Akis. 12 - Ebaibul

Aberu ka Epiu

¹ Totakanu aanyunet ŋina apolon ŋina ka aumokin anakuj. Ayai aberu ŋina arae ekeelou akoloŋ ka ayakar elap kwap ŋakejen keŋ ka ebokot ŋolo a ŋikacer a ŋitomon ka ŋiarei nakou keŋ.

² Apoti iŋes ka adolit akidoun; apotu aryeba ka ŋican ŋulu ka akidoun kisiworout iŋes.

³ Totakanu aanyunet ace ŋina apolon ŋina ka aumokin anakuj. Ayai epiu ŋolo apolon nooi ŋolo areŋan ŋolo ayakar ŋakyes ŋakanikaarei ka ŋamomwar ŋatomon ta ŋatoriet ŋakanikaarei ŋuna aya nakyes keŋ.

⁴ Torarau elado keŋ atutubet apei alotooma ŋunauni ŋuna a ŋikacer, kimasa kwap. Towo epiu ŋol alokiŋaren aberu, ikotere enyamia ikoku apaki ŋina idounere.

⁵ Abu aberu kidou ikoku ŋini sapat, ŋini ipukae ŋakwapin daadaŋ ka aryenyeo. Nai aponi ikoku ŋin tokoporoe neni ka Akuj ka lokicoloŋ keŋ.

⁶ Abu aberu ŋin todoki naloŋisat neni etemokinit Akuj aŋuna keŋ, neni iyokiyere iŋes ŋirwa apeiliput ka ŋamiae ŋaarei ka ŋatomonikanikapei.

⁷ Kisyak nai ejiye anakuj. Kitijioto Mikael ka ŋimalaikan keŋ epiu, ido toboŋo epiu ka ŋimalaikan keŋ.

⁸ Nai aponi kilounae epiu ka ŋimalaikan keŋ, nyecamakin akiboi anakuj nabo.

⁹ Aponi kimasunae epiu ŋolo apolon ŋol anakuj, ŋolo erae emun ŋoloŋorot ŋolo enyaritae Ekipye kori Satan; ŋolo abu tomodik akwap daadaŋ. Aponi kimasunae iŋes kwap kaapei ka ŋimalaikan keŋ.

¹⁰ Abu eira etoil ŋolo apolon anakuj ebala, “Adolu tokona aiuno ŋina ka Akuj! Etoodiu tokona Akuj apedor keŋ ikwa Erwosit! Etoodiu tokona Kristo keŋ apolou! Anerae emasun anakuj ŋolo awuoi alokiŋaren Akuj yok, ŋolo sek esitakinit ŋikaitotoi yok apaaran ka akuwar.

¹¹ Apotu ŋikaitotoi yok kilout iŋes a ŋaokot a ŋuna a Imesek ka aŋuna a ŋakiro a ŋuna eteyenunete ikes; anerae acamunito ikes akijal akiyar kec, totwaka.

¹² Aŋun, tolakari iyoŋ nakuj ka ŋulu iya tooma keŋ! Nai ekaŋ iyes ŋulu iyakasi nakwap ka nanam! Anerae abu Satan kwap neni kus ka enyunyura nooi, aŋuna eyenia atemar eyakar iŋes apaki ŋina euruwuana nooi.”

¹³ Ani eanyuni epiu atemar ekemasun iŋes kwap, abu kisyak akiwuapit aberu ŋina edouni ikoku ŋini sapat.

¹⁴ Aponi inakinae aberu ŋin ŋabebenuk ŋaarei ŋuna ke egole a ŋolo apolon, ikotere topororia tolosio nakibois keŋ naloŋisat neni etemokinit Akuj aŋuna keŋ; neni iyokiyere iŋes ŋikaru ŋiuni ka atutubet nyewania epiu iŋes.

¹⁵ Abu nai epiu tobuk akalele ŋina a ŋakipi anakituk keŋ neni ka aberu, ikotere iwoki akalele iŋes.

¹⁶ Nai abu akwap kiŋarak aberu; abu toŋaa akituk keŋ, kiliko ŋakipi ŋuna aponito anakituk ke epiu.

¹⁷ Toŋoik epiu aberu, tolot akitijiyore ŋiletok ŋuluce ŋulu ka aberu, ŋiletok daadaŋ ŋulu iwuapito Ŋakiciketa ŋuna ka Akuj ka ŋulu erae ŋisuudae a Yesu.

¹⁸ Abu epiu towo alokipetot ka anam.