Akis. 22 - Ebaibul

¹ Abu nai emalaika eketoodik ayoŋ aŋolol ŋina a ŋakipi a ŋuna ka akiyar, ŋuna apariparete ikwa ŋakamilimili, toleleunito alokicoloŋ a ŋolo ka Akuj ka a ŋolo a Imesek.

² Toleleunito kwap kitorito kidiŋ erukude ŋolo apolon ŋolo ke etaun a ŋolo apolon. Ŋolowae ka aŋolol, ayai ekitoe ŋolo ka akiyar, toraununuyete ŋarwa ŋatomon ka ŋaarei alokaru, a ŋololap apeiraunet. Arae ŋakwii kec ŋuna kitaŋaleunet ŋakwapin.

³ Emam ibore ŋini icenen aneni ka Akuj ŋini eyakaun lotaun ŋolo apolon. Eyakaun ekicoloŋ ŋolo ka Akuj ka ŋolo a Imesek lotaun ŋolo apolon, ilipete ŋiketiyak keŋ neni keŋ.

⁴ Eanyuwarete ikes ereet keŋ ka eyakaun ekiro keŋ loreetin kec.

⁵ Nyeyakaun nabo jik akuwar ace, nyiitanete ikes ŋitaae kori akoloŋ, anerae eruwor Ekapolon Akuj akica kec ka ipukaete ikes ŋikaru ka ŋikaru.

Abunore a Yesu

⁶ Okolimok emalaika ayoŋ tema, “Iyookino ŋakiro ŋun erae ŋuna a kire, ŋuna epedoryo akikinyom. Abu Ekapolon Akuj, ŋina einanakini etau keŋ neni a ŋikadwarak, kiyakiu emalaika keŋ akitoodikin ŋiketiyak keŋ ŋakiro ŋuna itemokino kitiyakin anapaki a ŋina eapi.”

⁷ Ebala Yesu ebe, “Kiirasi, abuni ayoŋ atipei!” Erereŋ ŋulu iwuapete ŋakiro ŋuna edwaritae alokitaabo a lo!

⁸ Ayoŋ Yoana eira ka eŋolik ŋakiro ŋun daadaŋ. Ani kadau akiirar ka akiŋolikin, abu oramakin kwap nakejen ke emalaika a ŋolo eketoodikini ayoŋ ŋakiro ŋun ka adikino ayoŋ elipi neni keŋ.

⁹ Nai tema iŋes neni kaŋ ebe, “Nyilip neni kaŋ! Arae ayoŋ daŋ eketiyan ikwa iyoŋ ka ikwa ŋikaitotoi kon ŋikadwarak ta ŋulu daadaŋ ŋulu iwuapito ŋakiro ŋuna ke ekitaabo a lo. Kilip neni ka Akuj!”

¹⁰ Okolimok iŋes ayoŋ tema, “Nyimunon ŋakiro ŋuna edwaritae alokitaabo a lo, anerae eapi apaki ŋina itiyakinotor ŋun daadaŋ.

¹¹ Iŋes ŋini itiyae ŋuna aronok, torubak itiyae ŋuna aronok; iŋes ŋini esiilyana, torubak itiyae asiilyo; iŋes ŋini itiyae ŋuna iyookino, torubak itiyae ŋuna iyookino ka iŋes ŋini erae ŋini ka Akuj, torubak erae ŋini ka Akuj.”

¹² Ebala Yesu ebe, “Kiirasi, abuni ayoŋ atipei! Ayauni ayoŋ ŋiropito kaŋ, oinak ŋinituŋanan ikwa itiyator.

¹³ Arae ayoŋ Alpa ka Omega, ŋolo Eŋarenon ka ŋolo Esidyon--Akisyakinet ka Asalunet.”

¹⁴ Erereŋ ŋulu ilotarito ŋilowi kec, ikotere toryamut apedor ŋina nyamet arait ŋina ke ekitoe a ŋolo ka akiyar ka kitoro lopidiŋ elomarete lotaun ŋolo apolon.

¹⁵ Nai kiŋa etaun ŋolo apolon eyakaunosi ŋisiilyanotin, ŋikapilak, ŋimalaanotin, ŋikaarak, ŋulu ilipete neni a ŋakujo car ka daadaŋ ŋulu irworosi ka kitiyaete alyokonu.

¹⁶ “Ayoŋ Yesu eyakuunit emalaika kaŋ akiteyenun iyes ŋakiro nu anatukon a Ŋikristo. Arae ayoŋ ataagoroit ka alyasit--eletonit ŋolo anateker a Daudi; arae ayoŋ etop ŋolo ka ataparacu ŋolo enepi nooi.”

¹⁷ Ebasi Etau ka Ateran, “Bua!” Itemokino ituŋanan daadaŋ ŋini iirari nu tema, “Bua!” Itemokino iŋes ŋini enyamit akure bu, itemokino iŋes ŋini ecamit ŋakipi ŋuna ka akiyar, ya pa egyelit.

Ŋakiro ŋuna esidyok ka akiikinet

¹⁸ Ayoŋ Yoana alimokinit ituŋanan daadaŋ ŋini iirari ŋakiro ŋuna edwaritae alokitaabo a lo: ani kiyatak ituŋanan ŋakiro ŋace neni kec, iyatakini Akuj neni keŋ ŋakisicaneta ŋuna elimunitoe alokitaabo a lo;

¹⁹ ani kelema ituŋanan ŋakiro ŋace anakiro a ŋuna edwaritae alokitaabo a lo, elemari Akuj aneni keŋ arait ŋina etemokino iŋes toryamu alokitoe a ŋolo ka akiyar ka nyelomari iŋes lotaun ŋolo apolon ŋolo ka Akuj.

²⁰ Iŋes ŋini iteyenunit ŋakiro nu ebala, “Kire jik abuni ayoŋ atipei!” Amen. Bua, Ekapolon Yesu!

²¹ Toyai ajokis ŋina ke Ekapolon Yesu neni a ŋituŋa a ŋulu ka Akuj a daadaŋ. Amen.