Akis. 13 - Ebaibul

Ŋityaŋ ŋuluarei

¹ Abu oanyuwa etyaŋ elomuni ananam. Ayakar ŋamomwar ŋatomon ka ŋakyes ŋakanikaarei; a ŋinamomwara ayakar atoriet ka ŋinakou ayakar ekiro ŋolo eyanyit Akuj.

² Ekwaan etyaŋ ŋol ka eris, ayakar ŋakejen ŋuna ekwaan ka ŋuna ka etyaŋ a ece a ŋolo adedeŋan, ekwaan akituk keŋ ka ŋina ke eŋatuny. Abu epiu inak etyaŋ ŋol apedor, ekicoloŋ ka apolou keŋ ŋina alalan.

³ Atakani akou ŋina ke etyaŋ apei ewanan nooi, nai keris keiyo. Abu akwap daadaŋ toumok, kiwuap etyaŋ ŋol.

⁴ Kilipa ŋituŋa daadaŋ neni ke epiu, anerae abu inak apolou keŋ neni ke etyaŋ. Kilipa ikes tari neni ke etyaŋ ebasi, “Ŋae ikoni etyaŋ? Ŋae epedori akitijiore iŋes?”

⁵ Aponi tocamakinae etyaŋ ŋol akirwor ŋakiro ŋuna ka akituro ka ŋuna ka akiyany Akuj ka aponi tocamakinae iŋes ayakau napolou ŋilapyo ŋatomoniomwon ka ŋiarei.

⁶ Kisyak etyaŋ ŋol akiyany Akuj, akiyany ekiro ŋolo ka Akuj ka neni iboiyo Akuj ta ŋulu eyakasi nakuj.

⁷ Aponi tocamakinae etyaŋ akitijiyore ka akiloun ŋituŋa ŋulu ka Akuj. Aponi inakinae iŋes apolou ŋinakipukaet ŋikabilae, ŋakwapin, ŋaŋajepa ka ŋibukui.

⁸ Epote ŋituŋa daadaŋ ŋulu anakwap akilip neni keŋ; ŋituŋa daadaŋ ŋulu pa kigiritae ŋikecerorwa lokitaabo ŋolo ka akiyar, ŋinapei anasubunet akwap, erae ekitaabo ŋol ŋolo a Imesek a ŋini aponi toarae.

⁹ “Iŋes ŋini eya ŋaki, kiira nu:

¹⁰ Ituŋanan ŋini itemokino kikamarae, itemokino kire kikamarae; ituŋanan ŋini itemokino toarae ka atum, itemokino kire toarae ka atum. Aŋun, itemokino ŋituŋa ŋulu ka Akuj totitinyikis ananupit kec.”

¹¹ Abu oanyuwa etyaŋ ece elomuni alotooma akwap. Ayakar iŋes ŋamomwar ŋaarei ŋuna ekwaan ka ŋuna a imesek ka erworo ikwa epiu.

¹² Esitiyae iŋes apolou daadaŋ ŋina ke etyaŋ a ŋolo ke ekiŋaren, a ŋolo ariŋa eyai nen. Abu kitiŋak ŋituŋa daadaŋ ŋulu iboiyete anakwap akilip neni ke etyaŋ a ŋolo esyaunan a ŋolo keris ajeme keiyo.

¹³ Abu etyaŋ lo ŋolo a ŋiarei kitiya ŋakujuwuanisya ŋuna ka aumokin; kitodou tari akim anakuj kwap iteete ŋituŋa daadaŋ.

¹⁴ Abu tomodik ŋituŋa daadaŋ ŋulu iboiyete anakwap a ŋakujuwuanisya a ŋuna acamakinitae iŋes akitiya alokiŋaren etyaŋ ŋolo ke ekiŋaren. Tolimok etyaŋ ikes adukokin etorube ŋolo ke etyaŋ a ŋolo awanitae ka atum, nai ayari.

¹⁵ Aponi tocamakinae etyaŋ ŋolo a ŋiarei akieŋakin akiyar tooma lotorube ŋolo ke etyaŋ a ŋolo ke ekiŋaren, ikotere kisirworik etorube ka kitaar daadaŋ ŋulu awounete akilip neni keŋ.

¹⁶ Abu etyaŋ ŋol toreik ŋituŋa daadaŋ ŋulu caryo ka ŋulu arwok, ŋikabarak ka ŋikulyak, ŋipi ka ŋulu nyerae ŋipi, akiwuakin emacar nakan kec ŋuna aloteten kori loreetin kec.

¹⁷ Emam ituŋanan ŋini apedori akigyel kori agyelanar emam emacar ŋol, mati eyakar emacar ŋol ŋolo erae ekiro ŋolo ke etyaŋ kori enamba ŋolo erae ŋolo ke ekiro a ŋol.

¹⁸ Itemokino toyakatar aosou. Ituŋanan ŋini eos, epedori aripun enamba ŋolo ke etyaŋ, anerae erae enamba ŋol ŋolo ke ekiro a ituŋanan. Enamba keŋ erae ŋamiae ŋakanikapei ka ŋatomonikanikapei ka ŋikanikapei (666).