Akis. 14 - Ebaibul

Imesek ka ŋituŋa keŋ

¹ Abu eŋolik oanyuwa Imesek ewuoi alomoru a ŋolo enyaritae Sion; arukito ka ŋituŋa ŋalipyo amiat ka ŋatomoniomwon ka ŋiomwon, ŋulu egiritae ekiro a Imesek ka ŋolo a Papa keŋ loreetin kec.

² Abu eira etoil anakuj ŋolo arwo ikwa ŋakipi ŋuna eremuno anakope, ekwaan eruye ka ŋolo ka agirokinet a ŋina ireta. Arwo ikwa ŋaduŋgui eeotor ŋikaeok.

³ Aeosi ŋituŋa ŋul eete ŋolokitete alokiŋaren ekicoloŋ ka alokiŋaren ŋityaŋ ŋuluomwon ŋulu ayarete ka alokiŋaren ŋikatukok. Amam idiotuŋanan ŋini apedori ayenun eete ŋol, mati ŋulu arae ŋalipyo amiat ka ŋatomoniomwon ka ŋiomwon, ŋulu keris keiun anakwap.

⁴ Erae ikes ŋikilyok ŋulu nyiryamakina ka ŋaberu, anerae etaleoro ikes. Iwuapito ikes Imesek neni elosi daadaŋ. Aponi toiunae ikes alokidiŋ ŋituŋa ŋuluce ka erae ikes ainakinet ŋina ke ekiŋaren ŋina ainakinio neni ka Akuj ka neni a Imesek.

⁵ Emam nyiirara adiolyokonu aneni kec, emam adioronis aneni kec.

Ŋimalaikan ŋuluuni

⁶ Abu nai oanyuwa emalaika ece epori alokidiama aneni alwanan, eyakar Ŋakiro ŋuna Ajokak, ŋuna nyesalunete ŋuna limokina neni a ŋituŋa a ŋulu eya nakwap, neni a ŋibukui a daadaŋ, a ŋikabilae, a ŋaŋajepa ka a ŋakwapin.

⁷ Abu iŋes kirwor a etoil a ŋolo apolon tema, “Tokerito Akuj ka kitopoloorito iŋes! Anerae adolu apaki ŋina etubokinia iŋes ŋituŋa. Kilipa neni a ŋolo asubuni nakuj, akwap, anam ka ŋilelyan!”

⁸ Abu emalaika ŋolo a ŋiarei kiwuapak ŋolo ke ekiŋaren tema, “Aukor iŋes! Aukor Babilon ŋolo apolon nooi! Ŋolo abu kitamat ŋakwapin daadaŋ epiini keŋ ŋolo ka amalao!”

⁹ Abu emalaika ŋolo a ŋiuni kiwuapak ŋuluarei ŋulu ke ekiŋaren irworo a etoil a ŋolo apolon ebala, “Ituŋanan daadaŋ ŋini ilipi neni ke etyaŋ ka neni ke etorube keŋ, ido toryamu emacar aloreet kori anakan keŋ,

¹⁰ ebuni iŋes elope akimat epiini ŋolo ka Akuj; epiini ŋolo ka anyunyura a ŋina ka Akuj, ŋolo abukoki iŋes pa ecaritae lokopo ŋolo ka aŋoit keŋ! Iŋes daadaŋ ŋini itiyae ŋun, isicanio ka akim ka Sulpa alokiŋaren ŋimalaikan ŋulu ka Akuj ka Imesek.

¹¹ Erubakini apuru ŋina ka akim a ŋina isicani ikes elosi kidiama ŋikaru ka ŋikaru. Emam apaaran kori akuwar ŋina ieŋuniata alocan kec. Ŋituŋa ŋulu ilipete neni ke etyaŋ a ŋol ka neni ke etorube keŋ, ikes ŋulu eyai emacar keŋ loreetin kec.”

¹² Itemokino totitinyikis ŋituŋa ŋulu ka Akuj, ŋulu iwuapito Ŋakiciketa keŋ, ŋulu enupito Yesu.

¹³ Abu eira etoil anakuj ebala, “Kigir nu: erereŋ ŋituŋa ŋulu etwakete anakijaanakin Ekapolon ameun tokona!” Toboŋok Etau tema, “Ee, kire jik! Ieŋunete ikes alocan kec, anerae erukorete ikes ka ŋiticisyo kec.”

Akilem ŋina ka akwap

¹⁴ Abu eŋoliya oanyuwa edou ŋolo akwaŋan, alokidiama edou ŋol, eboi ŋini ekoni ituŋanan, tonapite ebokot ŋolo etiyaunitae a egolid, toyakar ekileŋ ŋolo ŋeret ŋolo emilia nakan keŋ.

¹⁵ Abu emalaika ece tolomu alo Kai ka Akuj, kiworou a etoil a ŋolo apolon neni a ŋini eboi alodou tema, “Kisitiya ekileŋ kon ŋolo ŋeret alemia, anerae adolu apaki ŋina lemet. Akono akwap, etemokin akilem!”

¹⁶ Abu nai ŋini eboi alodou tolem a ekileŋ keŋ akwap, kirikakin akilem ŋina ka akwap.

¹⁷ Tolomu nabo emalaika ece alo Kai ka Akuj anakuj, ayakar iŋes daŋ ekileŋ ŋolo ŋeret ŋolo emilia.

¹⁸ Abu nabo emalaika ece ŋolo epolokinit akim tolomu a Namuroet, kiworou a etoil a ŋolo apolon neni a ŋolo ayakar ekileŋ ŋolo emilia tema, “Kisitiya ekileŋ kon, tolem ŋaraito ŋuna ke epiini alomanikor a ŋolo ka akwap, anerae akoko ŋaraito.”

¹⁹ Abu nai emalaika ŋol tolem a ekileŋ keŋ akwap, tolem ŋaraito alopiini, kimasak nacuet epiini--acuet ŋina ka anyunyura a ŋina ka Akuj.

²⁰ Aponi tocuunae ŋaraito ŋun anacuet alokiŋa etaun ŋolo apolon, toleleut ŋaokot anacuet, toleleiyasi ŋakilomitae ŋamiae ŋauni ka arae acukul kec alokwap ŋamitae ŋaarei.