Akis. 21 - Ebaibul

Nakuj ŋina kitete ka akwap ŋina kitete

¹ Abu nai oanyuwa nakuj ŋina kitete ka akwap ŋina kitete. Apotu nakuj ŋina esyaunan ka akwap ŋina esyaunan toŋopiasi; toŋopia anam daŋ.

² Abu oanyuwa Etaun ŋolo apolon ŋolo ka Akuj, Yerusalem ŋolokitete, ebunit alokidiama aneni ka Akuj, itemokino ikwa ateran ŋina esirit aŋuna ka akisiryam lokile keŋ.

³ Abu eira etoil ŋolo apolon irworo alokicoloŋ a ŋolo ka apolou ebala, “Kiŋolik! Ameun tokona erukito Akuj ka ŋituŋa keŋ! Erukete iŋes ka ikes, eruworosi ikes ŋituŋa keŋ. Erukete Akuj alope ka ikes, eruwor iŋes Akuj kec.

⁴ Emyetari iŋes ŋakiyo daadaŋ anakonyen kec, nyeyakaun nabo atwanare, nyeyakaun nabo akiyaloloŋ kori akigworo kori aryeba. Aŋopiyasi ŋiboro ŋulu ŋorok.”

⁵ Tolimu nai ŋolo eboi alokicoloŋ a ŋolo ka apolou tema, “Kiŋolik! Tokona eturuwo ayoŋ ŋiboro daadaŋ ŋikitet!” Abu iŋes nabo okolimok ayoŋ tema, “Kigir ŋun, anerae erae ŋakiro ŋuna a kire ŋuna epedoryo akikinyom.”

⁶ Tema nabo neni kaŋ, “Erikakin! Arae ayoŋ Alpa ka Omega--Akisyakinet ka Asalunet. Ŋini daadaŋ enyami akure, ainakini ŋakipi ŋuna emam egyelit, ŋuna aloitanit a ŋolo ka akiyar.

⁷ Ŋini ilouni, eryamuni ŋun aneni kaŋ, aruwor ayoŋ Akuj keŋ ka eruwor iŋes lokoku kaŋ.

⁸ Nai ŋikakuryanak, ŋikalukinok, ŋulu nyenupito, ŋikaarak, ŋimalaanotin, ŋikekukujak, ŋulu ilipete neni a ŋakujo ka ŋikalyokonok daadaŋ imasakinio ikes nanam ŋina ka akim ka ŋina a Sulpa. Erae ŋin atwanare ŋina a ŋaarei.”

Yerusalem ŋolokitete

⁹ Abu nai emalaika epei a ŋulukanikaarei, ŋolo ayakar ŋabakulei ŋunakanikaarei ŋuna eleleba ŋakisicaneta ŋunakanikaarei ŋuna esidyok, bu neni kaŋ tema, “Bua, eketoodikini ateran, aberu a Imesek.”

¹⁰ Abu Etau min neni kaŋ, okoya emalaika tari moru ŋolo aoyan nooi. Eketoodik Yerusalem etaun ŋolo apolon ŋolo ka Akuj ebunit alokidiama aneni ka Akuj,

¹¹ tocai aŋuna ka akica a ŋina ka Akuj. Tocai etaun ŋol ikwa amoru ŋina epol egyelit, ikwa Yaspa, kileereu ikwa ŋakalilii.

¹² Ayakar iŋes arwatata ŋina apolon ŋina aoyan, ŋina a ŋipidiŋa a ŋitomon ka ŋiarei ka ŋimalaikan ŋitomon ka ŋiarei ŋulu eyokiyete ŋolopidiŋ. Egiritae lopidiŋa ŋul ŋirorwa ŋulu a ŋikabilae a ŋulutomon ka ŋiarei a ŋulu a Isirael.

¹³ Ayakasi ŋipidiŋa ŋiuni ŋolowae; ŋiuni Kide, ŋiuni nakan ŋina alo Kwap, ŋiuni Kuju ka ŋiuni To.

¹⁴ Adukokinitae arwatata ŋina ke etaun a ŋol namoru ŋunatomon ka ŋaarei ŋuna ka akisyakinet, ŋuna egiritae ŋirorwa ŋulu a Ŋikiyakia a ŋulutomon ka ŋiarei a ŋulu a Imesek.

¹⁵ Ayakar emalaika ŋolo ekesirwori ayoŋ ebela ŋolo etiyaunitae a egolid ŋolo kipimet etaun ŋolo apolon, ŋipidiŋa keŋ ka arwatata keŋ.

¹⁶ Ariyan ŋarwatatain ŋunaomwon ŋuna ke etaun a daadaŋ. Kipim emalaika etaun ŋolo apolon ŋol a ebela a ŋolo kipimet, erae aoyau keŋ ŋakilomitae ŋalipyo ŋaarei ka ŋamiae ŋaomwon alowaetin ka kidiama ta kwap.

¹⁷ Abu emalaika kipim arwatata daŋ, arae aoyau keŋ ŋina alokidiama ŋamitae ŋatomonikanikapei; ikwapei araakar epite ŋolo epimianaa iŋes.

¹⁸ Adukitoe arwatata a ŋamoru a ŋuna enyaritae Yaspa, ka adukitoe etaun ŋol a egolid, a ŋolo acai ikwa akaliliit.

¹⁹ Esibusitae ŋamoru ŋuna ka akisyakinet a arwatata a ŋina ke etaun a ŋamoru a ŋuna epol egyelit a ŋuna egelegelya. Amoru ŋina ka akisyakinet ŋina esyaunan anyaritae Yaspa, ŋina a ŋaarei apusiyana ka anyaritae Sapire, ŋina a ŋauni arae ŋina aliban ka anyaritae Agate, ŋina a ŋaomwon arae ŋina aliban nooi ka anyaritae Emeral,

²⁰ ŋina a ŋakan arae ŋina areŋan ka anyaritae Oniks, ŋina a ŋakanikapei anyaritae Karanelia, ŋina a ŋakanikaarei arae ŋina nyaŋ-aliban ka anyaritae Krisolait, ŋina a ŋakanikauni arae ŋina pus-aliban ka anyaritae Beril, ŋina a ŋakanikaomwon arae ŋina nyaŋ ka anyaritae Topas, ŋina a ŋatomon arae ŋina oŋor-aliban ka anyaritae Krisopreis, ŋina a ŋatomon ka apei arae ŋinapus ka anyaritae Yacins ka ŋina a ŋatomon ka ŋaarei arae ŋina pus-areŋan ka anyaritae Ametist.

²¹ Arae ŋipidiŋa ŋulutomon ka ŋiarei ŋamoru ŋuna amilimilak ŋunatomon ka ŋaarei, ŋuna epol egyelit; etiyaunitae ŋolopidiŋ kan amoru apei ŋina amilimilan ŋina epol egyelit. Arae erukude ŋolo alokidiŋ etaun egolid bon, acai ikwa akaliliit.

²² Nyiŋolikina ayoŋ Akai ka Akuj alotaun a ŋolo apolon, anerae Ekapolon Akuj ŋina etiron ka Imesek ikes erae Akai ka Akuj keŋ.

²³ Nyiitanit etaun ŋol akica ŋina ka akoloŋ kori ŋina ke elap, anerae ecaikinit akica ŋina ka Akuj neni keŋ ka erae Imesek etaa keŋ.

²⁴ Elosete ŋituŋa a ŋakwapin a daadaŋ anakica keŋ ka eyaunete ŋirwosi ŋulu ka akwap ebari kec tooma keŋ.

²⁵ Idoŋete ŋipidiŋa ŋulu ke etaun a ŋol eŋaara apaaran daadaŋ; nyegolokinio ikes jik, anerae emamukaun akuwar aina.

²⁶ Eyaunio apolou ka ebari ŋolo a ŋakwapin tooma lotaun ŋolo apolon.

²⁷ Nai emam ibore ŋini aronon elomari neni keŋ, emam tari idiotuŋanan ŋini itiyae ŋuna a ŋileec ka ŋuna ka alyokonu. Ŋituŋa ŋulu igiritae lokitaabo ŋolo ka akiyar ŋolo a Imesek, ikes bon elomarete tooma etaun ŋol.