Akis. 19 - Ebaibul

¹ Kedaunosi ŋun, abu eira ebunit anakuj etoil ŋolo apol, ŋolo asibit ŋolo a ŋituŋa a ŋulu alalak ebala, “Alleluia! Aiuno, apolou ka apedor erae ŋulu ka Akuj yok!

² Erae kire ka iyookino ŋatubokineta ŋuna ka Akuj! Atuboki iŋes amalaat ŋina enyasunit akwap aŋuna ka amalao keŋ. Enyaŋarya Akuj iŋes, anerae abu iŋes toar ŋiketiyak ŋulu ka Akuj.”

³ Tocelut nabo temasi, “Alleluia! Elosi apuru ŋina ka arira a ŋina enyamuwari etaun ŋolo apolon nooi ŋol kidiama ŋikaru ka ŋikaru!”

⁴ Apotu ŋikatukok ŋulutomoniarei ka ŋiomwon ta ŋisubuna ŋuluomwon ŋulu eyarete, toramakinos kwap, kilipa neni ka Akuj, a ŋina eboi alokicoloŋ temasi, “Amen! Alleluia!”

Ŋasuban ŋuna ke ekiitanu a ŋolo a Imesek

⁵ Bu etoil alokicoloŋ ebala, “Kipuro Akuj yok, iyes ŋiketiyak keŋ daadaŋ ka ŋituŋa daadaŋ ŋulu ikerito iŋes, ŋulu arwok ka ŋulu caryo!”

⁶ Abu eira etoil ŋolo asibit ŋolo a ŋituŋa a ŋulu alalak, ŋolo asibit ŋolo a ŋakipi a ŋuna eremuno anakope, ŋolo asibit ŋolo ka agirokinet a ŋina ireta. Eira ikes ebasi, “Alleluia! Anerae erae Ekapolon Akuj yok ŋina etiron, Erwosit!

⁷ Olelyana ka olakaros, epuro apolou keŋ! Anerae adol apaki ŋina a ŋasuban a ŋuna ke ekiitanu a Imesek, itemokino daŋ ateran keŋ aŋuna keŋ.

⁸ Ainakin iŋes ŋilowi ŋulu ajokak ŋulu amilimilak ŋuludelet.” (Ŋilowi ŋulu ajokak ŋul, ikes erae ŋiticisyo ŋulu ka akiyookino a ŋituŋa a ŋulu ka Akuj.)

⁹ Okolimok nai emalaika tema, “Kigir nu: erereŋ ŋulu enyaritae nasuban ŋuna ke ekiitanu a Imesek.” Tema nabo emalaika, “Erae ŋakiro ŋun ŋuna a kire ŋuna ka Akuj.”

¹⁰ Abu oramakin kwap nakejen keŋ akilip, nai abu iŋes tema, “Nyilip neni kaŋ! Arae ayoŋ daŋ eketiyan ikwa iyoŋ ka ikwa ŋikaitotoi kon, ŋulu erae ŋisuudae a Yesu. Kilip neni ka Akuj!” Anerae ŋuna iteyenunit Yesu ikes isirworete ŋikadwarak.

Ekameton edokit aŋole ŋina akwaŋan

¹¹ Abu oanyuwa nakuj eŋaara, ayai nen aŋole ŋa akwaŋan. Enyaritae ekameton keŋ ŋolo Ikinyoma ka ŋolo a Kire; etubonokini iŋes ka eji anakiyookino.

¹² Ekote ŋakonyen keŋ arira ka anapit ŋatoryet ŋuna alalak. Egiritae ekiro neni keŋ, nai amam ituŋanan ŋini ayeni, mati elope.

¹³ Ebwaliyarito ŋaokot ekaaso ŋolo anapit iŋes. Arae ekiro keŋ, “Akirot ŋina ka Akuj.”

¹⁴ Atupito ŋasigarya ŋuna anakuj iŋes edokito ŋaŋolei ŋuna akwaŋak ka tonapito ŋilowi ŋulu ajokak ŋulu akwaŋak, tosegak.

¹⁵ Alomunit anakituk keŋ atum ŋina akwaŋan ŋina ilounia iŋes ŋakwapin. Ipukae iŋes ikes ka aryenyeo ka ecuuni a ŋakejen keŋ epiini anacuet a ŋina ke epiini, ŋina erae anyunyura ka Akuj a ŋina etiron.

¹⁶ Egiritae lokaaso ka namuro keŋ ekiro lo, “Erwosit a ŋirwosi ka Ekapolon a ŋikapolok.”

¹⁷ Abu oanyuwa emalaika ewuoi anakoloŋ. Tocelu a etoil a ŋolo apolon nooi neni a ŋikieny daadaŋ a ŋulu aporete alokidiama tema, “Potu, tocununos daadaŋ nakimuj ŋina ka Akuj ŋina apolon!

¹⁸ Potu, tonyama ŋawat a ŋirwosi, a ŋikapolok a ŋasigarya ka ŋasigarya, akiriŋ a ŋaŋolei ka ŋawat a ŋikametok kec, ŋawat a ŋituŋa daadaŋ, ŋuna a ŋipi ka ŋuna a ŋulu nyerae ŋipi, ŋuna a ŋulu arwok ka ŋuna a ŋulu caryo!”

¹⁹ Abu oanyuwa etyaŋ ka ŋirwosi ŋulu ka akwap ka ŋasigarya kec ecunakina akitijiyore ŋolo amet aŋole ka ŋasigarya keŋ.

²⁰ Aponi kikamarae etyaŋ kaapei ka ekadwaran ŋolo amodiyanan ŋolo kitiyae ŋakujuwuanisya alokiŋaren etyaŋ. (Ŋakujuwuanisya ŋun, ikes abunio iŋes tomodikinia ŋulu ayakatar emacar ŋolo ke etyaŋ ka ŋulu elipete neni ke etorube keŋ.) Ani eriŋa eyarete, aponi kimasakinae etyaŋ kaapei ka ekadwaran ŋolo amodiyanan nanam ŋina ka akim, ŋina enepya Sulpa.

²¹ Aponi ŋasigarya kec toarae ka atum a ŋina alomuni anakituk a ŋolo amet aŋole, tonyama ŋikyeny daadaŋ ŋawat kec lopite ŋolo apedoritotor.