

² Abu etop toŋaa auwuat ŋina aoyan ŋin, tolomu apuru ŋina ekoni ŋina ka arira a ŋina apolon nooi, kisiryon apuru akoloŋ ka kidiama cuc.

³ Tolomu emaase anapuru a ŋin bu kwap, aponi inakinae emaase agogoŋu ŋina ikoni ŋina eyakatar ŋikiitwania.

⁴ Aponi tolimokinae ikes nyewan ŋinya kori ŋikito kori ŋinibore erupunit alokwap daadaŋ; nai mati ŋituŋa daadaŋ ŋulu emam emacar ŋolo ka Akuj aloreetin kec.

⁵ Pa acamakinitae emaase ŋol akiar ŋituŋa ŋul, nai akisican ikes ŋilapyo ŋikan. Apipilu ŋina ka akisicanet a ŋin, ikoni ŋina ikipesyo ekiitwan.

⁶ Alolapyo a ŋulukan a ŋul, iwarete ŋituŋa atwakare, nai nyeryamunete; iwarete epite ŋolo twanet, nai eŋopiyari atwanare aneni kec.

⁷ Ekwaan emaase ka ŋaŋolei ŋuna etenito aŋuna ke ejiye; ayakasi nakyes kec ŋiboorei ŋulu ikwaan ka ŋibokoi ŋulu itiyaunitae a egolid, ekwaan ŋireetin kec ka ŋulu a ŋituŋa.

⁸ Ekwaan ŋitim kec ka ŋulu a ŋaberu, ekwaan ŋikyal kec ka ŋulu a ŋiŋatunyo.

⁹ Arapap ŋatorobwo kec a ŋarapeta a ŋuna etiyaunitae a ŋasuwa, eruye ŋolo a ŋabebenuk kec ekwaan ka eruye ŋolo a ŋagaari a ŋuna irito ŋaŋolei a ŋuna emaryaara lojiye.

¹⁰ Eyakatar ikes ŋiladoi ŋulu pesyet ŋulu ikwaan ka ŋulu a ŋikiitwania, loladoi kec iŋes eyai agogoŋu ŋina wanet ŋituŋa ŋilapyo ŋikan.

¹¹ Eyakatar ikes erwosit ŋolo ipukat ikes ŋolo erae emalaika ŋolo epolokinit auwuat ŋina aoyan ŋina nyesalunit alokwap. Enyaritae ekeekiro a Ŋaburaniyae Abadon; a Ŋagirik enyaritae Apolyon (akeepolou iŋes atemar “Ekenyasunan.”)

¹² Alunyarosi ŋican ŋulu esyaunak, nai eponito nabo ŋiarei.

Arupepe ŋina a ŋakanikapei

¹³ Abu emalaika ŋolo a ŋikanikapei tokutak arupepe keŋ. Abu eira etoil ebunit a Namuroet, alowaetin a ŋuluomwon, a ŋulu ikote ŋamomwar. Etiyaunitae Namuroet a egolid ka eyai kiŋaren Akuj.

¹⁴ Tolimok etoil ŋol emalaika ŋolo a ŋikanikapei ŋolo ayakar arupepe tema, “Tolacak ŋimalaikan ŋuluomwon ŋulu eenitae anaŋolol a ŋina apolon a ŋina enyaritae Eupurate.”

¹⁵ Aponi tolacakinae ŋimalaikan ŋuluomwon ŋulu etemokinitoe aŋuna a esaa a ŋol ka akoloŋit a ŋin, ka aŋuna a elap a ŋol ka aŋuna a ekaru a ŋol, akiar atutubet apei alotooma ŋunauni ŋuna a ŋituŋa.

¹⁶ Aponi okolimokin ayoŋ ekimar ŋolo a ŋituŋa a ŋulu etemokinitoe aŋuna ke ejiye: arae ikes ŋamilyonin ŋamiae ŋaarei.

¹⁷ Anakiruja kaŋ, abu oanyuwa ŋaŋolei ka ŋikametok kec alopite a lo: anapito ŋikametok ŋarapeta ŋuna areŋak ikwa akim, topusiyaka ikwa ebuulu ka tonyaŋaaka ikwa Sulpa. Ekote ŋakyes ŋuna a ŋaŋolei a ŋun ŋuna a ŋiŋatunyo, alomunit akim, apuru ka Sulpa anakituka kec.

¹⁸ Apotu ŋakisicaneta ŋunauni nu: akim, apuru ka Sulpa, ŋuna alomunito anakituka a ŋaŋolei, toara atutubet apei alotooma ŋunauni ŋuna a ŋituŋa.

¹⁹ Anerae eyai agogoŋu ŋina a ŋaŋolei nakituka kec ka loladoi. Ikote ŋiladoi kec ŋimuno a ŋuna eyakatar ŋakyes ŋuna ewanawanaata ŋituŋa.

²⁰ Ŋituŋa ŋulu pa apotu ŋakisicaneta ŋun toara, apotu nyekiwa akilip neni a ŋipyan ka neni a ŋakujo a ŋuna etiyaunito ikes ŋilopeyek. Etiyaunitae ŋakujo ŋun a egolid, a esilipa, a eburonis, a ŋamoru ka a ŋakito; ŋakujo ŋuna nyepedorete aanyuwar, akiirar, kori alosit.

²¹ Apotu daŋ ŋituŋa nyekiwa akiar, akikukuja, amalao, kori akoko.