Akis. 17 - Ebaibul

Amalaat ŋina yenen

¹ Abu epei a ŋimalaikan a ŋulukanikaarei a ŋulu ayakatar ŋabakulei ŋakanikaarei, bu neni kaŋ tema, “Bua, eketoodikini ayoŋ iyoŋ epite ŋolo isicanere amalaat ŋina yenen, etaun ŋolo apolon ŋol, ŋolo edukitoe diyete ŋaŋololin ŋuna alalak.

² Apotu ŋirwosi ŋulu anakwap tomalaana ka iŋes, tomerakinos ŋituŋa ka akwap aŋuna amasyata epiini ŋolo ka amalao keŋ.”

³ Abu Etau min neni kaŋ, okoya emalaika naloŋisat. Oanyuwa ayoŋ aina aberu ŋina eboi alokidiama etyaŋ ŋolo areŋan ŋolo egiritae lowaetin keŋ daadaŋ ŋirorwa ŋulu iyanyitere Akuj. Ayakar etyaŋ ŋakyes ŋakanikaarei ka ŋamomwar ŋatomon.

⁴ Anapit aberu ŋilowi ŋulu kipura-areŋak ka ŋulu areŋak, kisibusite akuwan keŋ a ŋinapen a ŋulu etiyaunitae a egolid, a ŋamoru a ŋuna epol egyelit ka ŋakamilimili. Ayai nakan keŋ ekopo ŋolo etiyaunitae a egolid, kileleba aronis ka asiilyo ŋina ka amalao keŋ.

⁵ Egiritae ikona loreet keŋ ekiro ŋolo imunono apolou keŋ, “Babilon ŋolo apolon nooi, toto a ŋamalaae ka ŋakiro ŋuna aronok anakwap daadaŋ.”

⁶ Abu oanyuwa aberu ŋin emerete ŋaokot ŋuna a ŋituŋa a ŋulu ka Akuj ka ŋuna a ŋulu kearyo aŋuna kenupitotor Yesu. Ani eŋolikini ayoŋ iŋes, abu okobul nooi.

⁷ Nai ekeŋit ayoŋ emalaika tema, “Kaanukiro ikibulitor iyoŋ? Akalimokini ayoŋ iyoŋ apolou ŋina a ŋakiro a ŋuna imunono a ŋuna ka aberu a ŋin ka ŋuna ke etyaŋ a ŋolo iboiyo iŋes, a ŋolo eyakar ŋakyes ŋakanikaarei ka ŋamomwar ŋatomon.

⁸ Ayari koloŋ etyaŋ ŋol, nai tokona nyeriŋa eyari; eapi iŋes alomun anakipany a ŋina aoyan a ŋina nyesalunit alokwap, tolot nai toarae. Eumokinete ŋituŋa ŋulu koloŋ pa keponi kigirae ŋirorwa kec lokitaabo ŋolo ka akiyar ameun anasubunet akwap, apaki ŋina iŋolikiniata etyaŋ. Anerae ayari koloŋ, tokona nyeriŋa eyari, nai etakanuni nabo.

⁹ “Itemokino toyakatar aosou ka ayenut. Erae ŋakyes ŋunakanikaarei ŋikamukumukui ŋikanikaarei, ŋulu iboiyo aberu. Erae daŋ ikes ŋirwosi ŋikanikaarei;

¹⁰ adaut ŋikan alokidiŋ kec atwakare, eriŋa epei ipukat ka eriŋa epei nyebuno; nai ŋina ebunio iŋes, itemokino kipuka apaki ŋina euruwuana.

¹¹ Etyaŋ ŋolo koloŋ ayari, nai tokona nyeriŋa eyari, erae iŋes erwosit ŋolo a ŋikanikauni, ŋolo erae epei a ŋulukanikaarei, ŋolo elosi aaro.

¹² “Ŋamomwar ŋunatomon ŋuna ianyuwarit iyoŋ, erae ŋirwosi ŋitomon ŋulu eriŋa nyeryamuna apukan, nai eryamunete ikes apedor ŋinakipukaet kaapei ka etyaŋ esaa epei bon.

¹³ Eruworosi ŋulutomon ŋul daadaŋ ŋipei, einakinete daŋ apedor ka apolou kec neni ke etyaŋ.

¹⁴ Itijiyete ikes Imesek, nai ilouni ikes Imesek kaapei ka ŋulu enyaritae, ŋulu eseunitae ka ŋikewuapak ŋulu erubakinito enupito iŋes, anerae erae iŋes Ekapolon a ŋikapolok ka Erwosit a ŋirwosi.”

¹⁵ Abu emalaika okolimok ayoŋ tema, “Ŋakipi ŋuna ibu iyoŋ toanyuwa iboiyo amalaat, erae ŋituŋa, ŋasepico, ŋakwapin, ka ŋaŋajepa.

¹⁶ Ŋamomwar ŋatomon ŋuna ibu iyoŋ toanyuwa, eremokinosi ikes kaapei ka etyaŋ eŋerete amalaat; elemarete ikes ibore daadaŋ ŋini eyakar iŋes, kimyekis eleri, irikarete ikes iŋes ka kicunyasi.

¹⁷ Anerae adau Akuj akiwuakin lotai kec akitiya acamit keŋ, ŋina erae akimorikina kaapei, inakis etyaŋ apedor kec akipukaa akitodol ŋina iyookinotor ŋakiro ŋuna ka Akuj.

¹⁸ “Aberu ŋina ibu iyoŋ toanyuwa erae etaun ŋolo apolon, ŋolo ipukat ŋirwosi ŋulu ka akwap.”