Akis. 5 - Ebaibul

Ekitaabo ka Imesek

¹ Abu ayoŋ eŋolik ekitaabo anakan a ŋina aloteten a ŋolo eboi alokicoloŋ; egiritae ekitaabo ŋol ŋiwaetin daadaŋ ka epucitae a ŋakipuceta a ŋakanikaarei.

² Abu nabo eŋolik emalaika ŋolo agogoŋon ŋolo eserae a etoil a ŋolo apolon ebala, “Ŋae emaikina tolema ŋakipuceta toŋaa ekitaabo?”

³ Nai amam anakuj kori anakwap ka anakwap a ŋikatwak ŋini amaikina aŋaar ekitaabo ŋol tosyom.

⁴ Abu ayoŋ egwor nooi, anerae amam ituŋanan ŋini amaikina aŋaar ekitaabo ŋol tosyom.

⁵ Abu epei alokatukok okolimok ayoŋ tema, “Nyigwor, toanyuwa, elou eŋatuny ŋolo anateker a Yuda ŋolo erae eletonit a Daudi. Elou iŋes ka apedor alemar ŋakipuceta ŋunakanikaarei, toŋaa ekitaabo.”

⁶ Abu ayoŋ eŋolik Imesek ewuoi alokidiŋ ekicoloŋ irikaunito ŋisubuna ŋuluomwon ka ŋikatukok. Atakani Imesek esibit earitae. Ayakar iŋes ŋamomwar ŋakanikaarei ka ŋakonyen ŋakanikaarei, ŋulu erae ŋitai ŋulukanikaarei ŋulu ka Akuj ŋulu iyakiyaritae nakwap daadaŋ.

⁷ Abu Imesek tolot, tolemu ekitaabo anakan a ŋina aloteten a ŋolo eboi alokicoloŋ.

⁸ Ani kedau iŋes alemar ekitaabo, apotu ŋisubuna ŋuluomwon ka ŋikatukok ŋulutomoniarei ka ŋiomwon toramakinos kwap kiŋaren Imesek. Ayakar ŋolosubuna ka ŋolokatukon aduŋgu ka abakule ŋina etiyaunitae a egolid, kileleba eminae ŋolo ke ekinyate ŋolo erae ŋakilipasinei ŋuna a ŋituŋa a ŋulu ka Akuj.

⁹ Apotu ikes toeikis eete ŋolokitete temasi, “Emaikina iyoŋ alemun ekitaabo toŋaa ŋakipuceta keŋ. Anerae ikiaritae sek iyoŋ ka ibu togyelu ŋituŋa a ŋaokot kon iyau neni ka Akuj, ŋituŋa a ŋikabilae, a ŋaŋajepa, a ŋakwapin ka a ŋibukui a daadaŋ.

¹⁰ Ituruwo iyoŋ ikes apukan a ŋisacaradotin ŋulu ka Akuj yok, ipukaete ikes akwap.”

¹¹ Nabo abu ayoŋ eŋoliya, eira ŋitoilon a ŋimalaikan a ŋulu adolito ŋalipyo ka ŋamilyonin! Awuasi ikes irikaunito ekicoloŋ kaapei ka ŋisubuna ŋuluomwon ta ŋikatukok,

¹² abasi a etoil a ŋolo apolon: “Emaikina Imesek ŋini aaritae eryamuni apedor, ebari, aosou, agogoŋu, akerit, apolou ka akipuro!”

¹³ Abu eira ŋolosubuna anakuj, anakwap ka anakwap a ŋikatwak ka ananam ta ŋinibore daadaŋ eyai tooma kec ebasi, “Toyai akipuro, akerit, apolou ka agogoŋu neni a ŋolo iboi alokicoloŋ ka neni a Imesek, ŋikaru ka ŋikaru!”

¹⁴ Apotu ŋisubuna ŋulu eyarete ŋuluomwon toboŋokis temasi, “Amen!” Ido toramakinos ŋikatukok kwap, kilipa.