Abak. 1 - Ebaibul

¹ Ŋakiro nu ikes abu ekadwaran Abakuk toryamu aneni ke Ekapolon.

Akiŋuruŋura ka Abakuk

² Okoe Ekapolon, tari ori akanyarit ayoŋ iyoŋ akiŋarakin ayoŋ nai nyipupi iyoŋ? Kori tari ori egworor ayoŋ abala, “Alalaari aryenyeo,” nai nyikiiuni iyoŋ isua?

³ Kaanukiro ikimyekinia iyoŋ ayoŋ ete itiyao ŋakiro ŋuna nyiyookino? Kaanukiro icamakinitor iyoŋ ŋuna nyiyookino? Eyakasi diyete kaŋ amunyaro ka aryenyeo; elalak nooi ŋijiesyo ka ŋiburasinei.

⁴ Aŋun, nyeriŋa emisitae ŋuna ebasi ŋikisila, emam ŋuna iyookino ŋuna itopolooritae, irikaete ŋulu aronok ŋulu iyookino. Aŋun, emanar akiyookino kaku.

Aboŋokinet ŋina ke Ekapolon

⁵ Abu nai Ekapolon toboŋok ŋituŋa keŋ tema, “Torubakisi iteete ŋituŋa a ŋakwapin a ŋuna eya nawaetin kus, ido iumokinete iyes a ŋakiro a ŋuna iŋolikinete. Alosi ayoŋ akitiyakin ibore idio ŋini nyinupete iyes tari kikilimokin daŋ.

⁶ Ainakini ayoŋ ŋituŋa a Babilon apedor ŋinakipukaet, ainakini apedor lotuŋa ŋul ŋulu aryenyaanak, ŋituŋa ŋul nyiyeŋununeete. Elosete ikes etubete akwap, aŋuna ka akikamanar ŋakwapin toruworos ŋuna kec.

⁷ Ekerito ŋituŋa a ŋakwapin a ŋunace ikes nooi, iturosi ikes nooi, ido etamete atemar ŋuna daadaŋ itiyaete ikes erae ŋuna iyookino ka ecamakinitae.

⁸ Epiraka nooi ŋaŋolei kec akilo ŋirisae, ededeŋ nooi akilo neni ededeŋiata ŋipeei ŋisaae ŋulu ka ataboŋ, icurosi ŋaŋolei kec ipudaete akwap nooi. Eponeneete ŋikametok ŋaŋolei kec anakwapin a ŋuna alwanak. Iuwaunun ikwa egole ecamit akinyam ibore.

⁹ Elosete ŋasigarya kec ŋaren ikamanarete ŋakwapin daadaŋ ka aryenyeo, ido emini akuryanu neni a ŋinituŋanan apaki ŋina edolunioto ikes. Ecunete ikes ŋirikon kec ikwa ecunere asinyon.

¹⁰ Ejamuwarito ikes ŋirwosi, ido ekyenatar ŋikepukak. Ejamuwarito ikes ŋaduketa ŋunajiet daadaŋ, anerae epedorito ikes akituk ŋalup tari kidiama akitodol neni ikamaryata akibois.

¹¹ Ani nai elomarete nen, topyasi ibore daadaŋ lopite ŋolo epyaa ekuwuam, ido nai torotokis. Erae ikes ŋituŋa ŋulu iilit ŋulu aŋero ŋikisila. Ituruworito ikes apedor akuj kec.”

Akiŋuruŋura ka Abakuk ŋina a ŋaarei

¹² Ekapolon, ŋina pei anakisyakinet irae iyoŋ Akuj, irae iyoŋ Akuj kaŋ ŋina asegan ka ŋina a ŋikaru ka ŋikaru. Okoe Ekapolon Akuj kaŋ ka ekeuryaran kaŋ, idau iyoŋ aseun ŋituŋa a Babilon ka itogogoŋ iyoŋ ikes, ikotere ikisicanete isua.

¹³ Irae iyoŋ Akuj ŋina Asegan, ido nyipedori akitere aronis. Ikokini iyoŋ ite ŋuna itiyaete ŋituŋa lu ŋulu emam akikinyoma ka ŋulu aronok, ido tomam akisican ikes, ŋulu amunyasi ŋituŋa ŋulu iyookino akilo ikes ai?

¹⁴ Kaanukiro itiŋitor iyoŋ ŋituŋa esibit ŋikolya ŋulu erimaete, kori ŋabeerei ŋuna erimaete emam ekepukan itenit?

¹⁵ Ikami erwosit a Babilon ŋituŋa a ŋikodoce, esibit erae ŋikolya. Irikiŋa ŋulu adau iŋes akikamun, ido tocunak iwapei, tocelu elelyani.

¹⁶ Aŋun, einanakini iŋes ŋamuronisya neni a ŋiboro keŋ a ŋulujiet, anerae earanakinete ŋiboro ŋul iŋes ibore daadaŋ ŋini ajokan.

¹⁷ Erubakini mono iŋes jik isitiyae ŋileŋia keŋ ka emunyanari ŋituŋa a ŋakwapin emam akisyon a?