Akis. 18 - Ebaibul

Aukor ŋina a Babilon

¹ Kelunyarosi ŋun, abu oanyuwa emalaika ece ebuni anakuj. Ayakar iŋes apolou nooi, kinuak akica keŋ akwap daadaŋ.

² Abu kiworou a etoil a ŋolo apolon tema, “Aukor iŋes! Aukor Babilon ŋolo apolon nooi! Aruwor ere ŋolo a ŋipyan ka ŋauyenito; iboiyete tokona ŋikyeny ŋulu asiilyanak ka ŋulu aronok aneni keŋ.

³ Anerae adaut ŋakwapin daadaŋ akimat epiini keŋ--epiini ŋolo ke ekibure ŋolo ka amalao keŋ. Apotu ŋirwosi ŋulu ka akwap tomalaana ka iŋes, tobara daŋ ŋimucurus ŋulu ka akwap aloterekune keŋ a ŋolo a ŋiboro.”

⁴ Abu nabo eira etoil ece anakuj ebala, “A ŋituŋa kaŋ, tolomutu aneni keŋ! Ikotere nyiseca ikwa ŋituŋa keŋ, ido toryamut ŋakisicaneta keŋ!

⁵ Anerae alalata ŋasecisya keŋ, edyatakin adol tari nakuj, etamunit daŋ Akuj ŋiticisyo keŋ ŋulu aronok.

⁶ Kitiyata neni keŋ lopite ŋolopei abunio iŋes kitiyaa neni kus. Totaca iŋes ŋatacet ŋaarei aŋuna ke etic a daadaŋ a ŋolo etiya iŋes. Kitemokisi epiini ŋolo adwaran lokopo keŋ ŋarwa ŋaarei ikwa epiini ŋolo abu iŋes kitemok aŋuna kus.

⁷ Inakisi iŋes ŋican ka akiyaloloŋ iriyan ka akituro ta eleilei ŋolo ayakar iŋes. Anerae erubakinit iŋes ebala, ‘Eboi ayoŋ a ne, arae arwosit! Meere ayoŋ apuserut, nyikiryamakin jik ayoŋ ka akiyaloloŋ!’

⁸ Aŋun, ikamunete iŋes ŋakisicaneta nu alotooma apeikoloŋit bon--edeke, akiyaloloŋ ka eron. Icunyaryo iŋes ka akim, anerae erae Ekapolon Akuj ŋina etubokini iŋes ŋina etiron.”

⁹ Ikalounete ka iyaloloŋete ŋirwosi ŋulu ka akwap, ŋulu kitiyaete ka iŋes amalao ka ekibure ŋolo aronon, aŋuna ke etaun a ŋolo apolon, apaki ŋina eanyuwaryata apuru ŋina ka arira a ŋina enyamuwari iŋes.

¹⁰ Ewuoete ikes aneni alwanan aŋuna ekeritotor aryamun ŋican kaapei ka iŋes, temasi, “Oitakoi! Oitakoi! Iyoŋ Babilon, etaun ŋolo apolon nooi! Alotooma epeisaa bon adolu atubokino kon!”

¹¹ Ikalounete ka iyaloloŋete ŋimucurus ŋulu ka akwap aŋuna keŋ, anerae adaun ŋini egyeli ŋiboro kec.

¹² Emam ŋini egyeli egolid kec, esilipa, ŋamoru ŋuna ajokak ka ŋakamilimili, ŋilowi kec ŋulu amilimilak, ŋulu kipura-areŋak, ŋuludelet ka ŋulu areŋak; ŋabaoi ŋuna egelegelya, ŋuna akukunyok, ŋiboro ŋulu egelegelya, ŋulu itiyaunitae a ŋikyal a ŋitome, ŋiboro ŋulu itiyaunitae a ŋabaoi a ŋuna epol egyelit, ŋulu itiyaunitae a eburonis, ŋasuwa ka ŋamoru ŋuna iceo ŋiboro;

¹³ Sinamo--ekitoe ŋolo itukukunyi akimuj, eminae ŋolo ke ekinyate ka akimyet ŋina akukunyon ŋina eminae ka eceminae ŋolo akukunyon nooi ŋolo icunyo; epiini ka akimyet, ŋakirya ka ŋaganoi, ŋaatuk ka ŋamesekin, ŋaŋolei ka ŋagaari; ŋipi ka ŋituŋa daŋ.

¹⁴ Elimokinete ŋimucurus iŋes temasi, “Aŋopiyasi ŋiboro daadaŋ ŋulu sek iitanit iyoŋ akituruwor ŋulu kon, adaun ebari ka arwon kon daadaŋ, nyiryamuni nabo iyoŋ ikes jik!”

¹⁵ Ewuoete aneni alwanan ŋimucurus ŋulu apotu tobara aŋuna ecurutaata alotaun a ŋolo apolon a ŋol, anerae ekerito ikes aryamun ŋican kaapei ka iŋes. Epote ikes akigworo ka akiyaloloŋ,

¹⁶ temasi, “Oitakoi! Kerokyata ŋakiro ŋuna atakanut lotaun ŋolo apolon nooi lo! Anapenene sek iŋes ŋilowi ŋulu amilimilak, ŋulu kipura-areŋak ka ŋulu areŋak, kisibusite akuwan keŋ a ninapen a ŋulu etiyaunitae a egolid, a ŋamoru a ŋuna epol egyelit ka ŋakamilimili!”

¹⁷ Atwania iŋes ebari ŋol daadaŋ alotooma esaa epei! Apotu ŋikapolokinitok ŋameeli ka ŋikalotok ŋulu aya nameeli, ŋikametok ŋameeli ka ŋituŋa ŋuluce daadaŋ ŋulu eyarikinito nanam towua aneni alwanan,

¹⁸ kikalout eanyuwarete apuru ŋina ka arira a ŋina anomiyari iŋes temasi, “Emam etaun ece ŋolo ekoni etaun ŋolo apolon nooi lo ŋinapei koloŋ!”

¹⁹ Tobukonokis ŋalup ŋakyes kec, kigworo ka kiyaloloŋo temasi, “Oitakoi! Kerokyata ŋakiro ŋuna atakanut lotaun ŋolo apolon nooi lo! Arae iŋes etaun ŋolo abarakinete ŋimucurus ŋulu ayakatar ŋameeli! Atwania iŋes ebari ŋol daadaŋ alotooma esaa epei.”

²⁰ Nakuj, tolakari! Ŋituŋa ŋulu ka Akuj ka ŋikiyakia ta ŋikadwarak, tolakaros! Anerae adau Akuj atubokin iŋes aŋuna abu iŋes kitiya neni kus!

²¹ Abu emalaika tolemu amoru ŋina atya ŋinakiryeet, kimasa nanam ebala, “Ikokinio inyasunio Babilon etaun ŋolo apolon nooi nege, nyeanyuwar nabo.

²² “Nyiiraryo nabo aneni kon eruye ŋolo a ŋaduŋgui ka ŋitoilon a ŋituŋa, ŋolo a ŋikakutak ŋapilui ka ŋarupepe! Nyeryamun nabo ŋiketiyak kon ŋulu aosok jik. Nyiirar nabo eruye ŋolo ka amoru a ŋinakiryeet.

²³ Nyeanyuwar nabo akica ŋina ke etaa aneni kon, nyiirar nabo ŋitoilon ŋulu a ŋaterak ka ŋulu a ŋikeitak aneni kon. Arwoko ŋimucurus kon anakwap a daadaŋ, nai ibu iyoŋ tomodik ŋituŋa ŋulu ka akwap a daadaŋ a ekamuka a ŋolo ke ekitoe kon.”

²⁴ Aponi Babilon kisicanae, anerae aponi toryamunae ŋaokot ŋuna a ŋikadwarak ka ŋuna a ŋituŋa a ŋulu ka Akuj aneni keŋ; ŋaokot a ŋituŋa daadaŋ a ŋulu aaryo anakwap.